James 1:1-27
1 Aku, James, ke nyadi ulun Petara sereta ulun Tuan Jesus Kristus, nulis surat tu ngagai 12 raban bansa ke ngachir ba serata endur:
Terima meh salam ari aku!
2 Bala menyadi, gaga ati meh lebuh kita napi mayuh macham penguji,
3 laban kita nemu, pengarap kita ke udah diuji deka ngasuh kita tan.
4 Tang, enti kita tan ngenatka diri, kita deka dilatih enggau pengabis iya, ngambika kita sempurna enggau nadai bepenyalah ba semua pekara sereta nadai kurang nama-nama.
5 Enti bisi sapa-sapa ari kita ke kurang penemu-dalam, awakka iya terus minta nya ari Petara, lalu Petara deka meri nya ngagai iya laban Petara enda nganu,* tang Iya deka meri nya enggau gerah jari ngagai semua orang.
6 Tang lebuh iya minta, iya patut arap. Iya mimit pan enda patut kakang, laban orang ke kakang baka umbak ke dikebuka ribut kin kia.
7 Kebendar iya, orang ke baka nya enda patut ngarapka diri deka nerima nama-nama utai ari Jehovah.*
8 Nya ketegal iya orang ke ati dua tiga, lalu iya enda pasti lebuh ngereja semua pengawa iya.
9 Awakka menyadi ke miskin gaga ati* lebuh iya ditinggika,
10 lalu menyadi ke kaya gaga ati lebuh dikemaruhka, laban orang kaya deka lenyau baka bungai ba padang.
11 Lebuh mata panas tumbuh, pengangat iya deka ngasuh utai tumbuh layu, bungai iya gugur, lalu pemanah gamal iya lenyau. Baka nya meh orang kaya deka lenyau lebuh iya bebendar ngulihka pengaya.
12 Gaga ati meh sida ke terus ngenatka diri napi penguji, laban sida deka bulih makota pengidup pengudah sida diterima Jehovah. Iya udah besemayaka nya ngagai sida ke seruran rinduka Iya.
13 Lebuh kena penguji, nadai sapa-sapa patut madahka: “Petara benung nguji aku.” Nya ketegal penyai enda ulih nguji Petara, lalu Petara enda nguji sapa-sapa.
14 Tang, tiap iku orang diuji lebuh pengingin iya empu ngumpan iya sereta narit ati iya.
15 Pengudah pengingin nya ngandung, iya deka ngadaka dosa, lalu pengudah dosa dikereja, nya deka mai pemati.
16 Bala menyadi ti dikerinduka aku, anang kena tipu.
17 Tiap iti pemeri ti manah sereta sempurna datai ari atas, lalu nurun ari Apai penampak ba langit, ke enda baka ayuk ke suah berubah.
18 Ketegal peneka Iya meh kitai idup nengah jaku Iya ti bendar, ngambika kitai nyadi orang keterubah ke dipilih ari bala sida ke digaga Iya.
19 Bala menyadi ti dikerinduka aku, kita patut nemu tu: Tiap iku orang mesti jampat ninga, tang lubah bejaku sereta lubah ringat,
20 laban pengeringat mensia enda ulih ngereja utai sejalai enggau pengelurus Petara.
21 Nya alai, buai semua utai ti kamah enggau semua* penyai, lalu enggau nelap nerima jaku ke ditanam ba kita ke ulih nyelamatka kita.
22 Tang, kita patut ngereja utai nitihka jaku nya, ukai semina ninga aja, lalu anang nipu diri ngena runding ti salah.
23 Barang sapa ke ninga jaku nya, tang enda nitihka iya, baka orang ke meda gamal diri ba cheremin.
24 Pengudah meda diri empu, iya pan mupuk lalu jampat enda ingatka iya orang ke baka ni.
25 Tang orang ke bebendar beratika sereta terus nitihka adat ti sempurna ke mai pengelepas, ukai orang ke jampat enda ingatka utai ke didinga diri. Iya orang ke ngereja utai ke didinga iya, lalu iya deka gaga ati enggau utai ke digaga iya.
26 Enti orang ngumbai diri nyembah Petara,* tang iya enda nagang dilah diri, iya nipu ati iya empu, lalu sembah iya nadai guna.
27 Ba Petara, Apai kitai, tu meh sembah* ke enda kamah sereta tuchi: Nyaga anak yatim enggau indu balu ke merinsa, sereta nyeraraka diri ari utai ti kamah ba dunya tu.
Nota Kaki
^ Tauka “enda ngiga penyalah iya.”
^ Peda nota kaki ba Matthew 1:20.
^ Jaku Asal, “temegah ati.”
^ Tauka engka, “mayuh.”
^ Tauka “alim.”
^ Tauka “agama.”
