Jonah 2:1-10
2 Dalam perut ikan nya, Jonah besampi ngagai Petara iya, Jehovah.
2 Ku iya madahka:
“O Jehovah, lebuh aku tusah aku ngangauka Nuan, lalu Nuan nyaut aku.
Ari Kubur* ti dalam, aku ngangau minta tulung.
Nuan ningaka sada nyawa aku.
3 Lebuh Nuan nikauka aku ngagai endur ti dalam, jauh ke dalam tengah tasik,Aku tengelam dikelingi ai.
Semua gelumbang Nuan ngelamun aku.
4 Ku aku madahka: ‘Nuan udah muru aku lalu Nuan nadai meda aku agi!
Agi ulih kini aku meda Rumah Sembiang Nuan ti kudus?’
5 Ai ngelamun aku lalu nyau deka nabanka nyawa aku;Aku tengelam jauh ke dalam ai.
Rumpai dalam tasik nyau melit pala aku.
6 Aku tengelam jauh ngagai tanah ba baruh tasik.*
Pintu dunya ditutup lalu aku dikurung belama iya.
Tang ari lubang ti dalam, Nuan udah mansutka aku, O Jehovah, Petara aku.
7 Lebuh seput aku nyauka padam, aku ingatka Nuan, Jehovah.
Sampi aku datai ba Nuan, datai ba Rumah Sembiang Nuan ti kudus.
8 Orang ke nyembah patung ti nadai guna ninggalka Nuan ke ngayanka pengerindu ti setia.*
9 Tang, aku deka meri puji lalu nyerahka pemeri ngagai Nuan.
Aku deka ngamatka semua semaya aku ngagai Nuan.
O Jehovah, Nuan meh Penyelamat aku.”
10 Pengujung iya, Jehovah ngasuh ikan nya ngeluaka Jonah ba tebing tasik.
Nota Kaki
^ Tauka “Sheol,” iya nya pendam ke mensia. Peda Penerang Leka Jaku.
^ Jaku Asal, “gunung-gunung.”
^ Tauka engka, “Orang ke nyembah patung ti nadai guna enda setia ngagai Nuan.”