Josua 22:1-34
22 Udah nya, Josua ngempuruka raban bansa Reuben, Gat, enggau setengah ari raban bansa Manasi.
2 Ku iya bejaku ngagai sida: “Kita udah ngereja semua utai ke diasuh nembiak Jehovah, Moses, lalu kita udah ngasika semua utai ke diasuh aku gaga kita.
3 Ngelama tu kita enda kala ninggalka bala menyadi kita sampai ke seharitu, lalu kita udah ngasika pesan Jehovah, Petara kita.
4 Diatu Petara kita, Jehovah, udah meri pengelantang ngagai bala menyadi kita, baka ke udah disemayaka Iya ngagai sida. Nya alai, kita tau pulai ngagai langkau kain kita ba sepiak timur Sungai Jordan, ba menua ke diberi nembiak Jehovah, Moses, ngagai kita.
5 Kita patut bebendar nitihka pesan enggau Adat ke diberi nembiak Jehovah, Moses. Chara iya, kita patut rinduka Petara kita, Jehovah, nitihka semua jalai Iya, ngasika pesan Iya, bepegai tegut ba Iya, lalu nyembah Iya enggau pengabis ati kita sereta enggau pengabis pengidup kita.”
6 Udah nya, Josua merekatka sida lalu ngasuh sida pulai. Sida pan mupuk ngagai langkau kain sida.
7 Moses udah meri tanah pesaka ke ba Basan ngagai setengah ari raban bansa Manasi, lalu Josua udah meri menua ke ba sepiak barat Sungai Jordan ngagai setengah da agi raban bansa Manasi ke bukai, ngambika sida ulih diau begulai enggau bala menyadi sida. Lebuh Josua ngasuh sida pulai ngagai langkau kain sida, Josua merekatka sida.
8 Lalu ku iya madah ngagai sida: “Kita udah bulih mayuh amat reta, mayuh amat jelu tupi, pia mega enggau pirak, emas, temaga, besi, enggau mayuh amat gari. Bai semua utai nya pulai ngagai langkau kain kita. Bai utai ke udah dirampas kita ari bala munsuh lalu bebagika utai nya enggau bala menyadi kita.”
9 Pengudah nya raban bansa Reuben, Gat, enggau setengah ari raban bansa Manasi lalu mupuk ari Siloh ke ba Kanaan, lalu ninggalka orang Israel ke bukai. Sida pulai ngagai menua sida ba Gilead, lalu diau ba dia baka ke diasuh Jehovah nengah Moses.
10 Lebuh sida datai ba kawasan Sungai Jordan ke ba menua Kanaan, sida pan ngaga alta ti amat besai semak sungai nya.
11 Udah nya, orang Israel ke bukai ninga orang bejaku munyi tu: “Peda kita! Raban bansa Reuben, Gat, enggau setengah ari raban bansa Manasi udah ngaga alta semak Sungai Jordan, ba sempadan menua Kanaan ke ba sepiak barat menua orang Israel.”
12 Lebuh ninga nya, semua orang Israel ke bukai begelumu ba Siloh laban deka beperang ngelaban sida.
13 Udah nya, orang Israel nganjung Pinehas anak Imam Eleasar betemu enggau raban bansa Reuben, Gat, enggau setengah ari raban bansa Manasi ba menua Gilead.
14 Bisi 10 iku tuai ke enggau iya. Tiap iku sida nya tuai ba tiap iti raban bansa Israel, lalu sida mega nyadi tuai ba suku raban bansa diri empu.*
15 Lebuh sida datai ba menua Gilead lalu betemu enggau raban bansa Reuben, Gat, enggau setengah ari raban bansa Manasi, sida madahka:
16 “Tu meh utai ke dipadahka semua nembiak Jehovah: ‘Kita udah ngaga alta ke diri empu. Kita ngelaban Jehovah. Kita udah ninggalka Jehovah. Nama kebuah kita nyau enda setia ngagai Petara orang Israel?
17 Kati penyalah ke digaga kitai ba Peor enda chukup? Kati kita enda ingat baka ni Jehovah udah ngukum kitai ngena penyakit ti balat? Sampai seharitu agi meh kitai merinsa ketegal nya.
18 Nyadi, amat kita deka ninggalka Jehovah seharitu? Enti kita ngelaban Jehovah seharitu, pagila Iya tentu ringat ngagai semua orang Israel.
