Hebrew 6:1-20
6 Diatu, pengudah kitai tembu belajar pasal pekara asas ke bekaul enggau Kristus, aram meh kitai enggau bebendar nyadi orang ke besai tuai. Anang berengkah baru belajarka pekara asas, iya nya pasal nesal ati ari ngereja pengawa ke nadai guna, pasal arapka Petara,
2 pasal baptisa, pasal ngengkahka jari ba atas orang, pasal orang ke mati deka diidupka baru, sereta pasal pemutus ti enda berubah ke digaga Petara ti bekaul enggau utai ke diakim Iya.
3 Nya meh utai ke deka digaga kitai, enti Petara ngemendarka nya.
4 Sekeda orang udah nerima penampak ari Petara, nerima pemeri ti pechuma ari serega, sereta nerima kuasa kudus Iya.
5 Sida mega udah nerima jaku Petara ti manah sereta berekat* ke jemah ila.*
6 Tang sida udah ninggalka ajar ti bendar. Nya alai, nadai orang ulih nulung sida ngambika nesal ati, laban sida empu udah mantang Anak Petara ba tiang lalu ngemaluka iya ba mua orang mayuh.
7 Tu disemaka baka tanah. Tanah bulih berekat ari Petara lebuh tanah nya nginsap ai ujan ke suah labuh, lalu mansutka utai tumbuh ti beguna ke orang ke ngeradu tanah nya.
8 Tang, enti tanah nya mansutka madang duri sereta madang lalang, tanah nya nadai guna. Enda lama da agi, tanah nya deka kena sumpah lalu pengujung iya deka ditunu.
9 Bala menyadi ke dikerindu, taja pan kami bejaku munyi nya, kami pechaya kita deka bulih berekat ti manah agi. Kami mega pechaya, kita benung ngereja utai ke ulih nyelamatka kita.
10 Nya ketegal Petara ukai Petara ti enda lurus, nyentukka Iya enda ingatka pengawa ke udah dikereja kita sereta pengerindu ke udah diayanka kita ke nama Iya, lebuh kita terus nulung bala nembiak Iya ti kudus.
11 Taja pia, kami deka tiap iku kita terus rajin baka selama, ngambika kita nganti utai ke dikearapka kita enggau andal lalu enda kakang nyentuk ke ujung,
12 sereta ngambika kita enda nyadi malas. Teladan meh sida ke nerima utai ke udah disemayaka ketegal sida arap sereta sabar.
13 Lebuh Petara besemaya ngagai Abraham, Iya besumpah atas nama Diri laban nadai sapa-sapa ke tinggi agi ari Iya.
14 Ku Iya: “Aku tentu deka merekatka nuan, lalu Aku tentu deka ngasuh peturun nuan nambah beberapa kali lipat.”
15 Abraham bulih semaya tu pengudah iya nganti enggau sabar.
16 Lebuh besumpah, mensia besumpah atas nama orang ke tinggi agi ari sida, lalu nya nyadika jamin ti sah ngambika sida enda bekelikuh.
17 Pia mega, lebuh Petara deka nunjukka enggau terang agi ngagai orang ke nerima semaya Iya, pasal tuju* Iya ke enda berubah, Iya besumpah kena ngesahka semaya Iya.
18 Dua iti pekara nya* tentu enda berubah, lalu Petara enda ulih bula pasal nya. Nya alai, kitai ke udah belindung ba Petara bulih peransang ti besai, ngambika bepegai tegut ba utai ke dianti kitai enggau andal ke bisi ba mua kitai.
19 Utai ke dianti kitai enggau andal baka sauh ke pengidup kitai. Utai ke dianti kitai amat deka nyadi sereta tau dikearapka, lalu mai kitai tama ke dalam nengah tirai.
20 Bisi siku pengari kitai ke udah tama kia dulu, iya nya Jesus ke udah nyadi imam besai baka Melkisedek nyentuk ke belama iya.
Nota Kaki
^ Jaku Asal, “kuasa.”
^ Peda Penerang Leka Jaku, “Sistem dunya.”
^ Tauka “peneka.”
^ Iya nya, semaya enggau sumpah Jehovah.
