Luke 18:1-43
18 Udah nya, Jesus madahka siti jaku sempama kena ngajar sida pasal sida ke patut seruran besampi lalu enda putus pengarap.*
2 Ku iya: “Ba siti nengeri bisi siku hakim ke enda nangika Petara sereta enda bebasaka orang.
3 Ba nengeri nya mega bisi siku indu balu ke suah betemu enggau iya lalu madahka, ‘Tentuka aku diakim enggau lurus lebuh orang ngelaban aku ba kot.’
4 Lama hakim nya enggai nulung indu balu nya. Tang udah nya, ku iya bejaku dalam ati diri, ‘Taja pan aku enda nangika Petara sereta enda bebasaka orang,
5 aku deka nentuka iya diakim enggau lurus, laban iya enda badu ngiruhka aku. Enti enda, iya tentu majak datai ngachau aku nyentukka aku nyau enda ulih tan agi.’”
6 Udah nya Tuan Jesus madahka: “Dinga meh utai ke disebut hakim nya, taja pan iya ukai orang ke lurus!
7 Pia mega, taja pan Petara nya sabar, endaka Iya deka nentuka nembiak ke dipilih Iya, ke ngangauka Iya siang enggau malam, diakim enggau lurus?
8 Aku madah ngagai kita: Petara deka jampat ngakim sida enggau lurus. Tang lebuh Anak Mensia datai, kati iya ulih tetemuka orang ke arap baka nya ba dunya tu?”
9 Jesus mega madahka siti jaku sempama ngagai orang ke ngumbai diri lurus tang ngemaruhka orang bukai.
10 Ku iya: “Dua iku lelaki ngagai Rumah Sembiang deka besampi. Siku nya orang Parisi lalu siku da agi pengumpul chukai.
11 Orang Parisi nya bediri lalu besampi dalam ati diri, ‘O Petara, aku beterima kasih ngagai Nuan laban aku enda baka pengumpul chukai tu, tauka orang ke ngerampas utai orang bukai, ngereja penyalah, sereta butang.*
12 Aku bepasa dua kali seminggu, lalu sebagi ari* utai ke diulih aku diberi aku nyadika pemeri.’
13 Tang pengumpul chukai nya bediri ari jauh, enda berani engkadah ke langit. Iya majak mandam dada diri lalu madahka, ‘O Petara, kasih meh ke aku laban aku orang ke bedosa.’
14 Aku madah ngagai kita: Maya orang tu pulai, ba mata Petara, iya jauh lurus agi ari orang Parisi nya. Laban tiap iku orang ke ngeninggika diri deka dikemaluka, tang barang sapa ke ngemaruhka diri deka ditinggika.”
15 Maya nya bisi orang mai anak ke agi mit* ngagai Jesus ngambika iya negu sida. Tang lebuh bala murid Jesus meda tu, sida nganu bala orang nya.
16 Taja pia, Jesus ngasuh anak mit nya dibai ngagai iya, lalu iya bejaku: “Awakka anak mit datai ngagai aku, anang nagang sida. Laban Perintah Petara deka diempu orang ke baka sida.
17 Enggau bendar aku madah ngagai kita: Barang sapa ke enda nerima Perintah Petara baka anak mit, iya enda ulih tama ngagai Perintah nya.”
18 Siku ari tuai bansa orang Judah nanya iya: “Pengajar ti Manah, nama pengawa ke patut dikereja aku, ngambika aku tau bulih pengidup ti meruan belama iya?”
19 Ku Jesus bejaku ngagai iya: “Nama kebuah nuan ngumbai aku manah? Nadai orang ke manah. Semina Petara siku aja ke manah.
20 Nuan nemu pesan tu: ‘Anang butang, anang munuh orang, anang ngenchuri, anang besaksi bula, sereta bebasaka apai indai nuan.’”
21 Disaut lelaki nya: “Semua pesan nya udah dititihka aku magang kenyau ari aku agi biak.”
22 Pengudah ninga saut ari lelaki nya, ku Jesus madahka, “Bisi siti agi utai ke patut dikereja nuan: Jual semua reta tengkira nuan lalu bagi duit nya ngagai orang ke seranta, lalu nuan deka bisi reta ba serega. Udah nya, aram nyadi murid aku.”
23 Lebuh lelaki nya ninga nya, iya balat tusah ati laban iya orang ti kaya bendar.
24 Jesus malik ngagai iya, lalu madahka: “Orang ke kaya endang tusah deka tama ngagai Perintah Petara!
25 Kebendar iya, jelu unta senang agi tama nengah lubang jarum ke dikena bejait ari orang ke kaya tama ngagai Perintah Petara.”
26 Sida ke ninga tu madahka: “Enti pia, sapa ulih diselamatka?”
27 Ku iya nyaut: “Utai ti enda ulih dikereja mensia, ulih dikereja Petara.”
28 Tang Peter madahka: “Kami udah ninggalka reta kami lalu nitihka nuan.”
29 Jesus madah ngagai sida: “Enggau bendar aku madah ngagai kita: Barang sapa ke udah ninggalka rumah, tauka bini, tauka diri menyadi, tauka apai indai, tauka anak, ketegal Perintah Petara,
30 deka nerima beberapa kali lipat mayuh agi ba jeman tu, lalu jemah ila,* iya deka bulih pengidup ti meruan belama iya.”
31 Udah nya, Jesus mai 12 iku rasul iya ke tisi, lalu madah ngagai sida: “Dinga kita, kitai benung mupuk ngagai Jerusalem, lalu semua utai ke ditulis bala nabi pasal Anak Mensia deka dikeamatka.
32 Iya deka diserahka ngagai orang bansa bukai lalu iya deka dikeleseka, diperinsa, sereta diludah.
33 Pengudah sida nyipat iya, sida deka munuh iya. Tang ba hari ti ketiga, iya deka diidupka baru.”
34 Tang sida enda meretika semua utai nya, laban reti iya udah dipelalaika ari sida.
35 Lebuh Jesus nyauka datai ba Jeriko, bisi siku lelaki ke buta benung duduk minta sedekah ba tisi jalai.
36 Lebuh iya ninga orang mayuh mansa, iya lalu nanya sida nama utai ke benung nyadi.
37 Sida madah ngagai iya: “Jesus, orang Nasaret nya, benung mansa.”
38 Iya lalu ngangau enggau nyawa ti inggar: “Jesus, Anak David, kasih meh ke aku!”
39 Orang ke bejalai ba mua bala orang mayuh ngerara iya, lalu ngasuh iya badu agi ragak. Tang iya ngangau inggar agi: “Anak David, kasihka aku!”
40 Jesus ngetu lalu ngasuh lelaki nya dibai ngagai iya. Lebuh lelaki nya datai semak, Jesus nanya iya:
41 “Nuan deka aku ngereja nama ke nuan?” Iya nyaut: “Tuan, awakka aku ulih meda.”
42 Jesus madah ngagai iya: “Awakka nuan ulih meda. Pengarap nuan udah ngeraika nuan.”
43 Tekala nya iya lalu ulih meda, lalu nitihka Jesus sereta ngemuliaka Petara. Lebuh orang mayuh meda nya, semua sida lalu muji Petara.
Nota Kaki
^ Tauka “putus asa.”
^ Orang ti udah kawin ngereja ulah seks enggau orang ke ukai kaling pengidup iya.
^ Peda nota kaki ba Matthew 23:23.
^ Tauka “anak ke baru ada.”
^ Peda Penerang Leka Jaku, “Sistem dunya.”
