Josua 7:1-26
7 Tang orang Israel enda setia ngagai Petara, laban sida enda ngasika pesan pasal utai ke patut dianchurka. Akhan udah ngambi sekeda utai ke patut dianchurka. Ketegal nya, Jehovah amat ringat ngagai orang Israel. Akhan nya anak Karmi enggau uchu Sabdi, ke datai ari peturun Zerah ba raban bansa Judah.
2 Udah nya, Josua ngasuh beberapa iku lelaki ngagai menua Eyai ari Jeriko. Menua Eyai nya tunga ke timur Bethel, semak Bet-aben. Ku Josua madah ngagai sida iya: “Alai kita ngintip menua nya.” Sida iya pan mansang ngagai menua Eyai lalu ngintip menua nya.
3 Pengudah sida pulai baru, sida betemu enggau Josua lalu madah ngagai iya: “Enda ibuh kitai ngiruhka semua bala soldadu kitai kia. Kira-kira dua tauka tiga ribu iku orang pan chukup ngalahka menua Eyai, laban mimit aja orang ba menua nya.”
4 Nyadi, kira-kira 3,000 iku bala soldadu pan mansang ngagai menua Eyai. Tang, lebuh sida datai dia, sida patut rari ari orang Eyai.
5 Ari luar pintu kuta, orang Eyai begagaika bala soldadu orang Israel ba sepemanjai lereng bukit nurun ngagai Shebarim,* lalu bisi 36 iku bala soldadu orang Israel mati dibunuh. Ketegal nya, sida nyau enda berani agi lalu ati sida berasai takut.
6 Pengudah Josua nemu pasal utai ke nyadi, iya pan nyarikka gari diri, lalu nyungkurka diri ba tanah ba mua peti lampang batu Adat Jehovah sampai mata panas padam. Bala tuai orang Israel pan ngereja utai ti sama. Sida iya malut pala diri ngena tanah.
7 Ku Josua madahka: “O Tuan ti Pemadu Tinggi, Jehovah, nama kebuah Nuan ngasuh kami meraka Sungai Jordan, lalu nyerahka kami ngagai orang Amor ngambika dibunuh? Endaka manah agi enti kami terus diau ba sepiak timur Sungai Jordan?
8 Ampun meh aku Jehovah. Aku nyau enda ulih mansutka jaku agi. Orang Israel nyau udah ngerarika diri ari munsuh.
9 Enti orang Kanaan enggau orang bukai ba menua tu nemu pasal tu, sida tentu deka datai ngelingi kami lalu munuh kami, lalu nadai siku pan orang ba dunya tu deka ingatka nama kami. Endaka tu deka ngemaluka nama Nuan?”
10 Ku Jehovah nyaut Josua: “Angkat nuan! Nama kebuah nuan nyungkurka diri ba tanah?
11 Orang Israel udah bedosa. Sida udah ngelanggar sempekat ke diasuh Aku titih sida. Sida udah ngambi sekeda utai ke patut dianchurka sida. Sida ngenchuri utai nya, lalu ngelalaika utai nya begulai enggau utai sida empu.
12 Nya meh kebuah orang Israel enda ulih ngalahka munsuh. Sida iya deka ngerarika diri ari munsuh, laban sida iya empu udah nyadi utai ke patut dianchurka. Aku sigi enda enggau kita agi enti kita enda muai nama-nama utai ke patut dianchurka ari bala kita.
13 Angkat nuan lalu tentuka bansa nya tuchi. Padah ngagai sida, ‘Tentuka diri kita tuchi ke pagila, laban tu meh utai ke dipadahka Jehovah, Petara orang Israel: “O Israel, utai ke patut dianchurka kita bisi ba bala kita. Kita enda ulih menang ngelaban munsuh seagi-agi kita enda muai nya ari bala kita.
