Jonah 3:1-10
3 Ku Jehovah bejaku ngagai Jonah baru:
2 “Nuan patut mupuk ngagai Nineweh, kuta ti besai nya. Padah ngagai orang ke diau ba dia pesan ke dipadahka Aku ngagai nuan.”
3 Jonah ngasika jaku Jehovah, lalu iya mupuk ngagai Nineweh. Nineweh kuta ti amat besai.* Bejalai ngelingi kuta nya begunaka tiga hari.
4 Udah nya, Jonah tama ngagai kuta nya, lalu bejalai sepemanjai hari sambil madahka pesan tu: “Dalam 40 hari da agi, Nineweh deka dianchurka.”
5 Orang Nineweh pan arapka Petara. Sida madahka diri deka bepuasa, lalu sida ngerasukka kain guni. Semua sida ngereja nya, enda ngira orang ke tinggi pangkat tauka orang biasa.
6 Lebuh raja Nineweh ninga pesan nya, iya angkat ari kerusi diraja lalu muka gari diraja iya. Udah nya, iya ngerasukka kain guni lalu duduk ba amau.
7 Raja mega madahka pesan tu ngagai serata Nineweh:“Tu pesan raja enggau bala pegawai iya: Nadai mensia tauka jelu tau makai utai. Sida enda tau makai tauka ngirup nama-nama utai.
8 Semua mensia enggau jelu mesti ngena kain guni. Semua orang mesti bebendar ngangauka Petara, lalu badu agi ngereja pengawa ti jai sereta ganas.
9 Ni nemu, Petara ti bendar deka ngubah runding Diri lalu badu agi ringat, ngambika kitai enda mati.”
10 Petara ti bendar meda utai ke udah digaga sida. Iya meda sida ninggalka pengawa sida ti jai. Nya alai, Iya ngubah pemutus Iya lalu enda nyadi ngukum sida.
Nota Kaki
^ Jaku Asal, “kuta ti besai ba Petara.”
