Josua 8:1-35
8 Udah nya, Jehovah madah ngagai Josua: “Anang takut tauka rawan. Bai semua soldadu ngelaban kuta Eyai. Aku udah nyerahka raja Eyai, bala rayat iya, kuta iya, enggau menua iya ngagai nuan.
2 Anchurka kuta Eyai lalu bunuh raja Eyai, baka ke udah digaga nuan ngagai kuta Jeriko enggau raja Jeriko. Tang kali tu kita ulih ngambi utai enggau jelu tupi ba dia. Tentuka bisi bala soldadu besedia deka nyerang kuta nya enggau ngenyit ari belakang.”
3 Nya alai, Josua enggau semua raban soldadu mansang ngelaban kuta Eyai. Josua milih 30,000 iku soldadu ti kering lalu ngasuh sida iya kin maya malam hari.
4 Iya madahka pesan tu ngagai sida: “Semua kita mesti belalai ba belakang kuta nya lalu besedia deka nyerang iya enggau ngenyit. Anang kelalu jauh ari kuta nya.
5 Aku enggau bala soldadu ke enggau aku deka mansang ngagai kuta nya. Lalu lebuh orang Eyai pansut deka nyerang kami, kami deka ngerarika diri ari sida baka sebedau tu.
6 Sida deka berunding, ‘Orang Israel ngerarika diri ari kitai baka suba.’ Nya alai, lebuh sida mansang ngagai kami, kami deka ngumpan sida ngambika sida jauh ari kuta nya.
7 Udah nya, kita patut pansut ari endur kita belalai lalu nyerang kuta nya enggau ngenyit. Petara kita, Jehovah, deka nyerahka kuta nya ngagai kita.
8 Kita mesti nunu kuta nya pengudah kita nguasa iya. Titihka jaku Jehovah. Nya meh pesan aku ngagai kita.”
9 Udah nya Josua ngasuh sida mupuk, lalu sida pan mupuk ngagai endur sida iya patut belalai. Sida iya belalai ba sepiak barat Eyai, ba entara Bethel enggau Eyai. Tang Josua enda enggau sida. Iya bemalam enggau soldadu ke bukai.
10 Pagi siti, Josua dani tumu lalu ngempuruka bala soldadu. Iya enggau bala tuai orang Israel mai bala soldadu ngagai kuta Eyai.
11 Semua soldadu ke enggau Josua mansang ngagai depan kuta Eyai. Sida iya nirika kem ba begian utara Eyai, lalu ba entara sida enggau kuta nya bisi lebak.
12 Ba maya ti sama, Josua udah ngasuh kira-kira 5,000 iku soldadu belalai ba sepiak barat kuta Eyai, ba entara Bethel enggau Eyai.
13 Raban soldadu ti besai nirika kem ba begian utara kuta nya, lalu raban soldadu ke bukai belalai ba begian barat kuta nya. Malam nya, Josua mansang ngagai tengah-tengah lebak.
14 Lebuh raja orang Eyai meda orang Israel, iya lalu mai bala soldadu iya pansut ari kuta nya tumu pagi, laban deka beperang ngelaban orang Israel ba siti endur ba depan padang pasir. Tang iya enda nemu bisi siti da agi raban ke benung belalai deka nyerang kuta nya enggau ngenyit ari belakang.
15 Lebuh bala soldadu Eyai datai nyerang, Josua enggau semua soldadu orang Israel ke enggau iya ngerarika diri nengah jalai ti nuju ngagai menua puang.
16 Udah nya, semua lelaki ba kuta nya diasuh ngagai bala soldadu orang Israel. Nya alai, sida makin jauh-sejauh ari kuta nya.
17 Nadai siku pan orang lelaki ke tinggal ba kuta Eyai enggau Bethel. Semua sida pansut begagaika orang Israel, lalu maya nya pintu kuta ditejuka sida tebuka.
18 Jehovah lalu bejaku ngagai Josua: “Tujuka sangkuh ke dipegai nuan ngagai kuta Eyai. Aku deka nyerahka kuta nya ngagai nuan.” Josua pan ngereja nya.
