John 7:1-52
7 Udah nya, Jesus neruska pejalai iya ngagai endur bukai ba sebelah Galili. Iya enggai ngagai Judea, laban orang Judah benung ngiga chara kena munuh iya.
2 Tang Pengerami Belangkau orang Judah nyau semak.
3 Nya alai, bala menyadi lelaki iya bejaku ngagai iya: “Mupuk nuan ari tu ngagai Judea, ngambika bala murid nuan mega ulih meda utai ke digaga nuan.
4 Laban nadai orang ngelalaika pengawa diri, enti iya deka diri ditemu orang mayuh. Ketegal nuan ngereja semua utai nya, pandangka diri ngagai dunya.”
5 Kebendar iya, bala menyadi lelaki iya enda arapka iya.
6 Nya alai, Jesus bejaku ngagai sida: “Maya aku bedau datai, tang kita barang maya pan ulih kin.
7 Dunya nadai kebuah deka begedika kita. Tang dunya begedika aku, laban aku meri saksi ke nunjukka pengawa dunya tu jai.
8 Mupuk meh kita ngagai pengerami nya. Aku bedau mupuk diatu, laban maya aku bedau datai.”
9 Pengudah iya madahka sida pasal utai tu, iya agi diau ba Galili.
10 Tang pengudah bala menyadi lelaki iya mupuk ngagai pengerami nya, iya mega mupuk kin, tang enggau chara belalai.
11 Nya alai, orang Judah berengkah begigaka iya ba pengerami nya, lalu madahka: “Ni orang nya?”
12 Orang mayuh betelai enggau pangan diri pasal iya. Bisi sekeda madahka: “Iya orang ti manah.” Sida ke bukai madahka: “Ukai. Iya nesatka orang mayuh.”
13 Tang nadai siku pan ke berani bejaku pasal iya enggau inggar, laban sida takutka orang Judah.
14 Kira-kira ba hari keempat pengerami nya, Jesus tama ngagai Rumah Sembiang lalu berengkah ngajar.
15 Orang Judah alit ati lalu madahka: “Iya nadai kala ngagai sekula jalai pengarap. Nyadi baka ni ku iya tau bisi mayuh penemu pasal Bup Kudus?”
16 Ku Jesus nyaut sida: “Utai ke diajar aku ukai datai ari aku, tang ari Iya ke ngirumka aku.
17 Barang sapa ke ingin deka ngereja peneka Petara, tentu deka nemu sekalika utai ke diajar aku nya datai ari Petara tauka ari aku empu.
18 Barang sapa ke bejaku nitihka penemu diri, deka ngiga mulia ke diri empu. Tang barang sapa ke deka ngemuliaka orang ke ngirumka iya, iya orang ti lurus sereta nadai pemula.
19 Endaka Moses udah meri kita Adat? Tang nadai siku pan ari kita ke nitihka Adat nya. Nya alai, nama kebuah kita deka munuh aku?”
20 Orang mayuh lalu nyaut: “Nuan dirasuk melikat ti jai. Sapa ke deka munuh nuan?”
21 Ku Jesus nyaut sida: “Aku semina ngereja siti aja pekara, lalu semua kita tekenyit.
22 Uji perundingka: Moses udah meri kita Adat pasal besunat.* Nya alai, maya Hari Sabat, kita pan nyunat sida ke lelaki. Kebendar iya, Adat nya enda datai ari Moses, tang ari aki ini iya.
23 Nyadi, enti orang disunat maya Hari Sabat ngambika enda ngelanggar Adat Moses, nama kebuah kita balat ringat ngagai aku laban aku ngasuh orang nyadi amat-amat gerai maya Hari Sabat?
24 Badu agi ngakim beduduk ba utai ke dipeda, tang akim meh orang enggau lurus.”
25 Udah nya, sekeda orang ke diau ba Jerusalem bejaku: “Endaka iya tu orang ke deka dibunuh sida?
26 Peda! Iya benung bejaku ba mua orang mayuh, tang sida nadai nyebut nama-nama ngagai iya. Kada enda bala ketuai kitai udah nemu iya endang Kristus?
