Luke 23:1-56
23 Nya alai, semua orang bediri lalu mai Jesus ngagai Pilate.
2 Sida belabuh nuduh iya lalu madahka: “Lelaki tu ditemu kami nesatka bansa kami. Iya nagang orang mayar chukai ngagai raja Rome* lalu ngumbai diri Kristus sereta raja.”
3 Nyadi, Pilate nanya iya: “Kati nuan Raja orang Judah?” Disaut Jesus: “Nuan empu udah meri saut.”
4 Udah nya, Pilate bejaku ngagai bala tuai imam enggau orang mayuh: “Aku nadai tetemuka penyalah lelaki tu.”
5 Tang sida majak madahka: “Iya ngajar ari Galili nyentuk ngagai endur tu. Lalu ngasuh orang ba serata Judea begau.”
6 Lebuh ninga tu, Pilate nanya iya sekalika iya orang Galili tauka ukai.
7 Pengudah Pilate nemu Jesus datai ari endur ke dipegai Herod, iya nganjung Jesus ngagai Herod. Maya nya, Herod mega bisi ba Jerusalem.
8 Herod kala ninga mayuh berita pasal Jesus. Nya alai, iya amat gaga ati lebuh meda Jesus. Iya udah lama deka betemu enggau Jesus, lalu ngarapka diri ulih meda Jesus ngaga kereja ajih.
9 Iya pan belabuh nanya Jesus mayuh utai. Tang Jesus seleka jaku pan enda nyaut iya.
10 Bala tuai imam enggau bala penulis Adat balat pedis ati lalu majak bediri nuduh Jesus.
11 Udah nya, Herod enggau bala soldadu iya ngeleseka Jesus. Herod ngerasukka baju jubah ti manah ba Jesus kena ngemelika Jesus, lalu nganjung Jesus pulai baru ngagai Pilate.
12 Sebedau nya, Herod enggau Pilate bemunsuh enggau pangan diri. Tang kenyau ari sehari nya, seduai iya nyau bekaban.
13 Udah nya, Pilate ngempuruka bala tuai imam, bala ketuai, enggau orang mayuh.
14 Ku iya bejaku ngagai sida: “Kita mai lelaki tu ngagai aku, lalu madahka iya ngasut* orang ngelaban perintah. Aku udah nasat iya ba mua kita. Tang aku nadai tetemuka iya udah ngereja penyalah baka ke disebut kita.
15 Herod pan nadai tetemuka penyalah orang tu. Nya alai, Herod nganjung iya pulai baru ngagai kami. Iya nadai ngereja utai ti tau ngasuh iya diukum bunuh.
16 Nya alai, aku deka ngukum iya lalu ngelepaska iya.”
17 * ——
18 Tang semua orang ba dia manjung enggau nyawa ti inggar: “Bunuh iya! Kami minta Barabas dilepaska.”
19 (Barabas udah dijil ketegal iya enggau orang ngelaban perintah ba nengeri nya sereta udah munuh orang.)
20 Pilate deka ngelepaska Jesus. Nya alai, iya bejaku baru ngagai orang mayuh.
21 Tang sida majak manjung: “Pantang* iya ba tiang! Pantang iya ba tiang!”
22 Pilate lalu bejaku baru ketiga kali ngagai sida. Ku iya: “Nama kebuah? Nama penyalah iya? Aku nadai tetemuka penyalah ti tau ngasuh iya diukum bunuh. Nya alai, aku deka ngukum iya lalu ngelepaska iya.”
23 Tang sida majak manjung enggau inggar agi minta Jesus diukum bunuh.* Ke pengujung iya, Pilate ngalahka diri.
24 Nya alai, Pilate ngaga pemutus nurutka utai ti dipinta sida.
25 Iya ngelepaska orang ke dipinta sida, iya nya orang ke udah dijil ketegal enggau orang ngelaban perintah sereta munuh orang. Tang iya nyerahka Jesus ngambika diukum mati baka ke dipinta sida.
26 Lebuh sida mai Jesus pansut ari endur nya, sida nangkap Simon ari Sairin ke baru datai ari menua pesisir. Sida ngengkahka tiang perinsa* Jesus ba bau iya lalu ngasuh iya ngesan tiang nya entudika Jesus.
27 Mayuh amat orang nitihka Jesus, nyengkaum bala indu ke nyabakka iya, lalu enda badu mandam dada diri ketegal kelalu tusah ati.
28 Jesus nguing ngagai sida lalu bejaku: “Bala indu Jerusalem, anang nyabakka aku. Tang nyabak meh ke diri empu enggau ke bala anak kita.
29 Laban maya deka datai alai orang madahka: ‘Gaga ati meh indu ke mandul enggau indu ke enda kala ngadaka anak sereta ke enda kala nusuka anak!’
