James 4:1-17
4 Ari ni penatai penyarut enggau laya ke nyadi ba bala kita? Endaka utai nya datai ari pengingin ti bedosa ke seruran belaban dalam kita?
2 Kita inginka sesiti utai, tang kita enda bulih utai nya. Kita majak munuh lalu balat inginka utai orang, tang agi meh kita enda teulihka utai nya. Kita majak belaya sereta charut, tang kita enda bulih utai nya, laban kita enda minta.
3 Taja pan kita minta, tang agi meh kita enda bulih utai nya, laban tuju kita minta utai nya salah, iya nya ketegal kita deka ngemuaska pengingin kita ti bedosa.
4 O kita ke butang,* kati kita enda nemu, enti kita bekaban enggau dunya, reti nya kita bemunsuh enggau Petara? Nya alai, barang sapa ke ingin deka bekaban enggau dunya, kebendar iya, iya ngasuh diri empu nyadi munsuh Petara.
5 Kati kita ngumbai ayat Bup Kudus nadai kebuah nyebut munyi tu: “Ba dalam kitai, bisi ati* ti jampat kepapas, lalu kitai selalu inginka utai bukai”?
6 Taja pia, pemanah ati Petara ti besai nulung kitai ngelaban asai ati ke baka nya. Nya meh kebuah ayat Bup Kudus madahka: “Petara ngelaban orang ke sumbung, tang Iya ngayanka pemanah ati ti besai ngagai orang ke baruh ati.”
7 Nya alai, ngasi meh ke Petara, lalu laban meh Sitan.* Enggau nya, Sitan deka rari ari kita.
8 Semak meh ngagai Petara, lalu Iya pan deka semak ngagai kita. Kita ke bedosa, basu meh jari kita. Lalu kita ke ati dua tiga, tuchi meh ati kita.
9 Nyabak meh lalu asuh ati kita tusah sereta merinsa. Ganti meh ketawa kita ngena sabak, lalu ganti pengaga ati kita ngena penusah ati.
10 Ayanka meh diri baruh ati ba mua Jehovah, lalu Iya deka ngeninggika kita.
11 Bala menyadi, badu agi bejaika pangan diri. Barang sapa bejai tauka ngakim menyadi iya, kebendar iya, iya bejai sereta ngakim adat. Enti kita ngakim adat, kita enda nitihka adat, tang nyadi hakim.
12 Semina Petara aja ke meri adat sereta ke nyadi Hakim, lalu semina Iya aja ke ulih nyelamat sereta ngemunaska orang. Tang sapa kita nya, nyentukka kita deka ngakim orang bukai?
13 Dinga kita. Sekeda ari bala kita madahka: “Seharitu tauka pagila, kami deka mupuk ngagai nengeri nya lalu diau ba dia setaun, ngambika bedagang sereta ngulihka duit,”
14 taja pan kebendar iya kita enda nemu utai ke deka nyadi ngagai pengidup kita pagila. Kita semina baka ambun ke ayan enda lama aja, lalu udah nya nadai agi.
15 Ari ke nyebut munyi nya, kita patut nyebut: “Enti Jehovah ngemendarka, kami deka idup lalu ngereja utai tu tauka utai nya.”
16 Tang diatu, kita nyau sumbung lalu bejaku begah pasal diri empu. Pengawa ke baka nya balat jai.
17 Nya alai, enti orang nemu baka ni ngereja utai ti betul, tang iya enda ngereja nya, iya bedosa.
Nota Kaki
^ Orang ti udah kawin ngereja ulah seks enggau orang ke ukai kaling pengidup iya. Tauka “kita ke enda tetap ati.”
^ Jaku Gerika, “pneu′ma.” Peda Penerang Leka Jaku, “Pneu′ma.”
^ Jaku Gerika, “di·a′bo·los.” Leka jaku tu dikena ba orang ke ngenyaika nama manah orang bukai.
