Josua 6:1-27
6 Semua pintu penama kuta Jeriko ditutup rapat ngambika orang Israel enda ulih masuk kia. Nadai orang ulih tama tauka pansut ari kuta nya.
2 Ku Jehovah bejaku ngagai Josua: “Peda nuan, Aku udah nyerahka kuta Jeriko, raja iya, enggau bala soldadu iya ti kering ngagai nuan.
3 Semua kita soldadu orang Israel patut bejalai* ngelingi kuta nya sekali sehari. Kita patut ngereja nya pengelama enam hari.
4 Asuh tujuh iku bala imam ke mai terumpit* bejalai* dulu ari peti lampang batu Adat. Ba hari ti ketujuh, kita patut bejalai ngelingi kuta nya tujuh kali, lalu bala imam mesti nyepu terumpit nya.
5 Maya kita ninga bunyi terumpit nya disepu enggau panjai, semua kita patut nyerauh enggau inggar. Udah nya, dinding kuta deka runtuh lalu semua kita patut terus mansang ngagai kuta nya.”
6 Nya alai, Josua anak Nun lalu ngangauka bala imam lalu bejaku ngagai sida: “San peti lampang batu Adat nya. Tujuh iku bala imam ke bukai patut mai tujuh iti terumpit, lalu bejalai dulu ari peti lampang batu Adat Jehovah.”
7 Udah nya, Josua lalu bejaku ngagai bala soldadu: “Alai kita bejalai* ngelingi kuta nya, lalu raban soldadu ke mai senyata patut bejalai dulu ari peti lampang batu Adat Jehovah.”
8 Semua sida nitihka utai ke dipadah Josua. Tujuh iku bala imam mupuk lalu bejalai dulu ari Jehovah sambil sida nyepu terumpit ke dipegai sida. Bala imam ke ngesan peti lampang batu Adat Jehovah bejalai nitihka sida ari belakang.
9 Raban soldadu ke mai senyata bejalai dulu ari bala imam ke nyepu terumpit, lalu raban soldadu ke bukai bejalai ba belakang peti lampang batu Adat. Bala imam enda ngetu nyepu terumpit nya maya sida bejalai.
10 Josua mega udah mesan ngagai bala soldadu: “Anang nyerauh. Anang bemunyi. Nadai seleka jaku pan tau pansut ari mulut kita. Maya aku ngasuh kita nyerauh, nya baru kita tau nyerauh.”
11 Josua udah ngasuh peti lampang batu Adat Jehovah dibai ngelingi kuta nya sekali aja. Udah nya, sida pulai ngagai kem sida lalu bemalam dia.
12 Pagi siti, Josua dani tumu lalu bala imam ngesan peti lampang batu Adat Jehovah.
13 Tujuh iku bala imam ke bukai bejalai dulu ari peti lampang batu Adat Jehovah. Sida enda ngetu nyepu terumpit ke dibai sida. Bala soldadu ke mai senyata bejalai dulu ari bala imam nya, lalu bala soldadu ke bukai bejalai ba belakang peti lampang batu Adat Jehovah. Terumpit nya enda ngetu disepu maya sida bejalai.
14 Ba hari ti kedua, sida mega bejalai* ngelingi kuta nya sekali. Udah nya, sida pulai ngagai kem sida. Sida bejalai baka nya pengelama enam hari.
15 Ba hari ti ketujuh, sida dani tumu pagi maya hari baru ka tawas. Sida bejalai* ngelingi kuta nya baka selama, tang kali tu tujuh kali. Semina ba hari ti ketujuh aja sida ngelingi kuta nya tujuh kali.
16 Maya sida ngelingi kuta nya kali ketujuh, bala imam nyepu terumpit sida, lalu ku Josua madah: “Nyerauh kita laban Jehovah udah nyerahka kuta tu ngagai kita!
17 Anchurka enggau pengabis iya semua utai ke bisi ba kuta tu. Semua utai ke ba dia enggi Jehovah magang. Tang anang munuh Rahap, indu pelacur nya, enggau semua orang ke bisi ba rumah iya laban iya udah nulung bala pengintip kitai belalai.
18 Kita mega anang semak enggau utai ke mesti dianchurka, enggaika kita bisi ati deka ngambi utai nya. Enti kita ngambi utai nya, kita deka ngasuh kem orang Israel ditinggang penusah ti balat lalu ngasuh semua sida dipunaska.
19 Semua pirak, emas, enggau semua utai ke digaga ari temaga enggau besi nya utai ti kudus ba Jehovah. Semua nya mesti disimpan ba endur alai nyimpan reta Jehovah.”
20 Maya terumpit disepu, bala soldadu nyerauh enggau naka penginggar lalu dinding kuta pan runtuh tekala nya. Udah nya, sida pan terus mansang lalu ngalahka kuta nya.
21 Sida nganchurka semua utai ke bisi ba kuta nya. Sida munuh semua orang indu enggau ke lelaki ngena pedang, enda ngira tuai tauka biak. Sida mega munuh semua jelu sapi, bedus, enggau keledai.
22 Ku Josua madah ngagai dua iku pengintip ke kala ngintip menua nya: “Alai seduai ngagai rumah pelacur nya. Bai iya enggau semua sida sebilik pansut ari nya, baka ke udah disemayaka seduai enggau iya.”
23 Nya alai, dua iku pengintip nya lalu mai Rahap, apai indai iya, bala menyadi iya, enggau semua orang ke bisi ba rumah iya pansut ari endur nya. Sida iya lalu dibai ngagai endur ti selamat ba luar kem orang Israel.
24 Udah nya, sida nunu kuta nya enggau semua utai ke bisi ba dia. Tang, sida iya mai semua pirak, emas, sereta semua utai ke digaga ari temaga enggau besi ngagai endur alai nyimpan reta ke rumah Jehovah.
25 Josua semina nyelamatka Rahap, indu pelacur nya, sida sebilik, enggau semua orang ke bisi ba rumah iya, laban Rahap udah ngelalaika bala pengintip ke dianjung Josua maya sida ngintip kuta Jeriko. Rahap diau ba Israel nyentukka seharitu.
26 Maya nya Josua lalu besumpah:* “Awakka Jehovah nyumpah orang ke deka nguji nirika baru kuta Jeriko. Enti iya ngaga asas kuta nya, awakka anak iya ke tuai mati, lalu enti iya masang pintu kuta nya, awakka anak iya ke biak mati.”
27 Jehovah bisi enggau Josua, lalu Josua nyadi orang ti terkenal di serata dunya.
Nota Kaki
^ Tauka “bekawad.”
^ Jaku Asal, “tanduk bedus lelaki.”
^ Tauka “bekawad.”
^ Tauka “bekawad.”
^ Tauka “bekawad.”
^ Tauka “bekawad.”
^ Tauka engka, “ngasuh orang besumpah.”
