Josua 14:1-15
14 Imam Eleasar, Josua anak Nun, enggau bala tuai suku raban bansa Israel meri menua Kanaan ngagai orang Israel. Orang Israel nerima menua nya nyadika pesaka sida.
2 Baka ke dipadah Jehovah nengah Moses, sida bechabut undi kena nentuka pesaka ke deka diterima semilan iti raban bansa enggau setengah ari raban bansa Manasi.
3 Moses udah meri menua ba sepiak timur Sungai Jordan ngagai dua iti raban bansa enggau setengah ari raban bansa Manasi ke bukai nyadika pesaka sida. Tang iya enda meri pesaka ngagai orang Lewi.
4 Bala peturun Josep bisi dua iti raban bansa, iya nya Manasi enggau Efraim. Orang Lewi enda nerima begian ba menua nya. Tang sida bisi diberi kuta-kuta endur alai sida diau, enggau padang rumput endur sida nupi jelu sereta endur alai sida nyimpan barang.
5 Baka nya meh orang Israel bebagika menua nya, baka ke udah dipadah Jehovah ngagai Moses.
6 Udah nya, beberapa iku lelaki ari raban bansa Judah datai betemu enggau Josua ba Gilgal, lalu Kalep, anak orang Kenis ke benama Jepuneh, bejaku ngagai iya: “Nuan nemu bendar utai ke dipadah Jehovah, Petara ti bendar, ba Kades-barnea ngagai nembiak Iya, Moses, pasal tua.
7 Umur aku 40 taun lebuh nembiak Jehovah, Moses, ngasuh aku mupuk ari Kades-barnea ngintip menua tu. Lalu lebuh aku pulai, aku madahka berita ti amat.
8 Taja pan bala menyadi bukai ke enggau aku madahka utai ke ngasuh orang berasai takut, tang aku agi nitihka Petara aku, Jehovah, enggau pengabis ati.
9 Maya nya, Moses besumpah lalu madahka: ‘Laban nuan udah nitihka Petara aku, Jehovah, enggau pengabis ati, endur ke udah diindik nuan deka seruran nyadi pesaka nuan enggau bala peturun nuan.’
10 Baka ke udah disemayaka Jehovah ngagai Moses 45 taun suba, Jehovah udah nyaga aku ngambika aku terus idup. Maya nya suba, orang Israel agi ba menua puang. Diatu, umur aku 85 taun.
11 Aku agi kering baka maya Moses ngasuh aku ngintip menua tu suba. Aku agi ulih beperang sereta ngereja utai bukai baka suba.
12 Nya alai, beri meh aku kawasan gunung, baka ke udah disemayaka Jehovah maya nya. Taja pan kenyau ari maya nya nuan nemu bisi orang Enakim diau ba dia, lalu sida bisi kuta ti besai ke dikelingi dinding ti teguh, tang aku pechaya Jehovah bisi enggau aku, lalu aku deka muru sida baka ke udah disemayaka Jehovah.”
13 Nyadi, Josua merekatka Kalep anak Jepuneh lalu meri iya menua Hebron nyadika pesaka iya.
14 Nya meh kebuah menua Hebron nyadi pesaka Kalep, anak orang Kenis ke benama Jepuneh, nyentukka seharitu, laban iya udah nitihka Jehovah, Petara orang Israel, enggau pengabis ati iya.
15 Sebedau tu, Hebron dikumbai Kiriat-arba (Arba nya siku lelaki ti penting ba bala orang Enakim). Lalu nadai agi perang ke nyadi ba menua nya.
