Luke 1:1-80
1 Tuan Teopilus ti dipebasa, mayuh orang udah enggau naka ulih ngumpul sereta nulis pekara ti amat dipechaya kitai.
2 Utai ke ditulis sida sejalai enggau penerang ari orang ke meda utai ke nyadi kenyau ari pun, sereta ari orang ke nusui pesan Petara.
3 Tuan Teopilus ti dipebasa, aku mega udah mansik pekara nya enggau bejimat kenyau ari pun. Nya alai, aku keran deka nulis semua penerang ke ngena nya, nitihka tusun ti patut ngagai nuan,
4 ngambika nuan nemu utai ke udah diajar ngagai nuan nya, amat.
5 Maya jeman Herod,* iya nya raja Judea, bisi siku imam ke benama Sekariah. Iya gawa dalam raban Abijah. Bini iya ke benama Elisabet datai ari peturun Aron.
6 Seduai iya ngereja utai ti ngena ba mua Petara. Seduai iya orang ke lurus, lalu ngasika semua pesan sereta adat Jehovah.*
7 Tang seduai iya nadai anak laban Elisabet enda ulih beranak, lalu seduai iya nyau udah tuai.
8 Maya gintir raban Sekariah gawa nyadi imam ba mua Petara,
9 Sekariah dipilih ngena chara bechabut undi, nitihka adat asal bala imam. Iya tama ngagai Rumah Sembiang Jehovah lalu nunu menyan.
10 Lebuh menyan nya ditunu, orang mayuh besampi ba luar.
11 Maya nya, melikat Jehovah ayan ba mua Sekariah. Melikat nya bediri ba sepiak kanan alta* ke dikena nunu menyan.
12 Lebuh Sekariah meda melikat nya, iya charut runding sereta takut.
13 Tang ku melikat nya bejaku ngagai iya: “Anang takut, Sekariah, laban sampi nuan udah didinga Petara. Lalu bini nuan Elisabet deka ngadaka siku anak lelaki, lalu nuan deka meri nama iya John.
14 Nuan deka gaga sereta amat lantang ati, lalu mayuh orang deka gaga ati lebuh iya ada.
15 Laban iya deka nyadi orang ti bekuasa ba mata Jehovah, tang iya enda tau ngirup wain tauka ai bisa. Indah sebedau iya ada deh, Petara deka meri iya kuasa kudus.*
16 Iya deka mai mayuh orang Israel pulai baru ngagai Jehovah, Petara sida.
17 Iya mega deka bejalai dulu ari Petara enggau pengeransing sereta kuasa, ti sama baka Elijah. Iya deka ngubah ati apai nyadi baka ati anak, lalu ngubah orang ke enggai ngasi, ngambika sida bulih penemu-dalam orang ke lurus. Enggau nya, iya deka ngempuruka orang ti udah sedia deka nyembah Jehovah.”
18 Sekariah bejaku ngagai melikat nya: “Baka ni ku aku ulih arapka utai tu deka nyadi? Aku nyau tuai, lalu bini aku pan nyau udah tuai.”
19 Ku melikat nya nyaut: “Aku tu Gabriel, ke seruran bediri ba mua Petara. Aku udah diasuh madahka berita manah tu ngagai nuan.
20 Jaku aku deka nyadi ba maya ti udah ditetapka. Tang ketegal nuan enda arapka jaku aku, nuan deka nyadi bisu. Nuan enda ulih bejaku nyentuk ngagai semua utai nya nyadi.”
21 Maya nya, orang mayuh benung nganti Sekariah ba luar. Sida alit ati laban iya lama amat ba Rumah Sembiang.
22 Lebuh iya pansut, iya enda ulih bejaku ngagai sida. Nya alai, sida ngumbai iya baru udah meda utai ti nyelai* ba Rumah Sembiang. Ketegal iya enda ulih bejaku, iya majak bejaku enggau sida ngena jari.
23 Lebuh timpuh iya gawa ba Rumah Sembiang udah tembu, iya pulai ke rumah.
24 Enda lama udah nya, bini iya Elisabet betubuh-bisi. Nya alai, Elisabet enda pansut ari rumah pengelama lima bulan. Ku Elisabet bejaku:
25 “Tu meh utai ke udah digaga Jehovah ke aku diatu. Iya kasihka aku, lalu muai pemalu* ti udah ditatka aku di mua orang mayuh.”