14 Pagi pagila semua kita deka mansang ke depan. Ari semua raban bansa, siti raban bansa ke dipilih Jehovah deka mansang ke depan. Ari siti raban bansa, siti suku raban bansa ke dipilih Jehovah deka mansang ke depan. Ari suku raban bansa nya, ruang bilik ke dipilih Jehovah deka mansang ke depan. Lalu ari ruang bilik nya, siku deka dipilih.
15 Orang ke ditemu kita ngambi utai ke patut dianchurka mesti dibunuh lalu ditunu, nyengkaum semua utai ke diempu iya, laban iya udah ngelanggar sempekat Jehovah, lalu ba bala orang Israel, iya udah ngereja utai ti ngemaluka.”’”
16 Pagi siti, Josua dani tumu. Iya ngasuh orang Israel mansang ke depan, nitihka raban bansa sida, lalu raban bansa Judah dipilih.
17 Udah nya, iya ngasuh tiap iti suku raban bansa ari raban bansa Judah mansang ke depan, lalu suku raban bansa Zerah dipilih. Udah nya, iya ngasuh semua lelaki ari suku raban bansa Zerah mansang ke depan siku-siku, lalu Sabdi dipilih.
18 Kepenudi sekali, iya ngasuh sida ke ari ruang bilik Sabdi mansang ke depan siku-siku, lalu Akhan dipilih. Akhan nya anak Karmi enggau uchu Sabdi, ke datai ari peturun Zerah ba raban bansa Judah.
19 Josua lalu bejaku ngagai Akhan: “Anak, bebasa meh ngagai Jehovah, Petara orang Israel, lalu ngaku meh ngagai Iya. Padahka ngagai aku nama utai ke udah digaga nuan. Anang ngelalaika iya.”
20 Ku Akhan nyaut Josua: “Kebendar iya, aku meh ke udah bedosa ngagai Jehovah, Petara orang Israel. Tu meh utai ke udah digaga aku:
21 Entara barang-barang ke udah dirampas, aku bisi meda gari ti lawa ari Shinar, ke dikena orang ke bepangkat. Bisi mega dua kilogram* pirak enggau setengah kilogram* emas. Aku inginka semua utai nya. Nya alai, aku ngambi iya, lalu ngelalaika nya ba dalam tanah, ba langkau aku. Lalu emas enggau pirak nya diengkah ba baruh sekali.”
22 Josua pan lalu ngasuh beberapa iku orang ngagai langkau Akhan. Sida lalu belanda ngagai langkau nya. Ba dia sida tetemuka gari ke dilalaika Akhan, lalu pirak enggau emas dilalaika ba baruh sekali.
23 Nya alai, sida ngambi barang nya, lalu mai barang nya ngagai Josua enggau semua orang Israel. Sida ngengkahka barang nya ba depan Jehovah.
24 Udah nya, Josua enggau semua orang Israel mai Akhan, ke ari suku raban bansa Zerah, ngagai Lebak Akor. Pirak, emas, enggau gari ti lawa ke dichuri Akhan mega dibai kia. Sida mega mai bala anak iya, sapi iya, keledai iya, jelu tupi iya ke bukai, langkau kain iya, enggau semua utai ke diempu iya ngagai endur nya.
25 Ku Josua madah: “Nama kebuah nuan mai penusah* ngagai kami? Seharitu, Jehovah deka ngasuh nuan ditinggang penusah.” Nya alai, semua orang Israel nikauka batu ngagai Akhan enggau sida sebilik, lalu udah nya nunu sida. Baka nya meh chara sida dibunuh ngena batu.
26 Udah nya, sida ngengkahka tugung batu ti besai kena nutup bangkai Akhan. Jehovah pan nyau enda agi ringat. Nya alai, endur nya dikumbai Lebak Akor* nyentukka seharitu. Tugung batu nya agi bisi ba dia sampai ke diatu.
Nota Kaki
^ Reti nya “Kuari.”
^ Jaku Asal, “200 shekel.” Peda Rujukan B14.
^ Jaku Asal, “50 shekel.” Peda Rujukan B14.
^ Tauka “bencana.”
^ Reti nya “Bencana.”
