Josua 10:1-43
10 Raja Adonisedek ke merintah Jerusalem bisi ninga pasal Josua ke udah nguasa kuta Eyai, lalu nganchurka kuta nya sereta munuh raja Eyai, baka ke udah digaga iya ngagai kuta Jeriko enggau raja Jeriko. Iya mega bisi ninga pasal orang Gibeon ke bebaik enggau orang Israel lalu diau begulai enggau sida.
2 Nya alai iya balat amat takut, laban kuta Gibeon siti kuta ti besai, baka kuta bukai ke diperintah raja. Kuta Gibeon besai agi ari kuta Eyai, lalu semua orang lelaki ba dia nemu belaban magang.
3 Nya alai, Raja Adonisedek ari Jerusalem nganjung pesan ngagai Raja Hoham ke merintah Hebron, Raja Piram ke merintah Jarmut, Raja Japia ke merintah Lakis, enggau Raja Debir ke merintah Eglon:
4 “Tulung aku, lalu aram meh kitai nyerang Gibeon laban sida udah bebaik enggau Josua sereta orang Israel.”
5 Nyadi, lima iku raja orang Amor nya, iya nya raja Jerusalem, raja Hebron, raja Jarmut, raja Lakis, enggau raja Eglon bepakat enggau pangan diri lalu mansang enggau bala soldadu sida ngagai Gibeon. Sida ngelingi kuta nya lalu besedia deka nyerang.
6 Udah nya, orang Gibeon ngirumka pesan ngagai Josua ke diau ba kem, ba Gilgal: “Anang ninggalka kami ke nyadi ulun nuan. Datai jampat! Selamatka kami, lalu tulung kami! Semua raja orang Amor ari kawasan gunung udah bepakat deka nyerang kami.”
7 Nyadi, Josua enggau semua bala soldadu sereta sida ke kering belaban lalu mupuk ari Gilgal.
8 Udah nya, Jehovah madah ngagai Josua: “Anang takut ke sida, laban Aku udah nyerahka sida ngagai nuan. Nadai siku pan ari sida ke ulih ngalahka nuan.”
9 Pengudah bejalai semalam-malam ari Gilgal, Josua lalu nyerang orang Amor enggau ngenyit.
10 Jehovah lalu ngasuh orang Amor nya nyadi charut. Lebuh orang Israel meda nya, sida pan lalu munuh mayuh orang Amor ba Gibeon. Orang Israel mega ngagai lalu munuh sida ba jalai ke niki ngagai Bet-horon, nyentuk ngagai Asekah enggau Makedah.
11 Lebuh sida ngerarika diri ari orang Israel nengah jalai ke nurun ari Bet-horon, Jehovah ngasuh ujan batu ninggang sida. Ketegal ujan batu nya, sida mati ba sepemanjai jalai nya nyentuk ngagai Asekah. Kebendar iya, mayuh agi sida ke mati ditinggang ujan batu nya ari ke mati dibunuh orang Israel ngena pedang.
12 Maya nya, ba hari Jehovah nyerahka orang Amor ngagai orang Israel, Josua bejaku ngagai Jehovah ba depan orang Israel:
“Mata panas, anang nginsit ari Gibeon!Bulan, anang mindah ari Lebak Aijalon!”
13 Nya alai, mata panas enggau bulan enda nginsit sampai orang Israel ngalahka munsuh sida. Tu bisi ditulis ba bup Jasar. Mata panas ke ba tengah-tengah langit nya enda nginsit lalu enda padam pengelama kira-kira sehari penuh.
14 Utai ke nyadi ba hari nya nadai kala nyadi. Sebedau nya nadai, pengudah nya pan nadai. Jehovah enda kala nitihka utai ke dipinta mensia baka nya. Sehari nya, Jehovah beperang ngarika orang Israel.
15 Udah nya, Josua enggau semua soldadu Israel pulai ngagai kem sida ba Gilgal.
16 Tang, lima iku raja orang Amor nya ngerarika diri lalu belalai ba gua, ba Makedah.
17 Udah nya, bisi orang madah ngagai Josua: “Lima iku raja nya udah ditemu. Sida belalai ba gua, ba Makedah.”
18 Josua lalu bejaku: “Tutup penama gua nya ngena batu besai, lalu asuh orang bejaga ba dia.
19 Tang, kita ke bukai anang ngetu ngagai munsuh kita, lalu nyerang sida ari belakang. Anang nejuka sida tama ngagai kuta sida, laban Petara kita, Jehovah, udah nyerahka sida ngagai kita.”
20 Josua enggau soldadu Israel munuh mayuh bala munsuh sida iya nyentukka nyauka semua munsuh mati. Semina sekeda aja ke mujur ngerarika diri ngagai kuta ti besai ke dikelingi dinding ti teguh.
21 Udah nya, semua soldadu pulai enggau selamat ngagai Josua ba kem sida, ba Makedah. Nadai siku pan orang ba menua nya ke berani bejaku ngelaban orang Israel.