30 Maya nya orang deka bejaku ngagai gunung, ‘Lamun kami!’ lalu ngagai bukit, ‘Lalaika kami!’
31 Enti sida ngereja nya lebuh pun kayu agi idup, nama utai ti deka nyadi lebuh pun kayu nya udah rangkai?”
32 Dua iku penjenayah mega dibai ngambika diukum bunuh sama enggau iya.
33 Lebuh sida datai ba endur ke dikumbai Kerubung Pala,* sida lalu mantang iya ba tiang sama enggau dua iku penjenayah nya. Siku ba sepiak kanan, lalu siku ba sepiak kiba iya.
34 Tang ku Jesus bejaku: “Apai, ampun meh sida, laban sida enda nemu utai ke dikereja diri.” Sida mega bechabut undi bebagika gari iya.
35 Orang mayuh bediri lalu meda utai ke benung nyadi. Tang bala ketuai ngeleseka iya. Ku sida: “Orang bukai ulih diselamatka iya. Enti iya amat Kristus ke dipilih Petara, awakka iya nyelamatka diri empu.”
36 Indah bala soldadu pan ngeleseka iya. Sida datai ngagai iya lalu meri iya wain ti masam.
37 Ku sida: “Enti nuan Raja orang Judah, selamatka diri empu.”
38 Ba atas pala iya, bisi utai ke ditulis: “Tu Raja orang Judah.”
39 Udah nya, siku ari penjenayah ke dipantang ba dia belabuh ngeleseka iya. Ku iya: “Endaka nuan tu Kristus? Selamatka meh diri empu sereta kami duai mega.”
40 Tang siku agi penjenayah ngerara penjenayah nya. Ku iya: “Kati nuan enda nangika Petara? Nuan pan nerima ukum ti sama baka iya.
41 Tua endang patut diukum baka tu ketegal penyalah tua. Tang lelaki tu nadai ngereja nama-nama penyalah.”
42 Udah nya, ku iya madah: “Jesus, kingatka aku lebuh nuan tama ngagai Perintah nuan.”
43 Nya alai, Jesus bejaku ngagai iya: “Enggau bendar aku madah ngagai nuan seharitu: Nuan deka enggau aku ba Paradais.”*
44 Taja pan maya nya kira-kira pukul 12 tengah hari,* tang semua dunya petang magang nyentuk ngagai pukul 3 ngalih hari,*
45 laban mata panas enda manchar. Maya nya, kain tirai ke digantung dalam Rumah Sembiang charik belah dua.
46 Jesus lalu ngangau enggau nyawa ti inggar: “Apai, aku nyerahka nyawa aku ngagai Nuan.” Sepengudah iya nyebut nya, iya ngesuhka seput iya ti penudi.
47 Pemesai soldadu ke meda utai ke nyadi nya belabuh ngemuliaka Petara lalu ku iya: “Lelaki tu amat nadai ngereja penyalah.”
48 Lebuh orang mayuh ke begelumu ba dia meda utai ke nyadi, semua sida pulai ke rumah lalu mandam dada diri ketegal kelalu tusah ati.
49 Semua sida ke ngelala Jesus, nyengkaum sida ke indu ke nitihka iya ari Galili, bediri meda semua utai ke nyadi nya ari jauh.
50 Bisi siku lelaki ke manah sereta lurus ke benama Josep. Iya siku ari Raban Kunsil Orang Judah.
51 (Lelaki tu enda setuju tauka enggai nulung pelan Raban Kunsil Orang Judah bekaul enggau Jesus.) Iya ari Arimatea, siti nengeri ba Judea, lalu iya mega nganti penatai Perintah Petara.
52 Iya betemu enggau Pilate lalu minta bangkai Jesus.
53 Iya nurunka bangkai Jesus lalu malut bangkai Jesus ngena kain linin ti alus. Udah nya, iya ngengkahka bangkai nya dalam kubur ke udah ditebuk ba bukit batu. Kubur nya bedau kala dikena.
54 Maya nya hari ke dikena nyediaka Hari Sabat, lalu enda lama agi Hari Sabat deka berengkah.
55 Tang bala indu ke datai enggau Jesus ari Galili nitihka Josep. Sida meda kubur Jesus sereta meda bangkai iya digalika ba kubur nya.
56 Udah nya, sida pulai nyediaka rempah ti bebau rengut enggau minyak wangi. Tang ba Hari Sabat, sida belelak nitihka utai ke dipadah ba Adat.
Nota Kaki
^ Jaku Gerika, “Kaisar.”
^ Tauka “nyungkak.”
^ Ayat tu nadai ditemu ba sekeda manuskrip ke lama, lalu engka ukai sebagi ari ayat ba Bup Kudus.
^ Tauka “Bunuh.”
^ Tauka “dibunuh ba tiang.”
^ Peda Penerang Leka Jaku.
^ Tauka “Tengkorak.”
^ Jaku Gerika, “pa·ra′dei·sos.” Reti iya, taman ti manah.
^ Jaku Asal, “jam keenam.”
^ Jaku Asal, “jam kesemilan.”
