Luke 17:1-37
17 Udah nya, iya bejaku ngagai bala murid iya: “Pekara ke ngasuh orang labuh ba pengarap tentu deka bisi. Tang tulah meh orang ke ngasuh pekara nya nyadi.
2 Manah agi enti batu kisar ti besai digantung ba rekung orang nya lalu iya dibuai ngagai tasik, ari ke nejuka iya ngasuh siku ari murid aku ke baka anak mit* labuh ba pengarap.
3 Bejimat meh. Enti menyadi* kita bedosa, rara iya. Lalu enti iya nesal ati, ampun meh iya.
4 Taja pan iya bedosa ngelaban nuan tujuh kali sehari, lalu datai ngagai nuan tujuh kali lalu iya nyebut, ‘Aku minta ampun,’ nuan patut ngampunka iya.”
5 Bala rasul bejaku ngagai Tuan Jesus: “Tambahka pengarap kami.”
6 Udah nya, ku Tuan Jesus nyaut: “Enti kita bisi pengarap ngemesai igi mustard,* kita ulih bejaku ngagai pun kayu* tu, ‘Techabut meh nuan lalu nanam diri empu ba tasik!’ lalu pun kayu nya deka ngasika kita.
7 “Sema kita bisi siku ulun ke benung ngeradu tanah tauka ngibun bedus. Pengudah iya pulai, sapa entara kita deka madah ngagai iya, ‘Jampat kitu lalu makai ba mija’?
8 Endaka kita deka madah ngagai iya, ‘Tukar gari nuan. Udah nya, sediaka pemakai kena aku makai malam, lalu intu aku nyentukka aku tembu makai enggau ngirup. Udah nya, baru nuan ulih makai enggau ngirup.’
9 Kita tentu enda nyebut terima kasih ngagai ulun nya laban nya endang pengawa iya.
10 Pia mega pengudah kita ngereja semua pengawa ke diberi ngagai kita, sebut meh: ‘Kami ulun ke enda patut dipuji. Kami semina ngereja pengawa ke patut dikereja kami.’”
11 Lebuh mansang ngagai Jerusalem, Jesus mansa entara nengeri Samaria enggau Galili.
12 Lebuh iya tama ngagai siti genturung pendiau, 10 iku lelaki ke sakit lan* meda iya ari jauh. Sida bediri
13 lalu ngangau enggau nyawa ti inggar: “Jesus, Pengajar, kasih meh ke kami!”
14 Lebuh iya tepedaka sida, iya lalu bejaku ngagai sida: “Mupuk kita lalu betemu enggau bala imam.” Lebuh sida mansang kin, sida pan gerai.
15 Lebuh siku ari sida nemu diri udah gerai, iya nikal lalu ngemuliaka Petara enggau nyawa ti inggar.
16 Iya nyungkurka diri ba kaki Jesus lalu meri terima kasih ngagai iya. Lelaki nya orang Samaria.
17 Ku Jesus bejaku: “Ukai enda 10 iku digeraika? Ni semilan iku da agi deh?
18 Nama kebuah sida enda nikal lalu ngemuliaka Petara? Semina orang ke ari bansa bukai tu ke ngereja nya.”
19 Udah nya, ku Jesus bejaku ngagai iya: “Angkat, lalu pulai. Pengarap nuan udah ngeraika nuan.”
20 Lebuh ditanya orang Parisi pasal kemaya Perintah Petara deka datai, ku Jesus nyaut sida: “Perintah Petara enda datai enggau chara ti ditemu semua orang.
21 Orang mega enda madahka, ‘Peda kita ditu!’ tauka, ‘Peda kita din!’ laban Perintah Petara bisi ba entara kita.”
22 Udah nya, iya madah ngagai bala murid iya: “Hari deka datai alai kita ngarapka diri deka meda maya Anak Mensia bisi enggau kita, tang kita enda ulih meda nya.
23 Orang deka madah ngagai kita, ‘Peda, iya bisi ba din!’ tauka, ‘Peda, iya bisi ba ditu!’ Anang kita pansut tauka nitihka sida.
24 Baka kilat ti nyelar ari ujung langit siti ngagai ujung langit ke bukai, baka nya meh maya Anak Mensia bisi enggau kita.
25 Tang iya patut dulu napi mayuh pemerinsa sereta enda diterima rebak tu.
26 Baka maya jeman Noah kelia, baka nya meh gaya maya Anak Mensia bisi enggau kita.
27 Orang majak makai ngirup, jadi melaki-bini nyentuk ngagai maya Noah tama ke dalam bandung,* lalu Bah Besai datai ngemunaska semua sida.
28 Pia mega, maya jeman Lot kelia. Orang majak makai ngirup, bebeli enggau bejualka utai, betanamka utai, sereta begagaka rumah.
29 Tang ba hari Lot pansut ari Sodom, api enggau merirang nurun ari langit ngemunaska semua orang ba dia.
30 Baka nya meh gaya utai ke deka nyadi ba hari Anak Mensia mandangka diri.
31 “Maya nya ila, orang ke ba atas perabung enda patut nurun ngambi utai ke ba dalam rumah iya. Pia mega, orang ke ba ladang enda patut nikal ngambi utai ke tinggal.
32 Kingatka bini Lot.
33 Barang sapa ke deka ngidupka nyawa diri, deka ngelenyauka nyawa iya. Tang barang sapa ke ngelenyauka nyawa diri, deka nyelamatka nyawa iya.
34 Aku madah ngagai kita: Malam nya enti bisi dua iku orang ba siti katil, siku deka ditabanka, lalu siku deka ditinggalka.
35 Enti bisi dua iku indu begulai ngisar gandum, siku deka ditabanka lalu siku deka ditinggalka.”
36 * ——
37 Nya alai, bala murid iya nanya: “Tuan, dini alai utai nya deka nyadi?” Ku iya nyaut: “Dia alai bangkai, dia meh alai burung menaul deka begelumu.”
Nota Kaki
^ Tauka “siku ari sida ke mit ke arapka aku.”
^ Tu dituju ngagai menyadi Kristian.
^ Leka benih ti mit ke bisi ba menua Israel. Iya ulih tumbuh ngeninggi empat meter lalu bisi dan.
^ Tauka “pun kayu mulberry.”
^ Peda Penerang Leka Jaku.
^ Kapal besai ti baka kutak ti panjai.
^ Ayat tu nadai ditemu ba sekeda manuskrip ke lama, lalu engka ukai sebagi ari ayat ba Bup Kudus.
