Josua 17:1-18
17 Pengudah bechabutka undi, raban bansa Manasi nerima menua sida. Manasi nya anak tuai Josep. Makir nerima menua Gilead enggau Basan laban iya siku bujang berani. Makir nya anak tuai Manasi, lalu iya mega apai Gilead.
2 Pengudah bechabutka undi, bala peturun Manasi ke bukai nerima menua sida, nitihka suku raban bansa sida, iya nya suku raban bansa Abi-eser, Helek, Asril, Shikem, Heper, enggau Semida. Bala lelaki tu peturun Manasi anak Josep, lalu sida mega tuai suku raban bansa sida.
3 Tang, Zelofehat anak Heper, iya nya uchu Gilead, nadai anak lelaki. (Gilead nya anak Makir, iya nya uchu Manasi.) Iya semina bisi anak indu, iya nya Malah, Noa, Hoklah, Milkah, enggau Tirsah.
4 Sida pan betemu enggau Imam Eleasar, Josua anak Nun, enggau bala tuai orang Israel, lalu madah: “Jehovah meh ke udah ngasuh Moses meri kami tanah pesaka, baka ke udah diberi ngagai bala kami ke lelaki.” Nyadi, baka ke diasuh Jehovah, sida diberi tanah nyadika pesaka sida, baka ke diberi ngagai kaban belayan apai sida ke lelaki.
5 Raban bansa Manasi mega nerima 10 iti begian tanah, kelimpah ari menua Gilead enggau Basan ke ba sepiak timur Sungai Jordan.
6 Sida nerima nya, laban bala anak indu ari raban bansa Manasi mega nerima pesaka, sama baka bala anak lelaki ari raban bansa sida. Menua Gilead diempu bala peturun Manasi ke bukai.
7 Sempadan menua raban bansa Manasi berengkah ari menua raban bansa Aser, lalu nuju ngagai Mikmetat ke ba depan Shikem. Lalu sempadan nya terus nuju ngagai selatan sampai ngagai menua endur orang En-Tapuah diau.
8 Menua Tapuah diempu raban bansa Manasi, tang kuta Tapuah ke bisi ba sempadan menua raban bansa Manasi diempu peturun Efraim.
9 Sempadan menua Manasi nurun ngagai selatan Wadi Kanah. Udah nya, sempadan nya nuju ngagai utara wadi nya, lalu ngetu ba tasik. Ba kawasan raban bansa Manasi bisi kuta-kuta Efraim.
10 Menua ke ba selatan diempu raban bansa Efraim, lalu menua ke ba utara diempu raban bansa Manasi. Tasik Tengah nyadi sempadan menua raban bansa Manasi. Ba sepiak utara, sida* bekunsi sempadan enggau menua raban bansa Aser, lalu ba sepiak timur, sida bekunsi sempadan enggau menua raban bansa Isakar.
11 Ba kawasan Isakar enggau Aser, raban bansa Manasi diberi kuta Bet-sean, Iblim, enggau Dor. Lalu sida mega diberi kuta En-dor, kuta Taanak, enggau kuta Megido, iya nya tiga iti kawasan bebukit. Orang ke diau ba semua kuta nya enggau kuta-kuta mit ke ngelingi iya mega diberi ngagai sida.
12 Tang, bala peturun Manasi enda ulih nguasa kuta-kuta nya, laban orang Kanaan keran deka diau ba menua nya.
13 Lebuh orang Israel nyau majak kering, sida enda muru semua orang Kanaan, tang maksa sida bekereja nyadi ulun.
14 Ku peturun Josep madah ngagai Josua: “Nama kebuah nuan meri kami siti begian aja nyadika pesaka? Kami tu mayuh amat laban Jehovah udah merekatka kami sampai ke diatu.”
15 Lalu ku Josua nyaut sida: “Enti kita amat mayuh lalu kawasan gunung Efraim sekut endur kita, alai kita mansang ngagai utan ba menua orang Peris enggau orang Repaim, lalu tebang pun kayu ba dia ngambika bisi endur alai kita diau.”
16 Ku peturun Josep madah: “Kawasan gunung endang enda chukup ke kami. Nambahka nya, semua orang Kanaan ke diau ba kawasan lebak, iya nya orang ke diau ba Bet-sean enggau kuta-kuta mit ke ngelingi iya sereta orang ke diau ba Lebak Jesril, bisi kerita kuda kena beperang. Lalu roda kerita kuda sida bisi dipasangka pedang besi.”
17 Nyadi, Josua nyaut baka tu ngagai peturun Josep, iya nya raban bansa Efraim enggau raban bansa Manasi: “Bala kita amat mayuh sereta amat kering. Kita ukai semina nerima siti begian aja.
18 Kawasan gunung mega deka diempu kita. Kawasan nya endang kawasan utan. Nyadi, tebang meh pun kayu ba dia lalu endur nya deka nyadi sempadan menua kita. Kita deka muru orang Kanaan, taja pan sida kering sereta bisi kerita kuda ke dipasang enggau pedang besi.”
Nota Kaki
^ Iya nya, orang Manasi tauka kawasan Manasi.
