Jonah 1:1-17
1 Ku Jehovah madah ngagai Jonah* anak Amitai:
2 “Nuan patut mupuk ngagai Nineweh, kuta ti besai nya. Padah ngagai orang ke diau ba dia, Aku deka ngukum sida laban Aku udah meda penyai sida.”
3 Tang, Jonah ngerarika diri ari Jehovah lalu mutuska deka ngagai Tarsis. Iya mupuk ngagai Jopa, lalu tetemuka siti kapal ke deka belayar ngagai Tarsis. Pengudah mayar tambang, iya pan nepan kapal nya enggau bala kelasi belayar ngagai Tarsis, ngambika iya ulih ngerarika diri ari Jehovah.
4 Udah nya, Jehovah ngasuh ribut ti balat mangka tasik lalu kabut ti balat pan nyadi, nyentukka kapal nya nyauka karam.
5 Bala kelasi balat amat takut. Tiap iku sida ngangauka petara sida empu minta tulung. Udah nya, sida muai barang ari kapal ngagai tasik, ngambika kapal sida lempung agi. Tang, Jonah udah nurun ngagai begian kapal ke ba baruh sekali. Ba dia meh iya gali lalu tinduk jenak.
6 Kapten kapal pan mansang ngagai Jonah lalu madah ngagai iya: “Nama kebuah nuan tinduk? Angkat! Kangauka Petara nuan. Ni nemu Petara ti bendar deka kasihka kitai, lalu enda nejuka kitai mati.”
7 Udah nya, sida bejaku enggau pangan diri: “Aram kitai bechabut undi kena nemu sapa ke ngasuh kitai ditinggang penusah tu.” Nyadi, sida pan bechabut undi, lalu undi nya nunjukka Jonah ke ngasuh penusah nya nyadi.
8 Ku sida nanya Jonah: “Padah ngagai kami, amat nuan ke ngasuh penusah tu nyadi ngagai kitai? Nama pengawa nuan? Ari ni nuan? Ni menua nuan? Nama bansa nuan?”
9 Ku Jonah nyaut: “Aku orang Hebrew. Aku nangika* Jehovah, Petara ke merintah serega. Iya meh ke ngaga tasik enggau darat.”
10 Sida pan balat agi takut pengudah Jonah madahka iya ngerarika diri ari Jehovah. Ku sida madah ngagai Jonah: “Nama kebuah nuan ngereja nya?”
11 Ketegal umbak majak besai, sida pan nanya Jonah: “Nama patut digaga kami ngagai nuan ngambika tasik tu teduh?”
12 Ku Jonah nyaut: “Buai aku ngagai tasik, lalu tasik deka teduh. Ketegal aku meh kabut ti balat tu mangka kita.”
13 Tang, bala kelasi nguji mai kapal nya ke tebing. Sida bebendar bedayung, tang sida enda ulih, laban umbak majak besai lalu kabut pan majak balat.
14 Udah nya, sida ngangauka Jehovah lalu madahka: “O Jehovah, anang nejuka kami mati ketegal lelaki tu. Anang ngasuh kami betanggungjawap ketegal munuh orang ke nadai penyalah, laban tu sejalai enggau peneka Nuan, O Jehovah.”
15 Sida pan nanggung Jonah lalu nikauka iya ke tasik. Tasik nya lalu teduh.
16 Udah nya, bala kelasi nya balat nangika Jehovah. Sida nyerahka pemeri ngagai Jehovah, lalu besumpah ngagai Iya.
17 Jehovah ngasuh siku ikan ti besai nelan Jonah. Nyadi, Jonah ba dalam perut ikan nya pengelama tiga hari tiga malam.
