Jonah 4:1-11
4 Tang, Jonah amat enda rindu meda nya, lalu iya balat amat ringat.
2 Udah nya, iya besampi ngagai Jehovah: “O Jehovah, lebuh aku ba menua aku empu, aku sigi udah nemu utai tu deka nyadi. Nya meh kebuah aku rari ngagai Tarsis, laban aku nemu Nuan Petara ti pengasih sereta siru, lalu Nuan lubah ringat sereta ngayanka pengerindu ti setia enggau belimpah. Nuan mega enda rindu ngukum orang.
3 Nya alai, Jehovah, ambi meh nyawa aku. Manah agi aku mati ari ke terus idup.”
4 Ku Jehovah nanya: “Patut nuan ringat baka nya?”
5 Jonah pan pansut ari kuta nya, lalu mansang ngagai begian timur kuta nya. Iya ngaga siti langkau lalu belindung ba dia, laban iya deka meda nama utai ke deka nyadi ngagai kuta nya.
6 Udah nya, Petara Jehovah ngasuh pun buah labu* tumbuh, ngambika pun labu nya ngelindung Jonah lalu ngasuh iya berasai nyamai agi. Jonah berasai amat gaga ati meda pun buah labu nya.
7 Tang ba hari siti, lebuh hari nyau tawas, Petara ti bendar ngasuh siku ulat nyerang pun buah labu nya, lalu pun nya layu.
8 Lebuh mata panas niki, Petara ngasuh ribut ti amat angat muput ari timur. Maya nya, mata panas manchar ngagai Jonah nyentukka iya nyauka luput. Iya majak madahka diri deka mati. Ku iya madah: “Manah agi aku mati ari ke terus idup!”
9 Ku Petara nanya Jonah: “Patut nuan ringat baka nya ketegal pun buah labu nya?”
Ku Jonah nyaut: “Aku sigi patut ringat. Ringat amat aku, nyentukka aku asai ka mati!”
10 Tang, ku Jehovah madah: “Pun buah labu nya tumbuh semalam, lalu mati maya malam hari siti. Tang nuan kasihka pun labu nya, taja pan nuan enda nanam iya tauka ngasuh iya tumbuh.
11 Enda ka Aku mega patut kasihka Nineweh, kuta ti besai nya? Ba kuta nya bisi mayuh amat jelu, lalu bisi lebih ari 120,000 iku orang ke enda nemu utai ti betul enggau utai ti salah.”*
Nota Kaki
^ Tauka engka, “pun jarak.”
^ Jaku Asal, “ke langsung enda nemu bida entara jari kanan enggau jari kiba sida.”
