Josua 16:1-10
16 Pengudah bechabutka undi, bala peturun Josep nerima menua sida, ke berengkah ari Sungai Jordan ba Jeriko, nyentuk ngagai pun penatai ai ba timur Jeriko. Udah nya, sempadan sida niki lalu nengah menua puang ba depan Jeriko, lalu nuju ngagai kawasan gunung ba Bethel.
2 Ari Bethel, ke enda jauh ari Lus, sempadan nya terus nuju ngagai Atarot, ba sempadan orang Arki.
3 Udah nya, iya nuju ngagai barat lalu nurun ngagai sempadan orang Japlet, ngagai sempadan Bet-horon Baruh, Geser, lalu ngetu ba tasik.
4 Nya meh menua ke diempu peturun Josep, iya nya raban bansa Manasi enggau raban bansa Efraim.
5 Tu meh sempadan menua raban bansa Efraim, nitihka suku raban bansa sida: Ba sepiak timur, sempadan sida berengkah ari Atarot-adar sampai ngagai Bet-horon Atas,
6 lalu nuju ngagai tasik. Ari Mikmetat ke ba utara, sempadan nya nuju ngagai timur, ngagai Taanat-siloh, lalu udah nya nuju ngagai Janoah.
7 Ari Janoah, iya nurun ngagai Atarot, lalu nuju ngagai Narah, Jeriko, nyentuk ngagai Sungai Jordan.
8 Ari Tapuah, sempadan nya nuju ke barat ngagai Wadi Kanah, lalu iya ngetu ba tasik. Nya meh menua ke nyadi pesaka raban bansa Efraim, nitihka suku raban bansa sida.
9 Bala peturun Efraim mega bisi sekeda kuta enggau kampung ba menua raban bansa Manasi.
10 Tang, sida enda muru orang Kanaan ke diau ba Geser. Orang Kanaan nya terus diau ba entara orang Efraim nyentukka seharitu, lalu sida dipaksa gawa nyadi ulun.
