Josua 13:1-33
13 Josua udah tuai lalu pengidup iya nyauka datai ba pengujung. Nyadi, Jehovah madah ngagai iya: “Nuan nyau udah tuai lalu nuan nadai mayuh masa agi. Tang bisi mayuh agi endur ke mesti dikuasa.
2 Tu meh endur ke agi tinggal: Semua kawasan orang Pilistin enggau semua kawasan orang Gesur
3 (ari cabang Sungai Nil* ba sepiak timur Ejip nyentuk ngagai sempadan Ekron ba utara, lalu endur nya kala dikumbai endur orang Kanaan), nyengkaum kawasan ke dipegai lima iku pemerintah orang Pilistin, iya nya menua orang Gaza, orang Asdod, orang Askelon, orang Gat, enggau orang Ekron; orang Abim
4 ba selatan; semua menua Kanaan; kawasan Mearah ke diempu orang Sidon, nyentuk ngagai Afek ba sempadan orang Amor;
5 menua orang Gebal enggau semua menua Lebanon ba sepiak timur, ari Baal-gat ba kaki Gunung Hermon nyentuk ngagai Lebo-hamat;*
6 semua kawasan gunung ari Lebanon nyentuk ngagai Misrepot-maim; enggau semua menua orang Sidon. Ba depan orang Israel, Aku deka muru bala orang nya. Nuan semina patut magi endur nya, lalu meri iya ngagai orang Israel nyadika pesaka sida, baka ke udah dipadah Aku ngagai nuan.
7 Diatu, nuan mesti magi menua tu lalu meri iya nyadika pesaka ngagai semilan iti raban bansa ke bukai enggau setengah ari raban bansa Manasi.”
8 Setengah ari raban bansa Manasi ke bukai, raban bansa Reuben, enggau raban bansa Gat udah bulih pesaka sida, ke diberi Moses ngagai sida ba sepiak timur Sungai Jordan. Tu meh endur ke diberi nembiak Jehovah, Moses, ngagai sida:
9 Ari kuta Aroer ke bisi ba tisi Lebak Arnon, enggau kuta ke bisi ba tengah-tengah lebak nya, sereta semua kawasan tanah tinggi ti rata ba Medeba nyentuk ngagai Dibon;
10 semua kuta Raja Sihon, iya nya raja orang Amor ke merintah ba Hesbon, nyentuk ngagai sempadan orang Amon;
11 menua Gilead, menua orang Gesur enggau orang Maakah, serata Gunung Hermon, enggau serata menua Basan nyentuk ngagai Salekah;
12 semua endur ke ba baruh perintah Raja Og ba Basan, ke merintah ba Astarot enggau Edrei. (Iya siku ari peturun Repaim kepenudi.) Moses udah ngalahka lalu muru semua sida.
13 Tang orang Israel enda muru orang Gesur enggau orang Maakah. Sampai seharitu, sida agi diau ba entara bala orang Israel.
14 Semina raban bansa Lewi aja enda nerima pesaka ari Moses. Baka ke udah disemayaka Petara ngagai sida, pemeri ti ditunu ke diberi ngagai Jehovah, Petara orang Israel, deka nyadi pesaka sida.
15 Udah nya, Moses meri pesaka ngagai raban bansa Reuben, nitihka suku raban bansa sida.
16 Endur ke diterima sida berengkah ari kuta Aroer ke bisi ba tisi Lebak Arnon, enggau kuta ke bisi ba tengah-tengah lebak nya, sereta semua kawasan tanah tinggi ti rata ba Medeba;
17 Hesbon enggau semua kuta mit ba kawasan tanah tinggi ti rata, Dibon, Bamot-baal, Bet-baal-meon,
18 Jahas, Kedemot, Mepaat,
19 Kiriataim, Sibmah, Zeret-sahar ba atas gunung ba kawasan lebak,
20 Bet-peor, lereng Gunung Pisgah, Bet-jesimot,
21 semua kuta ba kawasan tanah tinggi ti rata, enggau semua endur ba baruh perintah Raja Sihon, iya nya raja orang Amor ke merintah ba Hesbon. Moses ngalahka Raja Sihon enggau bala ketuai orang Midian, iya nya Ebi, Rekem, Zur, Hur, enggau Reba. Semua sida diau ba menua nya, lalu merintah ba baruh kuasa Raja Sihon.
22 Siku ari orang ke dibunuh orang Israel ngena pedang nya Balam anak Beor ke nemu betilit nasit.*
23 Sungai Jordan nyadi sempadan menua raban bansa Reuben. Semua endur nya, nyengkaum kampung enggau kuta ba dia, diberi nyadika pesaka raban bansa Reuben, nitihka suku raban bansa sida.
24 Moses mega meri pesaka ngagai raban bansa Gat, nitihka suku raban bansa sida.
25 Menua ke diterima sida nyengkaum Jaser, semua kuta ba Gilead, enggau setengah ari menua orang Amon nyentuk ngagai Aroer tunga ngagai Rabah;
26 ari Hesbon nyentuk ngagai Ramat-mispeh enggau Betonim, ari Mahanaim nyentuk ngagai sempadan Debir;
27 enggau semua endur ke bukai ke ba baruh perintah Raja Sihon ari Hesbon ke bisi ba kawasan lebak, iya nya Bet-haram, Bet-nimrah, Sukot, enggau Zapon. Sungai Jordan nyadi sempadan endur ke diterima sida ba sepiak timur Sungai Jordan, nyentuk ngagai begian selatan Danau Chineret.*
28 Nya meh pesaka ke diterima raban bansa Gat, nitihka suku raban bansa sida, nyengkaum kuta-kuta enggau kampung ke bisi ba dia.
29 Moses mega meri pesaka ngagai setengah ari raban bansa Manasi, nitihka suku raban bansa sida.
30 Menua ke diterima sida berengkah ari Mahanaim enggau serata Basan, iya nya semua endur ba baruh perintah Raja Og ari Basan, semua kampung* Jair ba Basan, enggau 60 iti kuta mit.
31 Sida mega nerima setengah ari menua Gilead enggau dua iti kuta ke ba baruh perintah Raja Og ari Basan, iya nya Astarot enggau Edrei. Semua endur nya diberi ngagai setengah ari peturun Makir anak Manasi, nitihka ruang bilik sida.
32 Nya meh pesaka ke diberi Moses ngagai sida lebuh sida ba padang pasir Moap ba seberai Jeriko, sepiak timur Sungai Jordan.
33 Tang Moses nadai meri pesaka ngagai raban bansa Lewi. Jehovah, Petara orang Israel, deka nyadi pesaka sida, baka ke udah disemayaka Iya ngagai sida.
Nota Kaki
^ Tauka “ari Shihor.”
^ Tauka “jalai tama ngagai Hamat.”
^ Tauka “nemu ngereja pengawa ke ngasuh orang nemu pasal utai ke deka nyadi dudi hari.”
^ Iya nya, Danau Genesaret tauka Danau Galili.
^ Tauka “kem.”
