Josua 4:1-24
-
Batu nyadi pengingat (1-24)
4 Pengudah semua orang Israel meraka Sungai Jordan, Jehovah lalu bejaku ngagai Josua:
2 “Pilih 12 iku lelaki, siku ari tiap iti raban bansa,
3 lalu padahka pesan tu ngagai sida: ‘Ambi 12 igi batu ke ba tengah-tengah Sungai Jordan, ba endur alai bala imam bediri. Bai batu nya lalu engkahka iya ba endur alai kita deka bemalam.’”
4 Nyadi, Josua pan ngangauka 12 iku lelaki ke udah dipilih iya. Tiap iku sida dipilih ari tiap iti raban bansa Israel.
5 Josua lalu madah ngagai sida: “Alai kita mansang ke depan peti lampang batu Adat Petara kita, Jehovah. Tiap iku kita patut ngambi lalu ngesan sigi batu ke ba tengah-tengah Sungai Jordan. Penyampau batu nya sama enggau penyampau raban bansa Israel.
6 Batu nya deka nyadi pengingat ke kita. Enti nyema bala anak kita nanya kita ila: ‘Nama kebuah batu tu bisi ditu?’
7 kita mesti nyaut sida munyi tu: ‘Batu tu deka terus ngingatka orang Israel pasal ai Sungai Jordan ke ngetu tekala nya, lebuh peti lampang batu Adat Jehovah dibai meraka sungai nya.’”
8 Nya alai, 12 iku lelaki nya ngereja utai ke diasuh Josua. Baka ke dipadah Jehovah ngagai Josua, sida ngambi 12 igi batu ba tengah-tengah Sungai Jordan nitihka penyampau raban bansa orang Israel. Sida mai batu nya lalu ngengkahka batu nya ba endur alai sida bemalam.
9 Josua mega ngengkahka 12 igi batu ba tengah-tengah Sungai Jordan ba endur alai bala imam ke ngesan peti lampang batu Adat bediri. Batu nya agi bisi ba dia nyentukka seharitu.
10 Bala imam ke ngesan peti lampang batu Adat mengkang bediri ba tengah-tengah Sungai Jordan, nyentukka semua orang Israel tembu ngereja semua utai ke udah diasuh Jehovah padah Josua ngagai sida. Sida ngereja utai sejalai enggau utai ke dipadah Moses ngagai Josua. Maya nya mega orang Israel meraka sungai nya enggau jampat.
11 Pengudah semua orang Israel meraka sungai nya, nya baru bala imam ke ngesan peti lampang batu Adat Jehovah neruska pejalai sida ke seberai.*
12 Raban bansa Reuben, raban bansa Gat, enggau setengah ari raban bansa Manasi ke sigi udah besedia deka beperang, meraka dulu agi ari orang Israel baka ke udah dipadah Moses.
13 Bisi kira-kira 40,000 iku soldadu ke sedia deka beperang, meraka ke seberai ngagai menua puang ba Jeriko, lalu Jehovah bisi enggau sida.
14 Ba hari nya, Jehovah ngasuh Josua nyadi orang ke dipebasaka semua orang Israel. Ba sepemanjai idup Josua, semua orang Israel amat bebasaka iya baka sida ke bebasaka Moses.
15 Udah nya, Jehovah bejaku ngagai Josua:
16 “Asuh bala imam ke ngesan peti lampang batu Adat nya pansut ari Sungai Jordan.”
17 Josua pan madah ngagai bala imam: “Pansut kita ari Sungai Jordan nya.”
18 Bala imam ke ngesan peti lampang batu Adat Jehovah lalu pansut ari tengah-tengah Sungai Jordan. Lebuh sida datai ba tebing sungai nya, ai sungai pan mengalir baru baka selama sampai tebing nya ampuh.
19 Orang Israel meraka Sungai Jordan kena hari ke-10 ba bulan ti keterubah. Sida nirika kem sida ba Gilgal, ke ba timur sempadan Jeriko.
20 Josua ngengkahka 12 igi batu ke diambi sida ari Sungai Jordan ba Gilgal.
21 Udah nya, Josua bejaku ngagai orang Israel: “Enti nyema ila, bala anak kita nanya: ‘Nama reti batu tu diengkahka ba ditu?’
22 kita mesti nyaut sida baka tu: ‘Orang Israel bejalai ba tanah ti rangkai lebuh meraka Sungai Jordan.
23 Petara kitai, Jehovah, udah ngasuh ai Sungai Jordan nyadi rangkai nyentukka semua kami udah meraka ke seberai. Nya sama baka ke digaga Petara kitai, Jehovah, ba Tasik Mirah, ngambika kami ulih meraka tasik nya.
24 Jehovah ngereja tu ngambika semua orang ba dunya tu nemu pemesai kuasa jari Iya sereta ngambika kita seruran ngayanka basa ti besai ngagai* Petara kita, Jehovah.’”