19 Enti kita ngereja nya ketegal menua kita nya enda tuchi, kita ulih ngagai menua ke diempu Jehovah, lalu diau enggau kami ba menua endur langkau sembiang Jehovah. Tang anang ngelaban Jehovah. Anang ngaga alta ke diri empu, kelimpah ari alta Petara kitai, Jehovah, enggaika kami dikumbai ngelaban Iya sama baka kita.
20 Ukai ke enda Petara ringat ngagai semua orang Israel, ketegal Akhan anak Zerah enda setia lalu ngambi utai ke patut dianchurka? Ukai iya aja ke mati ketegal penyalah iya nya.’”
21 Nyadi, raban bansa Reuben, raban bansa Gat, enggau setengah ari raban bansa Manasi lalu nyaut bala tuai suku raban bansa Israel munyi tu:
22 “Jehovah nya Petara ti Bekuasa! Jehovah nya Petara ti Bekuasa! Iya nemu, lalu orang Israel mega deka nemu. Enti kami ngelaban lalu enda setia ngagai Jehovah, anang nyelamatka kami seharitu.
23 Jehovah tentu deka ngukum kami enti kami ngaga alta tu ketegal deka ninggalka Jehovah, sereta ketegal deka nyerahka pemeri tunu, pemeri bijirin, enggau pemeri bebaik.
24 Tang ukai nya tuju kami. Kami ngereja nya laban kami takut enggaika bala anak kita bejaku munyi tu ngagai bala anak kami ila: ‘Nama kaul kita enggau Jehovah, Petara orang Israel?
25 Jehovah udah ngasuh Sungai Jordan nyadika sempadan entara kami enggau kita, orang Reuben enggau orang Gat. Kita nadai kaul enggau Jehovah.’ Bala anak kita deka nagang bala anak kami ari nyembah* Jehovah.
26 “Nyadi kami berunding deka ngaga alta nya, ukai ketegal deka nyerahka pemeri tunu tauka pemeri bukai,
27 tang ketegal deka ngasuh nya nyadi saksi entara kita enggau kami sereta enggau peturun kitai. Tu nyadika bukti kami deka nyembah Jehovah ngena pemeri tunu, pemeri bebaik, enggau pemeri ke bukai. Enggau nya, bala anak kita enda nyebut munyi tu ngagai bala anak kami ila: ‘Kita nadai kaul enggau Jehovah.’
28 Nyadi, enti nyema sida munyi nya ngagai kami enggau bala peturun kami ila, kami deka nyaut sida munyi tu: ‘Peda kita alta ke digaga aki ini kami, ke sebaka enggau alta Jehovah. Alta nya ukai dikena nyerahka pemeri tunu tauka pemeri bukai, tang dikena nyadi saksi entara kita enggau kami.’
29 Kami nadai kala berunding deka ngelaban Jehovah, ninggalka Jehovah, lalu ngaga alta bukai kena nyerahka pemeri. Kami semina deka nyerahka pemeri tunu, pemeri bijirin, enggau pemeri ke bukai ba alta Petara kitai, Jehovah, ke ba depan langkau sembiang Iya.”
30 Lebuh Imam Pinehas enggau bala tuai orang Israel* ninga utai ke dipadahka raban bansa Reuben, Gat, enggau Manasi, ati sida iya pan berasai lantang.
31 Nya alai, Pinehas anak Imam Eleasar madah ngagai raban bansa Reuben, Gat, enggau Manasi: “Seharitu kami nemu Jehovah bisi enggau kitai, laban kita ngereja nya ukai ketegal kita deka ngelaban Jehovah. Nya alai, Jehovah enda ngukum kitai.”
32 Udah nya, Pinehas anak Imam Eleasar enggau bala tuai raban bansa mupuk ninggalka raban bansa Reuben enggau raban bansa Gat ke ba menua Gilead. Sida pulai ngagai menua Kanaan, lalu madahka utai ke nyadi nya ngagai orang Israel ke bukai.
33 Orang Israel lantang ati ninga pasal utai ke nyadi nya, lalu sida pan muji Petara. Sida enda agi bejaku pasal deka beperang ngelaban raban bansa Reuben enggau raban bansa Gat, tauka deka nganchurka menua alai sida diau.
34 Nya alai, raban bansa Reuben enggau raban bansa Gat meri nama ngagai alta* nya, laban “alta nya saksi kitai ti nunjukka Jehovah nya Petara ti bendar.”
Nota Kaki
^ Tauka “nyadi tuai atas beribu iku orang.”
^ Jaku Asal, “nangika.”
^ Tauka “tuai atas beribu iku orang.”
^ Ari penerang nya, alta nya engka dikumbai Saksi.
