John 13:1-38
13 Sebedau Pengerami Paska, Jesus nemu maya udah datai alai iya deka ninggalka dunya tu lalu mupuk ngagai Apai. Jesus rinduka bala murid iya ba dunya, lalu iya rinduka sida datai ke ujung.
2 Maya nya, sida benung makai malam, lalu Sitan* udah nepu runding deka nyerahka Jesus ngagai munsuh dalam ati Judas Iskariot anak Simon.
3 Jesus nemu Apai udah nyerahka semua utai ngagai iya. Jesus mega nemu iya datai ari Petara lalu deka mupuk ngagai Petara.
4 Nya alai, lebuh sida benung makai, Jesus bediri lalu ngengkahka gari luar iya ke tisi. Udah nya, iya ngambi kain tula lalu nanchang tula nya ba punggung iya.
5 Iya nuang ai ke dalam bisin lalu belabuh masu kaki bala murid iya. Udah nya, iya ngendas kaki sida ngena kain tula ke udah ditanchang ba punggung iya.
6 Lebuh iya datai ngagai Simon Peter, Peter lalu bejaku: “Tuan, nuan deka masu kaki aku?”
7 Disaut Jesus: “Diatu nuan enda meretika utai ke dikereja aku. Tang ila, baru nuan nemu reti iya.”
8 Peter bejaku ngagai iya: “Aku enda sekali-kali ngelakka nuan masu kaki aku.” Jesus lalu nyaut iya: “Enti aku enda masu kaki nuan, nuan enda ulih enggau aku.”
9 Simon Peter pan lalu bejaku ngagai iya: “Tuan, enti pia, anang semina masu kaki aku. Basu mega jari enggau pala aku.”
10 Ku Jesus bejaku: “Barang sapa ke udah mandi, semina patut masu kaki iya laban semua tubuh iya udah beresi. Kita beresi, tang ukai semua kita beresi.”
11 Kebendar iya, Jesus nemu sapa ke deka nyerahka iya ngagai munsuh. Nya kebuah iya nyebut: “Ukai semua kita beresi.”
12 Pengudah Jesus masu kaki sida, iya masukka gari luar iya lalu duduk baru. Iya bejaku ngagai sida: “Kati kita meretika utai ke udah digaga aku ke kita?
13 Kita ngangauka aku ‘Pengajar’ enggau ‘Tuan.’ Amat utai ku kita nya laban aku endang Pengajar enggau Tuan kita.
14 Nya alai, enti aku ke nyadi Tuan enggau Pengajar kita udah masu kaki kita, kita mega patut* masu kaki pangan diri.
15 Laban aku udah netapka teladan* ke kita, kita mega patut ngereja utai ke udah dikereja aku ngagai kita.
16 Enggau bendar aku madah ngagai kita: Nadai ulun ke besai agi ari tuan iya, lalu orang ke dikirumka enda besai agi ari orang ke ngirumka iya.
17 Enti kita nemu utai tu, kita deka lantang ati enti kita ngereja nya.
18 Aku ukai bejaku pasal semua kita. Aku ngelala sapa ke udah dipilih aku. Tang utai tu nyadi kena ngamatka utai ke ditulis ba ayat Bup Kudus: ‘Orang ke makai roti aku udah ngangkatka tumbit iya kena ngelaban aku.’
19 Diatu aku deka madah ngagai kita pasal utai ke deka nyadi, ngambika lebuh utai nya nyadi kita deka arap, aku meh iya.
20 Enggau bendar aku madah ngagai kita: Barang sapa nerima orang ke dikirumka aku, nerima aku mega. Lalu barang sapa nerima aku, nerima mega Iya ke ngirumka aku.”
21 Pengudah bejaku munyi nya, ati Jesus balat tusah. Iya lalu terus terang bejaku: “Enggau bendar aku madah ngagai kita: Siku ari kita deka nyerahka aku ngagai munsuh.”
22 Bala murid iya lalu merening pangan diri, laban sida enda nemu sapa orang ke disebut iya nya.
23 Siku ari sida, iya nya murid ke dikesayauka Jesus, benung duduk ba sepiak Jesus.*
24 Simon Peter pan nganggukka pala iya ngagai murid nya lalu bejaku: “Padahka ngagai kami sapa ke disebut iya nya.”
25 Nya alai, murid nya nyandih ba Jesus lalu nanya: “Tuan, sapa orang nya?”
26 Disaut Jesus: “Orang ke diberi aku roti ke disepuh aku dalam mangkuk, iya meh orang nya.” Nya alai, Jesus nyepuhka roti dalam mangkuk lalu nyuaka roti nya ngagai Judas anak Simon Iskariot.
27 Pengudah Judas ngambi roti nya, Sitan nyungkak ati iya. Udah nya Jesus bejaku ngagai Judas: “Jampat kereja utai ke deka dikereja nuan.”
28 Tang nadai siku pan sida ke duduk ba dia nemu kebuah iya bejaku munyi nya ngagai Judas.
29 Ketegal Judas ke nyaga kutak duit, sekeda ari sida ngumbai Jesus ngasuh iya meli barang ke dikena sida maya pengerami nya tauka meri sedekah ngagai orang ke seranta.
30 Pengudah Judas ngambi roti nya, iya beguai pansut. Maya nya hari udah malam.
31 Lebuh Judas udah pansut, Jesus lalu bejaku: “Diatu Anak Mensia dimuliaka, lalu Petara pan dimuliaka nengah iya.
32 Petara Empu deka ngemuliaka iya lalu Petara deka ngemuliaka iya enggau jampat.
33 Bala anak, aku deka enggau kita enda lama aja. Kita deka ngiga aku, tang baka ke udah dipadah aku ngagai orang Judah, aku mega deka madah ngagai kita diatu, ‘Kita enda ulih datai ngagai endur ke dituju aku.’
34 Aku meri kita siti pesan ti baru: Kita patut rinduka pangan diri. Baka aku ke udah rinduka kita, kita mega patut rinduka pangan diri.
35 Enti kita rinduka pangan diri, semua orang deka nemu, kita meh murid aku.”
36 Simon Peter bejaku ngagai iya: “Tuan, kini ke nuan?” Ku Jesus nyaut: “Diatu nuan enda ulih nitihka aku ngagai endur ke deka dituju aku. Tang ila, baru nuan ulih nitihka aku.”
37 Peter bejaku ngagai iya: “Tuan, nama kebuah aku enda ulih nitihka nuan diatu? Aku sanggup nyerahka nyawa diri ke nuan.”
38 Disaut Jesus: “Kati nuan amat sanggup deka nyerahka nyawa diri ke aku? Enggau bendar aku madah ngagai nuan: Sebedau manuk engkukuk, nuan deka tiga kali madahka diri enda ngelala aku.”
Nota Kaki
^ Jaku Gerika, “di·a′bo·los.” Leka jaku tu dikena ba orang ke ngenyaika nama manah orang bukai.
^ Tauka “mesti.”
^ Jaku Asal, “corak.”
^ Tauka “duduk ba mua dada Jesus.”
