Josua 18:1-28
18 Pengudah nguasa menua nya, semua orang Israel begelumu ba Siloh, lalu sida nirika langkau gempuru ba dia.
2 Tang, agi bisi tujuh iti raban bansa Israel ke bedau bulih tanah pesaka sida.
3 Nya alai, Josua madah ngagai orang Israel: “Nama ga kita lalu bedau ngambi menua ke diberi Jehovah, Petara aki ini kita? Kemaya kita ka ngambi menua nya?
4 Pilih tiga iku lelaki ari tiap iti raban bansa. Aku deka ngasuh sida bejalai ba serata menua tu, lalu ngaga peta nitihka bagi menua ke deka diterima raban bansa sida. Udah nya, sida patut pulai baru ngagai aku.
5 Sida mesti bebagika menua tu ngagai tujuh iti begian. Raban bansa Judah deka terus diau ba kawasan sida ba selatan, lalu peturun Josep deka terus diau ba kawasan sida ba utara.
6 Nyadi, kita patut ngaga peta ke tujuh iti begian menua nya, lalu meri nya ngagai aku ba ditu. Aku deka bechabutka undi ke kita ba depan Petara kitai, Jehovah.
7 Tang raban bansa Lewi enda diberi tanah, laban pengawa sida ke nyadi imam Jehovah nya pesaka sida. Raban bansa Gat, raban bansa Reuben, enggau setengah ari raban bansa Manasi udah nerima pesaka ba sepiak timur Sungai Jordan, ke diberi Moses, nembiak Jehovah, ngagai sida.”
8 Bala lelaki ke diasuh ngaga peta nya pan besedia deka mupuk, lalu ku Josua madah ngagai sida: “Alai kita mupuk lalu ngaga peta menua nya. Udah nya pulai baru ngagai aku kitu, ba Siloh. Aku deka bechabutka undi ke kita ba depan Jehovah.”
9 Bala lelaki nya mupuk lalu bejalai nengah menua nya. Sida magi menua nya nyadi tujuh iti begian, lalu ngaga peta menua nya. Sida mega ngaga lis kuta-kuta ke bisi ba dia. Semua nya dituliska ba dalam siti bup. Udah nya, sida pulai ngagai kem ba Siloh, lalu betemu enggau Josua.
10 Ba Siloh, Josua pan bechabutka undi ke sida iya ba depan Jehovah. Ba dia meh Josua bebagika menua nya ngagai orang Israel, nitihka begian ke patut diterima sida.
11 Pengudah bechabutka undi, raban bansa Benjamin nerima menua nitihka suku raban bansa sida. Sida nerima menua ba entara menua raban bansa Judah enggau menua peturun Josep.
12 Ba sepiak utara, sempadan sida berengkah ari Sungai Jordan, lalu niki ngagai lereng ba utara Jeriko. Udah nya, sempadan nya nuju ngagai kawasan gunung ba barat, sampai ngagai menua puang Bet-aben.
13 Ari endur nya, sempadan nya terus nuju ngagai Lus, iya nya Bethel. Sempadan nya mansa begian selatan lereng Lus, lalu nurun ngagai Atarot-adar, ba gunung ke bisi ba selatan Bet-horon Baruh.
14 Udah nya, ari gunung ke ba depan Bet-horon, sempadan nya terus nuju ngagai selatan, lalu ngetu ba Kiriat-baal, iya nya Kiriat-jearim, kuta raban bansa Judah. Nya meh sempadan sida ba sepiak barat.
15 Ba sepiak selatan, sempadan sida berengkah ari tisi Kiriat-jearim lalu nuju ngagai barat. Sempadan nya nuju ngagai Pun Penatai Ai Neptoah,
16 lalu nurun ngagai kaki gunung ke ba depan Lebak Hinom sereta ke bisi ba begian utara Lebak Repaim. Udah nya, sempadan nya nurun ngagai Lebak Hinom, ngagai lereng orang Jebus ba selatan, lalu nurun ngagai En-rogel.
17 Ari nya, sempadan nya nuju ngagai utara, ngagai En-shemes, ngagai Gelilot ke bisi ba depan lereng Adumim, lalu ngagai Batu Bohan. (Bohan nya ari peturun Reuben.)
18 Ari nya, sempadan nya nuju ngagai lereng bukit ba kawasan utara ke ba depan Arabah, lalu udah nya iya nurun ngagai Arabah.
19 Sempadan nya terus nuju ngagai begian utara lereng Bet-hoglah lalu ngetu ba ujung Sungai Jordan, ba teluk Tasik Mati. Nya meh sempadan menua sida ba selatan.
20 Ba sepiak timur, Sungai Jordan nyadi sempadan menua sida. Nya meh semua sempadan menua ke nyadi pesaka bala peturun Benjamin, nitihka suku raban bansa sida.
21 Tu meh kuta-kuta raban bansa Benjamin nitihka suku raban bansa sida: Jeriko, Bet-hoglah, Emek-kesis,
22 Bet-arabah, Semaraim, Bethel,
23 Abim, Parah, Oprah,
24 Chepar-amoni, Opni, enggau Geba. Semua nya bisi 12 iti kuta enggau kampung.
25 Gibeon, Ramah, Berot,
26 Mispeh, Kefirah, Mosah,
27 Rekem, Irpil, Taralah,
28 Sela, Ha-elep, Jebus, iya nya Jerusalem, Gibeah, enggau Kiriat. Semua nya bisi 14 iti kuta enggau kampung.
Nya meh pesaka bala peturun Benjamin nitihka suku raban bansa sida.
