Josua 2:1-24
2 Lebuh ba Sitim, Josua anak Nun nganjung dua iku orang nyadi pengintip, tang orang enda nemu pasal nya. Ku Josua madah ngagai seduai iya: “Alai seduai mupuk meresa menua nya, kelebih agi Jeriko.” Nya alai, seduai iya pan mupuk lalu datai ba rumah siku pelacur ke benama Rahap. Seduai iya pan bemalam ba dia.
2 Bisi orang madah ngagai raja Jeriko: “Bisi orang Israel datai malam tu ngintip menua kitai.”
3 Nya alai, raja Jeriko ngasuh orang madahka pesan tu ngagai Rahap: “Bai pansut orang ke diau ba rumah nuan nya, laban sida deka ngintip serata menua kitai.”
4 Pengudah ngasuh dua iku nya belalai, Rahap lalu bejaku ngagai orang ke dianjung raja: “Amat, bisi orang datai ngagai aku, tang aku enda nemu ari ni penatai sida.
5 Maya hari nyau petang, sida pansut. Aku enda nemu kini penunga sida. Tang enti kita jampat ngagai sida, ulih kita nangkap sida.”
6 (Kebendar iya, Rahap udah ngasuh dua iku orang nya belalai ba baruh tugung tangkai flaks* ke bisi ba atas perabung rumah.)
7 Pengudah ninga nya, orang ke dianjung raja pan lalu beguai ngagai bala pengintip nya. Sida mupuk tunga ngagai endur orang suah meraka Sungai Jordan. Pengudah sida mupuk, pintu penama kuta pan ditutup.
8 Sebedau dua iku pengintip nya tinduk, Rahap niki ke atas lalu betemu enggau seduai iya ba perabung rumah.
9 Ku iya madah: “Aku nemu Jehovah deka meri kita menua tu. Kami takutka kita lalu semua orang ba menua tu lemi semengat ketegal kita.
10 Kami udah ninga baka ni Jehovah ngasuh Tasik Mirah nyadi rangkai ba depan mata kita lebuh kita mupuk ari Ejip, lalu baka ni kita udah munuh dua iku raja orang Amor, Sihon enggau Og, ba seberai* Sungai Jordan.
11 Lebuh kami ninga pasal nya, kami balat amat takut, lalu nadai siku pan ke berani deka ngelaban kita. Nya ketegal semina Petara kita, Jehovah aja ke nyadi Petara ba serega enggau ba dunya.
12 Nya alai, besumpah meh dalam nama Jehovah, laban aku udah ngayanka pengerindu enggau setia ngagai seduai, seduai mega patut ngayanka pengerindu enggau setia ngagai kami sebilik. Beri meh aku tanda ke nunjukka seduai deka ngereja nya.
13 Anang munuh apai indai aku, bala menyadi aku, enggau semua orang ke diau enggau sida. Selamatka meh kami.”
14 Dua iku pengintip nya nyaut Rahap: “Enti nuan enda madahka orang pasal kami, nya baru kami deka ngayanka pengerindu enggau setia ngagai nuan. Lalu kami deka ngamatka jaku kami lebuh Jehovah meri kami menua tu. Enti kami enda ngereja nya, awakka kami mati.”
15 Udah nya, Rahap nulung seduai iya nurun ari jenila rumah iya ngena tali laban iya diau ba atas dinding kuta.
16 Rahap lalu bejaku ngagai seduai iya: “Alai seduai belalai ba kawasan gunung tiga hari, ngambika orang ke ngiga seduai enda ulih tetemuka seduai. Pengudah sida pulai kitu, nya baru seduai ulih mupuk.”
17 Ku dua iku pengintip nya madah ngagai iya: “Kami deka ngamatka sumpah kami
18 enti nuan ngereja tu: Maya kami datai ngagai menua tu baru, nuan mesti nanchangka tali mirah tu ba jenila alai kami duai nurun tadi. Apai indai nuan, bala menyadi nuan, enggau semua kita sebilik mesti dibai sama enggau nuan ba rumah nuan ditu.
19 Enti bisi orang pansut ari rumah nuan lalu iya mati, iya mesti betanggungjawapka nyawa iya empu. Nya ukai salah kami. Tang enti bisi nama-nama utai nyadi ngagai bala ke ba rumah nuan, kami meh ke deka betanggungjawap.
20 Tang enti nuan madahka orang pasal kami, kami enda ibuh ngamatka sumpah kami.”
21 Ku Rahap nyaut: “Au, aku setuju.”
Pengudah iya meri selamat jalai, dua iku pengintip nya pan mupuk. Udah nya, Rahap nanchangka tali mirah ba jenila.
22 Dua iku pengintip nya pan mansang ngagai kawasan gunung. Orang ke dianjung raja begigaka seduai iya ba tiap iti jalai, tang enda ulih tetemuka seduai iya. Seduai iya belalai ba kawasan gunung pengelama tiga hari sampai orang nya pulai baru ngagai Jeriko.
23 Udah nya, dua iku pengintip nya pan nurun ari kawasan gunung, lalu meraka Sungai Jordan. Maya seduai iya pulai, seduai iya madah ngagai Josua anak Nun semua utai ke udah nyadi.
24 Ku seduai iya madah ngagai iya: “Jehovah udah nyerahka serata menua nya ngagai kitai. Nemu nuan, semua orang ba dia nyau lemi semengat ketegal kitai.”
Nota Kaki
^ Sebengkah utai tumbuh ke ditanam ari kelia menya ke ulih dikena ngaga kain.
^ Iya nya, timur Sungai Jordan.