19 Lebuh Josua ngangkatka jari iya, bala raban soldadu ke benung belalai lalu belanda enggau jampat nyerang kuta nya enggau ngenyit. Pengudah sida nguasa kuta nya, sida lalu terus nunu kuta nya.
20 Lebuh bala soldadu Eyai malik ke belakang, sida meda asap ari kuta nya niki ke langit. Ketegal nya, sida nadai daya lalu enda nemu kini penunga deka ngerarika diri. Udah nya, bala soldadu Israel ke benung ngerarika diri ngagai menua puang nikal baru lalu nyerang bala munsuh ke begagaika sida.
21 Lebuh Josua enggau semua soldadu Israel ke enggau iya meda asap ari kuta nya niki ke langit, sida pan nemu raban soldadu ke nyerang kuta nya enggau ngenyit udah mujur nguasa kuta nya. Nya alai, sida nikal baru lalu nyerang bala soldadu Eyai.
22 Raban soldadu ke bisi ba kuta nya mega mansang deka nyerang raban soldadu Eyai. Nya alai, raban soldadu Eyai enda ulih ngerarika diri laban bisi soldadu Israel ba depan enggau ba belakang sida. Bala soldadu Israel pan munuh semua sida. Nadai siku pan sida ulih nyelamatka diri.
23 Tang raja Eyai enda dibunuh. Iya ditangkap lalu dibai ngagai Josua.
24 Semua soldadu Eyai ke begagaika soldadu Israel ba menua puang udah dibunuh magang ngena pedang. Udah nya, semua soldadu Israel mansang ngagai kuta Eyai lalu munuh semua orang ke bisi ba kuta nya ngena pedang.
25 Ba hari nya, semua orang Eyai mati dibunuh enda ngira lelaki tauka indu, lalu semua penyampau sida 12,000 iku.
26 Josua enda ngetu nujuka sangkuh ke dipegai iya ngagai kuta Eyai nyentukka semua orang ba Eyai mati dibunuh.
27 Tang jelu tupi enggau utai ba kuta nya diambi orang Israel, sejalai enggau pesan Jehovah ngagai Josua.
28 Udah nya, Josua nunu kuta Eyai. Semina tugung batu aja ke tinggal nyadi tembawai sampai seharitu.
29 Josua munuh raja Eyai lalu ngantung bangkai iya ba tiang* sampai ke lemai. Lebuh mata panas nyauka padam, Josua ngasuh orang nurunka bangkai iya ari tiang nya. Udah nya, sida muai bangkai nya ba pintu penama kuta lalu ngengkahka tugung batu ti besai ba atas bangkai nya. Tugung batu nya agi bisi ba dia sampai seharitu.
30 Udah nya, Josua ngaga alta* ba Gunung Ebal ke Jehovah, Petara orang Israel.
31 Alta nya digaga sejalai enggau utai ke dipadah nembiak Jehovah, Moses, ngagai orang Israel, baka ke ditulis ba bup Adat Moses: “Alta digaga ari batu lalu nadai perengka besi dikena ngaga alta nya.” Ba atas alta nya sida nyerahka pemeri tunu enggau pemeri bebaik ngagai Jehovah.
32 Udah nya, Josua ngaga siti salinan Adat ke udah ditulis Moses ba depan orang Israel. Josua nulis salinan nya ba batu.
33 Semua orang Israel, bala tuai, bala pegawai, bala hakim, enggau orang asing bediri ba dua piak peti lampang batu Adat Jehovah. Sida bediri nunga ngagai bala imam Lewi ke ngesan peti lampang batu Adat nya. Setengah ari sida bediri ba depan Gunung Gerisim, lalu setengah agi bediri ba depan Gunung Ebal. Baka nya meh chara orang Israel diberekat, baka ke udah dipadah nembiak Jehovah, Moses.
34 Udah nya, Josua macha enggau inggar semua utai ke bisi ba Adat nya, nyengkaum berekat enggau sumpah, sejalai enggau semua utai ke ditulis ba bup Adat nya.
35 Semua pesan Moses dibacha Josua enggau inggar ba depan bansa Israel, nyengkaum sida ke indu, bala anak, enggau orang asing ke begulai enggau sida.