26 Lebuh iya betubuh-bisi enam bulan, Petara ngirumka Melikat Gabriel ngagai nengeri ke dikumbai Nasaret ba Galili,
27 ngambika betemu enggau siku indu dara ke benama Maria. Iya udah betunang enggau siku lelaki ke benama Josep, ke ari peturun David.
28 Melikat nya tama ke dalam rumah iya lalu bejaku: “Tabi ke nuan Maria, Jehovah amat gaga ati ke nuan, lalu Iya merekatka nuan.”*
29 Tang Maria berasai balat amat kesal lebuh ninga nya, lalu nguji meretika utai ku* melikat nya.
30 Melikat nya pan bejaku ngagai iya: “Anang takut, Maria, laban Petara gaga ati ke nuan.
31 Nuan deka betubuh-bisi lalu ngadaka siku anak lelaki. Nuan patut meri iya nama Jesus.
32 Iya deka nyadi orang ti bemulia, lalu dikumbai Anak Petara ti Pemadu Tinggi. Petara Jehovah deka meri iya kerusi diraja aki iya David.
33 Iya deka nyadi Raja ti merintah peturun Jakop belama iya. Lalu Perintah iya enda nemu abis.”
34 Tang Maria bejaku ngagai melikat nya: “Baka ni ku utai tu tau nyadi? Aku agi dara.”
35 Ku melikat nya nyaut: “Kuasa kudus Petara deka datai atas nuan, lalu kuasa Petara ti Pemadu Tinggi deka ngelindung nuan. Nya alai, anak ke diadaka nuan nya ila, deka dikumbai kudus sereta dikumbai Anak Petara.
36 Kaban belayan nuan Elisabet mega benung betubuh-bisi enam bulan, taja pan iya nyau tuai lalu dikumbai orang enda ulih beranak.
37 Laban nadai utai ke disebut Petara enda kala enda nyadi.”
38 Udah nya, ku Maria: “Aku tu ulun indu Jehovah! Awakka utai ke disebut nuan nya nyadi ba aku.” Melikat nya pan mupuk ninggalka Maria.
39 Maya nya mega, Maria beguai-guai mupuk ngagai sebuah nengeri ti bebukit ba menua Judah.
40 Iya tama ngagai rumah Sekariah, lalu meri tabi ngagai Elisabet.
41 Lebuh Elisabet ninga jaku tabi Maria, anak dalam kandung Elisabet lalu engkebut. Udah nya, Petara meri kuasa kudus ngagai Elisabet,
42 lalu Elisabet bejaku enggau nyawa ti inggar: “Beberekat meh nuan ari semua indu ke bukai, lalu beberekat meh anak ke dikandungka nuan!
43 Tu endang sigi basa ti besai ke aku, laban indai Tuan aku udah datai nemuai ngagai aku.
44 Lebuh aku ninga jaku tabi nuan tadi, anak dalam kandung aku engkebut gaga ati.
45 Gaga ati meh indu ke arap, laban semua utai ke disebut Jehovah ngagai iya deka dikeamatka.”
46 Maria lalu bejaku: “Aku ngemesaika Jehovah,
47 lalu ati aku balat gaga ketegal Petara ti Penyelamat aku.
48 Iya udah meratika ulun indu Iya ti baruh pendiau. Belabuh ari diatu, semua rebak deka ngumbai aku beberekat,*
49 laban Petara ti bekuasa udah ngereja utai ti ngalitka ati ke aku. Nama Iya kudus,
50 lalu ari rebak siti ngagai rebak siti, orang ke nangika Iya deka bulih pengasih ari Iya.
51 Iya udah ngereja utai ti besai ngena lengan Iya. Iya udah ngasuh orang ke bisi ati ti sumbung, pambar.
52 Iya udah muai orang ke besai pangkat ari kerusi diraja sida, lalu ngeninggika orang ke baruh pendiau.
53 Iya meri utai ke manah ngagai orang ke suntuk nyentukka sida berasai puas, lalu muru orang ke kaya ngambika sida pulai nadai mai utai.