22 Josua lalu bejaku: “Buka penama gua nya, lalu bai lima iku raja nya ngagai aku kitu.”
23 Nyadi, lima iku raja nya, iya nya raja Jerusalem, raja Hebron, raja Jarmut, raja Lakis, enggau raja Eglon dibai pansut ari gua nya ngagai Josua.
24 Pengudah bala raja nya dibai ngagai Josua, Josua pan ngangauka semua soldadu Israel. Udah nya, iya madah ngagai bala ketuai soldadu ke enggau iya beperang: “Kitu kita, lalu indik pegu* bala raja tu.” Sida pan mansang lalu ngereja utai ke diasuh Josua.
25 Ku Josua madah ngagai sida: “Anang takut tauka rawan. Nyadi meh berani sereta kuat, laban tu meh utai ke deka digaga Jehovah ngagai semua bala munsuh kita ke beperang ngelaban kita.”
26 Udah nya, Josua lalu munuh bala raja nya, lalu ngantung bangkai sida ba lima iti tiang.* Sida nejuka bangkai nya digantung ba tiang sampai lemai.
27 Maya mata panas padam, Josua ngasuh orang nurunka bangkai sida ari tiang nya, lalu muai bangkai nya ngagai gua ke udah nyadi endur bala raja nya belalai. Udah nya, penama gua nya ditutup ngena batu ti besai. Batu nya bisi ba dia sampai seharitu.
28 Ba hari nya, Josua ulih nguasa kuta Makedah, lalu munuh semua orang ba dia ngena pedang. Nadai siku pan ke ditejuka idup. Iya munuh raja Makedah, baka iya ke udah munuh raja Jeriko.
29 Udah nya, Josua enggau semua soldadu Israel mupuk ari Makedah. Sida mansang ngagai Libnah lalu nyerang kuta Libnah.
30 Jehovah mega nyerahka kuta nya enggau raja iya ngagai orang Israel. Sida munuh semua orang ke bisi ba dia ngena pedang. Nadai siku pan ditejuka idup. Sida munuh raja kuta nya, baka sida ke udah munuh raja kuta Jeriko.
31 Udah nya, Josua enggau semua soldadu Israel mupuk ari Libnah ngagai Lakis. Sida nirika kem ba dia lalu nyerang kuta nya.
32 Jehovah nyerahka Lakis ngagai orang Israel, lalu sida mujur nguasa kuta nya ba hari ti kedua. Sida nyerang kuta nya lalu munuh semua orang ba dia ngena pedang, baka ke udah digaga sida ba Libnah.
33 Udah nya, Raja Horam ke merintah Geser datai deka nulung Lakis. Tang Josua munuh iya enggau bala soldadu iya. Nadai siku pan sida selamat.
34 Udah nya, Josua enggau semua soldadu Israel mupuk ari Lakis ngagai Eglon. Sida nirika kem ba dia, lalu nyerang kuta nya.
35 Ba hari nya, sida ulih nguasa kuta nya lalu munuh orang ba dia ngena pedang. Nadai siku pan ke enda dibunuh sida maya nya, baka ke udah digaga sida ba Lakis.
36 Udah nya, Josua enggau semua soldadu Israel mupuk ari Eglon ngagai Hebron, lalu sida nyerang kuta nya.
37 Sida mujur nguasa kuta nya enggau semua kuta mit ke ngelingi kuta nya. Raja iya enggau orang ba dia dibunuh sida ngena pedang. Nadai siku pan ditejuka idup. Josua nganchurka kuta nya, lalu munuh semua orang ba dia, baka ke udah digaga iya ba Eglon.
38 Kepenudi sekali, Josua enggau semua soldadu Israel mansang ngagai Debir lalu nyerang kuta nya.
39 Iya mujur nguasa kuta nya enggau semua kuta mit ke ngelingi kuta nya. Raja iya enggau semua orang ba dia dibunuh sida ngena pedang. Nadai siku pan ke ditejuka idup. Josua nganchurka kuta Debir lalu munuh raja iya, baka ke udah digaga iya ngagai kuta Hebron, kuta Libnah, enggau raja Libnah.
40 Josua udah nguasa semua menua ba kawasan gunung, ba Negeb, ba Shefilah, enggau ba lereng gunung. Semua raja ba dia dialahka iya magang. Nadai siku pan ke ditejuka idup. Iya munuh semua orang ke bisi ba dia, baka ke udah diasuh Jehovah, Petara orang Israel.
41 Josua udah nguasa semua endur ba Kades-barnea nyentuk ngagai Gaza, sereta semua endur ba Gosen nyentuk ngagai Gibeon.
42 Dalam timpuh ti sama, Josua ngalahka semua raja ba dia lalu mujur nguasa menua sida. Tu ketegal Jehovah, Petara orang Israel, belaban ngarika sida.
43 Udah nya, Josua enggau semua soldadu Israel pulai ngagai kem sida ba Gilgal.
