Josua 20:1-9
-
Kuta endur belindung (1-9)
20 Udah nya, Jehovah bejaku ngagai Josua:
2 “Padah ngagai orang Israel: ‘Pilih kuta-kuta ke deka nyadi kuta endur belindung, baka ke udah dipadah Aku ngagai nuan nengah Moses.
3 Enti bisi orang ke enda sengaja munuh orang, iya ulih ngerarika diri ngagai kuta nya. Kuta nya deka ngelindung iya ari orang ke ngiga balas.*
4 Iya mesti rari ngagai siti ari kuta nya, lalu betemu enggau bala tuai kuta nya ba pintu penama kuta. Iya mesti madah ngagai sida pasal utai ke udah nyadi. Udah nya, sida mesti ngemendarka iya tama lalu meri iya endur diau ba kuta nya.
5 Enti orang ke ngiga balas nya begagaika iya, bala tuai enda patut nyerahka iya ngagai orang ke ngiga balas nya, laban iya enda sengaja munuh orang, ukai ketegal iya begedika orang nya.
6 Iya mesti diau ba kuta nya nyentukka iya dipechara ba depan bala pengari orang mayuh. Iya mesti terus diau dia nyentukka imam besai ke bisi maya nya mati. Nya baru iya ulih pulai ngagai kuta enggau rumah iya, ke udah ditinggalka iya maya iya ngerarika diri.’”
7 Nya alai, orang Israel pan milih* kuta-kuta tu nyadi kuta endur belindung: Kedes ba Galili ke ba kawasan gunung Naptali, Shikem ke ba kawasan gunung Efraim, enggau Kiriat-arba, iya nya Hebron ke ba kawasan gunung Judah.
8 Ba kawasan Sungai Jordan, iya nya ba sepiak timur Jeriko, sida milih Beser, Ramot, enggau Golan. Beser bisi ba menua puang ke ba tanah tinggi ti rata ba menua raban bansa Reuben. Ramot bisi ba Gilead ke ba menua raban bansa Gat, lalu Golan bisi ba Basan ke ba menua raban bansa Manasi.
9 Nya meh kuta-kuta ke udah dipilih ke semua orang Israel enggau orang asing ke diau enggau sida. Enti bisi orang ke enda sengaja munuh orang, iya ulih ngerarika diri ngagai kuta nya, ngambika iya enda dibunuh orang ke ngiga balas sebedau iya dipechara ba depan bala pengari orang mayuh.
