Luke 5:1-39
5 Nyadi sekali, lebuh Jesus bediri ba tebing Danau Genesaret,* mayuh amat orang nguji deka semak ngagai iya, deka mendingka jaku Petara.
2 Iya tepedaka dua buah perau ba tebing danau nya, tang nadai orang berikan ba perau nya. Sida benung masu jala sida.
3 Iya nepan siti ari perau nya, iya nya perau ke enggi Simon. Jesus ngasuh Simon mai perau nya jauh mimit ari tebing. Udah nya, iya duduk dalam perau, lalu ngajar orang mayuh ari perau nya.
4 Pengudah tembu bejaku ngagai orang mayuh, iya bejaku ngagai Simon: “Kayuhka perau tu ngagai ai ti dalam, lalu ulurka pukat kita ngambika bulih ikan.”
5 Simon lalu nyaut: “Pengajar, kami udah bebendar gawa semalam-malam tu, tang nadai bulih utai. Tang aku deka ngulurka pukat baka ke diasuh nuan.”
6 Lebuh sida udah ngulurka pukat sida, sida bulih mayuh amat ikan, datai ke pukat sida nyau charik.
7 Nya alai, sida ngepai orang berikan ba perau sebuah da agi, minta sida datai nulung. Orang berikan nya datai lalu semua sida ngisi dua buah perau nya enggau ikan, datai ke perau sida nyau deka karam.
8 Lebuh Simon Peter meda nya, iya lalu nyungkurka diri ngagai Jesus. Ku iya: “Anang semak aku, Tuan, laban aku tu orang ke bedosa.”
9 Laban Simon enggau semua orang ke enggau iya balat alit ati ke pemayuh ikan diulih sida.
10 James enggau John, iya nya anak Sebedi, ke sama berikan enggau Simon mega balat alit ati. Tang Jesus bejaku ngagai Simon: “Anang takut. Berengkah ari diatu nuan deka ngiga orang, baka nuan ke begigaka ikan.”
11 Nya alai, sida narit perau dua buah nya ke tebing. Sida ninggalka semua utai, lalu nitihka Jesus.
12 Nyadi sekali, Jesus ba sebuah nengeri. Ba dia, bisi siku lelaki ke sakit lan.* Penyakit nya bisi ba semua tubuh iya. Lebuh iya meda Jesus, iya nyungkurka diri lalu minta kasih ari Jesus: “Tuan, enti nuan deka, nuan ulih ngeraika aku.”*
13 Nya alai, Jesus ngunjurka jari lalu negu orang nya. Ku iya: “Aku deka! Gerai* meh nuan.” Tekala nya, penyakit lan nya nadai agi ba iya.
14 Udah nya, Jesus enda ngasuh lelaki nya madah ngagai orang bukai. Jesus mega madahka ngagai iya: “Mansang nuan ngagai imam. Udah nya, beri pemeri baka ke diasuh ba Adat Moses kena mandangka ngagai bala imam, nuan udah gerai.”
15 Tang berita pasal Jesus majak ngelekai. Mayuh orang begelumu deka ningaka iya sereta minta iya ngeraika penyakit sida.
16 Taja pia, iya selalu ngagai endur ke sunyi ngambika iya ulih besampi.
17 Bisi sekali, lebuh Jesus benung ngajar, orang Parisi enggau bala pengajar Adat mega duduk ba dia. Sida udah datai ari Jerusalem enggau semua genturung pendiau ba Galili sereta Judea. Jehovah udah meri Jesus kuasa kena ngeraika orang.
18 Maya nya, beberapa iku lelaki datai mai siku lelaki ke sakit bajung. Lelaki ke sakit nya gali ba peninduk, lalu sida ngiga chara deka mai iya tama ke rumah, lalu ngalika iya ba mua Jesus.
19 Tang ketegal kelalu mayuh orang, sida enda ulih mai lelaki nya tama ke rumah. Nya alai, sida niki ke atas perabung. Pengudah sida ngerumbak lubang ba perabung rumah nya, sida lalu ngulurka orang ke sakit nya ngena peninduk iya ba mua Jesus.
