Josua 11:1-23
11 Pengudah Raja Jabin ke merintah Hasor ninga pasal utai ke udah nyadi, iya ngirumka pesan ngagai Raja Jobap ke merintah Madon. Iya mega ngirumka pesan ngagai raja ke merintah Simron, raja ke merintah Aksap,
2 bala raja ke ba kawasan gunung di utara, bala raja ke ba menua puang* di selatan Danau Chineret, sereta bala raja ba Shefilah enggau ba kawasan lereng bukit Dor ba sepiak barat.
3 Iya mega ngirumka pesan ngagai orang Kanaan ke ba sepiak timur enggau sepiak barat, orang Amor, orang Het, orang Peris, orang Jebus ke ba kawasan gunung, enggau orang Ibi ke ba kaki Gunung Hermon ba Mispah.
4 Bala raja nya pan mupuk enggau semua bala soldadu sida. Penyampau sida kelalu mayuh, baka pasir ke ba tebing tasik. Sida mega mai mayuh amat kuda enggau kerita kuda.
5 Semua raja nya besetuju deka betemu enggau pangan diri. Sida nirika kem sida ba Pun Penatai Ai Merom, laban deka nyerang orang Israel.
6 Ku Jehovah bejaku ngagai Josua: “Anang takutka sida, laban ba urung maya tu pagila, Aku deka ngasuh semua sida dibunuh orang Israel. Nuan mesti netak urat kaki kuda sida, lalu nunu kerita kuda sida.”
7 Nyadi, Josua enggau semua bala soldadu iya nyerang sida enggau ngenyit ba Pun Penatai Ai Merom.
8 Jehovah nyerahka sida ngagai orang Israel. Orang Israel ngagai sida nyentukka Sidon ti Besai, Misrepot-maim, enggau Lebak Mispeh ba sepiak timur. Sida alah lalu dibunuh orang Israel. Nadai siku pan sida selamat.
9 Josua lalu ngereja utai ke diasuh Jehovah. Iya netak urat kaki kuda sida, lalu nunu kerita kuda sida.
10 Udah nya, Josua pulai baru ngagai kuta Hasor. Iya mujur nguasa kuta nya lalu munuh raja kuta nya ngena pedang, laban kuta nya kala nyadi perintah ti pemadu bekuasa entara semua perintah ke bukai nya.
11 Semua orang ke ba kuta nya dibunuh ngena pedang. Nadai siku pan ditejuka idup. Udah nya, Josua nunu kuta Hasor.
12 Josua mujur nguasa semua kuta ke diperintah bala raja nya, lalu munuh semua raja nya ngena pedang. Iya munuh semua orang, baka ke diasuh nembiak Jehovah, Moses.
13 Orang Israel enda nunu semua kuta ke bisi ba kawasan bukit. Semina kuta Hasor aja ke ditunu Josua.
14 Orang Israel ngambi semua utai enggau jelu tupi ke bisi ba kuta-kuta nya. Tiap iku orang dibunuh sida ngena pedang magang, lalu nadai siku pan ditejuka idup.
15 Semua utai ke dipadahka Jehovah ngagai nembiak Iya, Moses, dipadahka Moses ngagai Josua, lalu Josua ngereja semua utai ke dipadahka ngagai iya. Nadai siti pan pesan ke dipadahka Jehovah ngagai Moses ke enda dikereja Josua.
16 Josua udah nguasa semua menua nya, iya nya kawasan gunung, serata kawasan Negeb, serata menua Gosen, Shefilah, Arabah, kawasan gunung Israel enggau kaki gunung,
17 berengkah ari Gunung Halak ke semak enggau Seir, nyentuk ngagai Baal-gat ke bisi ba Lebak Lebanon ba kaki Gunung Hermon. Iya nangkap semua raja ba dia, ngalahka sida, lalu munuh sida.
18 Lama diri Josua beperang ngelaban semua raja nya.
19 Nadai kuta bukai ke bebaik enggau orang Israel. Semina orang Ibi ke diau ba Gibeon aja ke bebaik enggau sida. Semua kuta bukai alah magang beperang ngelaban orang Israel.
20 Jehovah nejuka ati sida degil, ngambika sida beperang ngelaban orang Israel, lalu dibunuh enggau chara ti nadai pengasih. Sida dipunaska magang, baka ke udah dipadahka Jehovah ngagai Moses.
21 Ba maya nya, Josua munaska orang Enakim ba kawasan gunung, iya nya ba Hebron, Debir, Anap, ba serata kawasan gunung Judah, enggau ba serata kawasan gunung Israel. Josua munuh sida, lalu nganchurka kuta sida.
22 Nadai agi orang Enakim ba menua orang Israel. Sida semina bisi ba Gaza, ba Gat, enggau Asdod.
23 Baka nya meh chara Josua udah nguasa serata menua nya, baka ke udah disemayaka Jehovah ngagai Moses. Josua magi menua nya nitihka raban bansa orang Israel, lalu meri menua nya nyadika pesaka sida. Udah nya, nadai agi perang ke nyadi ba menua nya.
Nota Kaki
^ Tauka “Arabah.”
