Luke 14:1-35
14 Nyadi sekali maya Hari Sabat, Jesus makai ba rumah siku ketuai orang Parisi. Orang ba dia bendar amat beratika Jesus.
2 Ba mua iya bisi siku lelaki ke merinsa ketegal sebengkah penyakit.* Penyakit nya ngasuh tubuh iya kembai.
3 Nyadi Jesus nanya sida ke landik pasal Adat enggau orang Parisi: “Kati nya ngelanggar Adat enti kitai ngeraika orang maya Hari Sabat?”
4 Tang sida enda bemunyi. Nya alai, Jesus megai lelaki nya, ngeraika iya, lalu ngasuh iya pulai.
5 Udah nya iya madah ngagai sida: “Enti anak lelaki tauka sapi kita labuh ngagai telaga maya Hari Sabat, sapa entara kita ke enda beguai deka narit iya pansut?”
6 Sida enda tesautka iya.
7 Lebuh Jesus meda bala temuai ba dia rinduka endur ti pemadu badas, iya madahka siti jaku sempama ngagai sida:
8 “Lebuh orang mai kita ngagai pengerami tikah, anang duduk ba endur ti pemadu badas, laban engka orang ke tinggi agi pangkat ari kita mega bisi dikangau datai.
9 Udah nya, orang ke mai kita ngagai pengerami tikah nya deka datai lalu bejaku ngagai kita, ‘Awakka iya duduk ba endur tu.’ Kita tentu berasai malu lalu mindah ngagai endur ti pemadu belakang.
10 Tang lebuh kita dibai ngagai pengerami tikah, duduk meh ba endur ti pemadu belakang. Lebuh orang ke mai kita ngagai pengerami tikah nya datai, iya deka bejaku ngagai kita, ‘Unggal, aram duduk ba endur ke manah agi.’ Maya nya, kita deka dipebasa ba mua semua temuai.
11 Laban barang sapa ke ngeninggika diri, deka dikemaruhka. Lalu barang sapa ke ngemaruhka diri, deka ditinggika.”
12 Udah nya, Jesus madah ngagai orang ke udah mai iya datai: “Lebuh nuan nyediaka pengerami makai besai maya tengah hari tauka maya malam hari, anang mai bala kaban, bala menyadi, bala kaban belayan, tauka orang ke diau semak nuan ke kaya. Laban ila, sida mega engka mai nuan datai makai. Enti pia, nuan udah nerima upah nuan.
13 Tang lebuh nuan nyediaka pengerami makai besai, bai meh orang ke seranta, ke tachat, ke pinchat, enggau ke buta.
14 Nya baru nuan deka gaga ati, laban sida nadai nama-nama utai kena malas pemanah nuan. Nuan deka nerima upah nuan lebuh orang ke lurus diidupka baru.”
15 Lebuh ninga nya, siku ari temuai ba dia madahka ngagai iya: “Gaga ati meh orang ke makai ba Perintah Petara.”
16 Jesus madah ngagai iya: “Siku lelaki nyediaka pengerami makai besai, lalu iya mai mayuh temuai datai.
17 Lebuh maya pengerami nya nyauka berengkah, iya ngasuh ulun iya madah ngagai bala temuai ke udah dibai iya datai, ‘Datai meh, laban semua utai udah sedia.’
18 Tang semua sida ngiga tegal ngambika enda datai. Siku ari sida madahka, ‘Aku baru udah meli tanah lalu aku deka meda tanah nya. Minta ampun, aku enda ulih datai.’
19 Siku da agi madahka, ‘Aku baru udah meli 10 iku sapi lalu aku deka meresa sida. Minta ampun, aku enda ulih datai.’
20 Ku siku agi madahka, ‘Aku baru udah kawin, nya alai aku enda ulih datai.’
21 Nyadi ulun nya pan pulai, lalu madahka utai nya ngagai tuan iya. Tuan nya ringat lalu madah ngagai ulun iya, ‘Alai, jampat nuan ngagai jalai besai enggau jalai mit ba nengeri, lalu bai kitu orang ke seranta, ke tachat, ke buta, enggau ke pinchat.’
22 Pengudah ulun nya pulai, iya madahka, ‘Tuan, utai ke diasuh nuan udah digaga aku. Tang kitai agi bisi endur ke orang ke datai.’
23 Nya alai tuan nya madahka ngagai ulun iya, ‘Alai nuan mupuk ngagai jalai bukai ba luar nengeri, lalu bebendar meh ngasuh orang datai ngambika rumah aku penuh laban orang.
24 Aku madah ngagai nuan: Nadai siku pan ari bala temuai ke dulu dibai datai nya deka makai ba pengerami makai besai ke disediaka aku.’”
25 Mayuh orang bejalai nitihka Jesus. Jesus malik ngagai sida lalu madahka:
26 “Barang sapa ke datai ngagai aku lalu iya lebih agi rinduka* apai, indai, bini, anak, diri menyadi, tauka indah diri empu, iya enda ulih nyadi murid aku.
27 Barang sapa ke enda ngesan tiang perinsa* iya lalu nitihka aku, enda ulih nyadi murid aku.
28 Ambika chunto, sapa ari bala kita ke deka ngaga sebuah menara enda duduk dulu ngira ungkus utai nya, ngambika iya nemu sekalika iya bisi duit kena nembuka pengawa nya?
29 Enti enda, iya engka nudukka pugu menara nya tang enda ulih nembuka pengawa nya, lalu semua orang ke meda nya deka ngeleseka iya.
30 Ku sida: ‘Orang tu berengkah ngaga utai tang enda ulih nembuka pengawa iya.’
31 Tauka enti siku-siku raja deka beperang ngelaban raja ke bukai, endaka raja nya deka duduk dulu lalu baum enggau bala pemesai iya, ngambika iya nemu sekalika 10,000 iku soldadu iya ulih beperang ngelaban raja ke bisi 20,000 iku soldadu?
32 Tang enti iya nemu diri enda ulih menang, iya deka nganjung bala pengari iya ngagai munsuh iya kala ke munsuh iya agi jauh, lalu minta deka bebaik enggau sida.
33 Pia mega, kita patut ingat, kita enda ulih nyadi murid aku seagi-agi kita enda ngelengkaka semua reta kita.
34 “Garam endang manah. Tang enti iya nadai agi masin, baka ni ku kita deka ngasuh iya masin baru?
35 Ketegal garam nya enda ulih dichampurka enggau tanah tauka baja, orang deka muai iya. Awakka orang ke bisi pending, ninga enggau manah.”
Nota Kaki
^ Tauka “penyakit edema.” Sebengkah penyakit ke ngasuh tubuh ngembuan kelalu mayuh ai.
^ Jaku Asal, “enda begedika.” Leka jaku “begedika” ba ditu mai reti “kurang agi rinduka.”
^ Peda Penerang Leka Jaku.