20 Lebuh Jesus meda pengarap sida, ku iya bejaku ngagai orang ke sakit nya: “Dosa nuan udah diampun.”
21 Udah nya, bala penulis Adat enggau orang Parisi bejaku enggau pangan diri. Ku sida: “Sapa orang tu ke berani bejaku ngelaban Petara? Nadai orang ulih ngampunka dosa, kelimpah ari Petara.”
22 Tang Jesus nemu utai ke diperunding sida. Nya alai, iya bejaku ngagai sida: “Nama kebuah kita berundingka utai ke baka nya?
23 Ni nyamai agi disebut: ‘Dosa nuan udah diampun,’ tauka ‘Angkat lalu bejalai’?
24 Tang ngambika kita nemu Anak Mensia bisi kuasa ngampunka dosa ba dunya tu—” ku iya bejaku ngagai orang ke sakit nya: “Aku madah ngagai nuan: Angkat! Bai peninduk nuan lalu pulai ke rumah.”
25 Tekala nya, iya angkat bediri ba mua bala sida ke bisi ba dia, mai peninduk iya lalu pulai ke rumah. Lebuh iya bejalai pulai ke rumah, iya ngemuliaka Petara.
26 Semua orang ba dia balat alit ati lalu ngemuliaka Petara. Ku sida: “Manah amat utai ke dipeda kitai seharitu!”
27 Pengudah nya, Jesus pansut lalu tepedaka siku pengumpul chukai ke benama Lewi. Iya benung duduk ba opis endur ngumpul chukai. Ku Jesus bejaku ngagai iya: “Aram nyadi murid aku.”
28 Lewi angkat, ninggalka semua utai, lalu nitihka Jesus.
29 Pengudah nya, Lewi nyediaka pengerami makai besai ke Jesus ba rumah iya. Mayuh pengumpul chukai sereta orang bukai makai* enggau sida.
30 Ketegal nya, orang Parisi enggau bala penulis Adat ari raban sida mut-mut ngagai bala murid Jesus. Ku sida: “Nama kebuah kita begulai makai ngirup enggau pengumpul chukai sereta orang ke bedosa?”
31 Ku Jesus nyaut sida: “Orang ke gerai enda begunaka lutur, tang semina orang ke sakit begunaka lutur.
32 Aku datai ukai ketegal orang ke lurus,* tang ketegal orang ke bedosa, ngambika sida nesal ati.”
33 Ku sida bejaku ngagai Jesus: “Bala murid John enggau bala murid orang Parisi suah bepasa sereta bebendar besampi, tang bala murid nuan makai ngirup.”
34 Ku Jesus nyaut: “Kati ulih kita ngasuh bala sida ke datai ngagai pengerami tikah* bepasa, lebuh pengantin lelaki agi begulai enggau sida? Tentu enda ulih!
35 Tang maya deka datai alai pengantin lelaki nya endang deka diambi ari sida. Maya nya, baru sida deka bepasa.”
36 Iya mega madahka siti sempama ngagai sida: “Nadai orang nampal baju ti lama ngena kain ari baju ti baru. Enti iya ngereja nya, kain nya deka charik. Nambahka nya mega, kain ari baju ti baru enda setipak enggau baju ti lama.
37 Pia mega, nadai orang nyimpan wain ti baru dalam kambut kulit wain ti lama. Enti iya ngereja nya, wain ti baru deka ngasuh kambut kulit nya pechah lalu jai, lalu wain nya deka naya.
38 Tang wain ti baru patut disimpan dalam kambut kulit wain ti baru.
39 Orang ke udah ngirup wain ti lama deka nyebut: ‘Wain ti lama nya nyamai,’ lalu iya enggai ngirup wain ti baru.”
Nota Kaki
^ Iya nya, Danau Galili.
^ Peda Penerang Leka Jaku.
^ Tauka “ulih ngasuh aku tuchi.”
^ Tauka “Tuchi.”
^ Kelia menya, lebuh orang makai, orang suah gali singit ba semak mija.
^ Iya nya, orang ke ngumbai diri lurus agi ari orang bukai.
^ Tauka “bala pangan pengantin lelaki.”
