Josua 5:1-15
5 Semua raja orang Amor ke ba sepiak barat Sungai Jordan enggau semua raja orang Kanaan ke ba tebing tasik nyadi lemi semengat sereta takut ketegal orang Israel, pengudah sida ninga pasal Jehovah ke udah ngerangkaika Sungai Jordan nyentukka semua orang Israel udah meraka ke seberai.
2 Maya nya mega, Jehovah madah ngagai Josua: “Gaga beberapa iti pisau ari batu, lalu sunat orang Israel kali kedua.”
3 Josua pan ngaga beberapa iti pisau lalu nyunat orang Israel ba Gibeat-haralot.*
4 Tu meh kebuah Josua nyunat sida: Semua orang lelaki ke pansut ari Ejip, iya nya semua sida ke udah chukup umur enggau beperang, udah mati lebuh ba menua puang.
5 Semua sida ke pansut ari Ejip udah besunat, tang sida ke ada ba menua puang bedau besunat.
6 Pengudah pansut ari Ejip, orang Israel bejalai ba menua puang pengelama 40 taun sampai sida ke lelaki ke udah chukup umur enggau beperang udah mati magang, laban sida enda ngasika jaku Jehovah. Jehovah besumpah enggai ngasuh sida meda menua ke kaya enggau ai tusu sereta madu. Nya meh menua ke udah disemayaka Jehovah ngagai aki ini sida, ke deka diberi Iya ngagai nembiak Iya.*
7 Nyadi, Iya enda mai sida ngagai menua nya, tang mai bala anak sida kia. Bala anak sida meh ke disunat Josua laban sida bedau besunat lebuh sida ba rantau jalai.
8 Pengudah semua sida disunat, semua sida ngenatka diri ba kem sampai sida gerai.
9 Udah nya, Jehovah madah ngagai Josua: “Seharitu Aku udah muai* kebuah ti ngasuh Ejip ngemaluka kita.” Nya alai, endur nya dikumbai Gilgal* nyentukka seharitu.
10 Orang Israel terus diau ba kem ba Gilgal. Kena hari ke-14 ba bulan ti keterubah, sida ngintu Pengerami Paska. Pengerami nya diintu maya malam hari ba menua puang ba Jeriko.
11 Ba hari siti pengudah sida ngintu Pengerami Paska, sida berengkah makai asil ari ladang ba menua nya, iya nya roti ti enda beragi enggau leka utai ke dipanggang.
12 Ba hari ti sama maya orang Israel makai asil ari ladang ba menua Kanaan, manna enda agi disediaka ke sida. Berengkah ari taun nya sida makai asil ari menua nya.
13 Maya Josua ba endur ke semak enggau kuta Jeriko, iya meda siku lelaki ke megai pedang bediri ba depan iya. Iya mansang ngagai lelaki nya lalu nanya: “Nuan nyukung kami tauka nuan nyukung munsuh kami?”
14 Ku lelaki nya nyaut: “Enda. Kebendar iya, aku datai laban aku siku ketuai raban soldadu Jehovah.” Josua pan lalu besugang kena ngayanka basa ngagai iya. Ku Josua madah: “Nama utai ke deka dipadahka nuan ngagai aku, tuan?”
15 Ku ketuai raban soldadu Jehovah nya nyaut Josua: “Buka selipar nuan laban tempat ke endur nuan bediri tu kudus.” Josua pan lalu terus ngereja nya.
Nota Kaki
^ Reti nya “Bukit Kulit Tutus.”
^ Jaku Asal, “ngagai kitai.”
^ Jaku Asal, “maringka.”
^ Reti nya “Maringka; Maringka ke Bukai.”