27 Kitai nemu ari ni penatai orang tu. Tang lebuh Kristus datai, nadai orang nemu ari ni penatai iya.”
28 Maya nya, Jesus benung ngajar ba Rumah Sembiang. Ku iya bejaku enggau nyawa ti inggar: “Kita ngelala aku, lalu nemu ari ni penatai aku. Aku enda datai nitihka peneka aku empu. Iya ke ngirumka aku amat bisi, tang kita enda ngelala Iya.
29 Aku ngelala Iya, laban aku pengari Iya, lalu Iya meh ke ngirumka aku.”
30 Nya alai, sida lalu ngiga peluang kena nangkap Jesus, tang nadai orang ulih nangkap iya, laban maya iya bedau datai.
31 Taja pia, mayuh orang agi arapka iya. Ku sida bejaku: “Lebuh Kristus datai, ulih iya ngaga mayuh agi kereja ajih ari orang tu?”
32 Orang Parisi ninga orang mayuh betelai pasal Jesus. Nya alai, bala ketuai imam enggau orang Parisi ngasuh bala jejaga nangkap Jesus.
33 Tang ku Jesus bejaku: “Aku deka enggau kita enda lama aja sebedau aku mupuk ngagai Iya ke ngirumka aku.
34 Kita deka ngiga aku tang enda ulih tetemuka aku, lalu kita enda ulih datai ngagai endur ke dituju aku.”
35 Nya alai, orang Judah bejaku enggau pangan diri: “Kini ke tunga orang tu deka mupuk, nyentukka kitai enda ulih tetemuka iya? Kati iya deka mupuk ngagai orang Judah ke diau begulai enggau orang Gerika, lalu ngajar mega orang Gerika?
36 Nama reti utai ku iya lebuh iya madahka, ‘Kita deka ngiga aku tang enda ulih tetemuka aku, lalu kita enda ulih datai ngagai endur ke dituju aku’?”
37 Ba hari ke penudi pengerami nya, iya nya hari ke pemadu besai reti, Jesus bediri lalu ngangau enggau nyawa ti inggar: “Enti bisi orang ke aus, awakka iya datai ngagai aku lalu ngirup.
38 Barang sapa arapka aku, baka ke udah dipadahka Bup Kudus, ai ti meri pengidup deka pansut enggau mayuh ari ati iya.”
39 Kebendar nya, Jesus benung bejaku pasal kuasa kudus Petara ke deka diterima orang ke arapka iya. Maya nya, sida bedau nerima kuasa kudus Petara, laban Jesus bedau dimuliaka.
40 Nya alai, sekeda orang ari bala orang mayuh ke ninga jaku Jesus nya lalu bejaku: “Iya endang Nabi nya!”
41 Sekeda ke bukai madahka: “Iya tu meh Kristus!” Tang bisi mega ke madahka: “Enda patut Kristus datai ari Galili neh?
42 Endaka Bup Kudus madahka Kristus deka datai ari peturun David sereta datai ari Betlehem, menua asal David?”
43 Nya alai, orang mayuh enda sama penemu pasal iya.
44 Sekeda orang deka nangkap iya, tang nadai siku pan ke ulih ngereja nya.
45 Lebuh bala jejaga pulai, bala ketuai imam enggau orang Parisi nanya sida: “Nama kebuah kita enda nangkap lalu mai iya kitu?”
46 Ku bala jejaga nyaut: “Nadai kala orang udah bejaku baka iya.”
47 Orang Parisi lalu nanya: “Kati semua kita mega udah ditesatka iya?
48 Nadai siku pan bala ketuai tauka orang Parisi ke arapka iya, enda pia?
49 Tang Petara enda lantang ati enggau orang mayuh tu ke enda nemu pasal Adat.”
50 Nikodimus, siku ari orang Parisi, ke kala datai ngagai Jesus, lalu bejaku ngagai sida:
51 “Endaka Adat ngasuh kitai mendingka jaku orang dulu sereta nemu utai ke digaga iya sebedau kitai ngakim iya?”
52 Sida lalu nyaut iya: “Kati nuan mega datai ari Galili? Pansik Bup Kudus, lalu nuan deka nemu, nadai nabi ke deka datai ari Galili.”*
Nota Kaki
^ Tauka “betutus.”
^ Ayat ari bagi 7 ayat 53 ngagai 8 ayat 11 nadai ba dalam sekeda manuskrip ke lama ke tau dikearapka.
