Hebrew 7:1-28
7 Melkisedek, iya nya raja Salem sereta imam Petara ti Pemadu Tinggi, betemu enggau Abraham lalu merekatka Abraham lebuh Abraham pulai pengudah ngalahka bala raja.
2 Udah nya, Abraham meri iya satu persepuluh ari utai ke dirampas ari bala munsuh. Nama Melkisedek mai reti “Raja Pengelurus,” lalu iya mega raja Salem, ke mai reti “Raja Pengelantang.”
3 Nadai orang nemu pasal indai enggau apai iya. Tusut pasal peturun iya mega nadai ditulis, lalu maya iya ada enggau maya iya mati mega enda ditemu. Enggau nya, iya nyadi baka Anak Petara lalu nyadi imam nyentuk ke belama iya.
4 Peda peninggi penuduk iya nyentukka Abraham, apai bala bansa* kitai, udah meri iya satu persepuluh ari utai ke pemadu manah ke udah dirampas ari bala munsuh.
5 Nitihka Adat, peturun Lewi ke dipilih nyadi imam diberi pesan ngambika ngumpul satu persepuluh ari utai ke diulih orang Israel, iya nya bala menyadi sida empu, taja pan bala menyadi sida nya mega peturun Abraham.
6 Melkisedek ukai peturun Lewi. Tang, iya nerima satu persepuluh ari utai ke diulih Abraham, lalu iya udah merekatka Abraham ke udah nerima semaya Petara.
7 Orang ke tinggi pangkat endang sigi merekatka orang ke baruh pangkat, lalu nya enda ulih dibantah.
8 Orang Lewi ke nerima satu persepuluh utai ari orang bukai ulih mati. Tang iya ke siku nya, ke udah nerima satu persepuluh utai ari orang bukai, Bup Kudus madahka iya deka terus idup.
9 Kitai mega ulih ngumbai, indah Lewi ke nerima satu persepuluh utai ari orang bukai, mega udah mayar ngena satu persepuluh utai ke diulih iya lalu iya mayar nya nengah Abraham.
10 Nya ketegal Lewi ke nyadi peturun Abraham bedau ada lebuh Melkisedek betemu enggau aki iya, Abraham.
11 Atur orang Lewi ke nyadi imam nya sebagi ari Adat ke diberi ngagai orang Israel. Enti sema bala imam ke ari peturun Lewi ulih ngasuh orang nyadi sempurna, kati kitai agi begunaka siku da agi imam baka Melkisedek? Enti pia, endaka imam ke baka Aron udah chukup?
12 Tang ketegal atur nyadi imam udah diubah, Adat mega mesti diubah.
13 Orang ke dikerandauka ba ditu datai ari raban bansa bukai, lalu nadai siku pan ari raban bansa iya ke kala gawa ba alta.*
14 Tuan kitai amat datai ari raban bansa Judah. Tang, Moses nadai kala madahka pasal imam ke deka datai ari raban bansa nya.
15 Utai tu deka nyadi terang agi lebuh siku imam bukai ke baka Melkisedek datai.
16 Iya nyadi imam ukai ketegal iya datai ari raban bansa ke udah ditetapka ba adat, tang ketegal kuasa ke meri iya pengidup ti enda ulih dipunaska.
17 Ku siti ayat madahka pasal iya: “Nuan meh ke nyadi imam belama iya, baka Melkisedek.”
18 Nya alai, atur ke sebedau tu udah dikinsil laban atur nya lemi sereta enda bekesan.
19 Adat enda ulih ngasuh utai nyadi sempurna. Tang Petara udah meri kitai utai ti manah agi ke ulih dianti kitai enggau andal, lalu nya ulih ngasuh semua utai nyadi sempurna sereta ngasuh kitai majak rapat enggau Petara.
20 Pia mega, Petara udah besumpah lebuh Iya milih Jesus nyadi imam.
21 (Endang amat, sekeda orang nyadi imam taja pan Petara enda besumpah. Tang iya ke siku nya, nyadi imam nengah sumpah. Ku Petara bejaku pasal iya: “Aku, Jehovah, udah besumpah, lalu Aku enda ngubah runding Aku,* ‘Nuan meh ke nyadi imam belama iya.’”)
22 Enggau nya, Jesus nyadi jamin ke sempekat ti manah agi.
23 Kelimpah ari nya, ketegal pemati, bala imam patut diganti orang bukai laban sida enda ulih agi bejalaika pengawa sida.
24 Tang, ketegal Jesus idup nyentuk ke belama iya, iya enda ibuh diganti orang bukai nyadi imam.
25 Nya alai, iya tentu ulih nyelamatka orang ke ngenyemakka diri enggau Petara nengah iya, laban iya seruran idup lalu ulih bebendar minta ngagai Petara ngarika sida.
26 Kitai endang patut bisi imam besai ke baka nya, ke tetap ati, enda bepenyalah, tuchi, diseraraka ari orang ke bedosa, sereta ditinggika tinggi agi ari langit.
27 Bala imam besai ke bukai patut meri pemeri ninting hari, keterubah ketegal dosa sida empu, lalu udah nya ketegal dosa orang bukai. Tang, iya enda baka sida laban iya nyerahka diri nyadika pemeri* sekali aja ke belama iya.
28 Orang ke dipilih nyadi imam besai sejalai enggau Adat bisi pengelemi. Tang Anak ke dipilih nengah sumpah ke disebut pengudah Adat, nyadi sempurna nyentuk ke belama iya.
Nota Kaki
^ Tauka “tuai bilik.”
^ Peda Penerang Leka Jaku.
^ Tauka “enda nesalka nya.”
^ Tauka “pemeri ti disayat; korban.”