54 Iya udah nulung nembiak Iya, Israel, kena nunjukka Diri ingatka sempekat Iya ti deka ngayanka pengasih
55 ngagai Abraham enggau peturun iya datai ke belama iya. Nya meh utai ke dipadah Iya ngagai aki ini kitai.”
56 Maria diau enggau Elisabet kira-kira tiga bulan. Udah nya, iya pulai ngagai rumah iya empu.
57 Maya pan datai alai Elisabet beranak. Iya ngadaka siku anak lelaki.
58 Orang ke berimbai pendiau sereta kaban belayan sama gaga ati enggau Elisabet, laban sida ninga Jehovah udah ngayanka pengasih ti besai ngagai iya.
59 Ba hari ti kelapan, sida datai laban anak nya deka disunat.* Sida deka meri iya nama Sekariah, ngangkatka nama apai iya.
60 Tang ku indai iya bejaku: “Anang! Nama iya John.”
61 Ku sida nyaut: “Tang nuan nadai kaban belayan ke ngena nama nya.”
62 Udah nya, sida bejaku ngena jari ngagai apai anak nya. Sida nanya iya baka ni sida deka ngangauka anak mit nya.
63 Iya minta siti papan lalu nulis ba papan nya: “Nama iya John.” Semua sida alit ati.
64 Tekala nya, iya nyau ulih bejaku baru. Iya lalu bejaku muji Petara.
65 Semua orang ke berimbai pendiau enggau sida berasai alit ati. Lalu semua utai ke nyadi nya ditusui ba serata endur ti bebukit ba Judea.
66 Semua orang ke ninga, seruran berundingka nya sereta nanya dalam ati diri: “Nama penyadi anak tu ila?” Laban kuasa Jehovah amat bisi enggau nembiak nya.
67 Udah nya, Petara meri Sekariah, apai John, kuasa kudus. Lalu Sekariah belabuh benabi:
68 “Pujika Jehovah, Petara orang Israel, laban Iya udah kasihka nembiak Iya lalu ngelepaska sida.
69 Iya udah meri siku penyelamat ti kering* ke kitai, ari peturun David, ulun Iya,
70 munyi ke disebut Iya nengah bala nabi Iya ti kudus dulu kelia.
71 Iya ngereja nya kena nyelamatka kitai ari bala munsuh sereta ari semua orang ke begedika kitai,
72 kena ngayanka pengasih ketegal aki ini kitai, sereta kena ngingatka sempekat Iya ti kudus,
73 iya nya semaya ke digaga Iya ngena sumpah enggau aki kitai Abraham.
74 Pengudah Iya nyelamatka kitai ari munsuh, Iya meri kitai basa bejalaika pengawa ti tuchi ke Iya enggau ati ti berani,
75 ngambika kitai mengkang taluk sereta ngereja utai ti ngena ba mata Iya sepemanjai umur kitai.
76 Tang nuan, anak aku, nuan deka dikumbai nabi Petara ti Pemadu Tinggi. Nuan deka bejalai dulu ba mua Jehovah, nyediaka jalai ke Iya.
77 Nuan deka meri penemu ngagai nembiak Petara, pasal Petara ke deka ngampunka dosa sida kena nyelamatka sida,
78 laban Petara kitai nya pengasih. Pengasih nya ke ari serega, deka manchar ngagai kitai baka mata panas ke tumbuh.
79 Penampak nya deka meri penerang ngagai orang ke diau dalam pemetang sereta dalam ayuk pemati, lalu ngiring kitai ngambika nengah jalai ti likun.”
80 Anak nya mansang besai sereta kering ba tubuh enggau pengarap. Iya mengkang diau ba menua puang nyentuk ngagai maya iya nginjil ngagai orang Israel.
Nota Kaki
^ Peda Penerang Leka Jaku.
^ Peda nota kaki ba Matthew 1:20.
^ Peda Penerang Leka Jaku.
^ Peda Penerang Leka Jaku.
^ Tauka “meda genera.”
^ Iya nya, dikemaluka orang ketegal nadai anak.
^ Jaku Asal, “Iya bisi enggau nuan.”
^ Tauka “jaku tabi ari.”
^ Tauka “gaga ati.”
^ Tauka “ditutus.”
^ Jaku Asal, “udah ngangkatka tanduk penyelamat.” Peda Penerang Leka Jaku, “Tanduk.”
