Mark 12:1-44
12 Udah nya, Jesus belabuh bejaku ngagai sida ngena jaku sempama: “Siku orang nanam anggur, lalu nirika pagar ngelingi kebun nya. Iya numbak lubang endur nganchurka buah anggur, lalu ngaga sebuah menara. Udah nya, iya nyua kebun anggur nya ngagai orang, lalu bejalai ngagai menua bukai.
2 Lebuh musin ngumpul buah anggur datai, iya ngasuh siku ulun iya mansang ngagai bala orang ke nyua kebun anggur nya, ngambi buah ke endang sigi ungkup iya ari sida.
3 Tang sida nangkap ulun nya, malu iya, lalu ngasuh iya pulai nadai mai utai.
4 Udah nya, iya ngirumka siku agi ulun ngagai sida. Tang sida malu pala ulun nya lalu ngeleseka iya.
5 Iya ngirumka siku da agi ulun, lalu siku nya dibunuh sida. Iya ngirumka mayuh agi ulun, tang sekeda ulun nya dipalu, lalu sekeda nya dibunuh sida.
6 Bisi siku da agi orang ke ulih dikirumka iya, iya nya anak lelaki ke dikesayauka iya. Ke pengujung iya, iya ngirumka anak iya nya. Ku iya, ‘Sida tentu deka bebasaka anak aku.’
7 Tang bala orang ke nyua kebun nya bejaku enggau pangan diri, ‘Tu orang ke deka bempu kebun anggur tu. Aram kitai munuh iya, ngambika semua reta pesaka iya diempu kitai.’
8 Nya alai sida nangkap iya, munuh iya, lalu muai iya ari kebun anggur nya.
9 Nama deka dikereja orang ke bempu kebun anggur nya? Iya deka datai, lalu munuh bala orang ke nyua kebun nya, lalu nyerahka kebun nya ngagai orang bukai.
10 Kati kita nadai kala macha dalam Bup Kudus: ‘Batu ti dibuai tukang rumah udah nyadi batu sukut ti pemadu beguna.
11 Batu tu datai ari Jehovah, lalu manah amat dipeda mata kitai’?”
12 Lebuh bala tuai imam enggau bala penulis Adat nemu Jesus bejaku pasal sida ngena jaku sempama, sida keran deka nangkap iya. Tang sida takutka orang mayuh. Nya alai sida ninggalka iya, lalu mupuk ari endur nya.
13 Udah nya, sida nganjung sekeda orang Parisi enggau sekeda nembiak Herod mansang ngagai Jesus, ngambika manjuk iya ngena jaku iya empu.
14 Sida datai lalu bejaku enggau iya: “Pengajar, kami nemu nuan endang madahka utai ti bendar, lalu nuan enda bechiping. Nuan enda ngakim orang beduduk ba utai ti dipeda, tang ngajar jalai Petara beduduk ba utai ti bendar. Nya alai, kati tau kitai mayar chukai pala ngagai raja Rome?*
15 Kati kitai patut mayar tauka enda?” Jesus nemu sida pura-pura ngapa. Nya alai iya lalu nyaut: “Nama kebuah kita nguji aku? Bai sesingkap duit seling denari* ngagai aku.”
16 Sida pan mai sesingkap duit seling denari ngagai Jesus. Iya lalu bejaku ngagai sida: “Gambar sapa enggau gelar sapa tu?” Ku sida nyaut: “Raja Rome.”
17 Jesus lalu bejaku ngagai sida: “Utai ke enggi raja Rome, beri ngagai raja Rome, tang utai ke enggi Petara, beri ngagai Petara.” Sida balat alit ati ngagai Jesus.
18 Orang Saduki, ke enda arap pasal orang ti udah mati ulih angkat idup baru, datai lalu nanya Jesus:
19 “Pengajar, Moses bisi nulis, enti siku lelaki mati sebedau iya bisi anak, menyadi lelaki iya patut jadi enggau balu nya, ngambika lelaki ke udah mati nya bisi peturun.
20 Nyadi sekali, bisi tujuh iku orang diri menyadi. Iya ke tuai bebini, tang mati sebedau iya bisi anak.
21 Udah nya, menyadi ke lumur dua jadi enggau indu nya, tang lelaki nya mega mati sebedau bisi anak. Baka nya mega menyadi ke lumur tiga.
22 Semua sida tujuh iku menyadi nya mati sebedau bisi anak. Pengujung iya, indu nya mega mati.
23 Lebuh orang ke mati diangkatka idup baru ila, sapa ke bempu bini nya? Laban semua sida tujuh iku menyadi nya kala jadi enggau iya.”
24 Ku Jesus nyaut sida: “Salah penemu kita nya, laban kita enda nemu Bup Kudus, tauka kuasa Petara.
25 Laban lebuh orang ke mati diidupka baru ila, sida nadai jadi melaki-bini tauka nikah, tang nyadi baka melikat ti ba serega.
26 Tang bekaul enggau orang ke mati ti diidupka baru, kati kita nadai kala macha dalam bup Moses, pasal babas ti diempa api? Petara bejaku ngagai Moses: ‘Aku tu Petara Abraham, Isak, enggau Jakop.’
27 Iya ukai Petara ke orang ti mati, tang Petara ke orang ti idup. Penemu kita amat salah.”
28 Ba dia bisi siku penulis Adat ninga sida bekelikuh. Iya nemu Jesus udah nyaut sida enggau manah. Nya alai, iya nanya Jesus: “Ni bagi pesan ti pemadu besai dalam Adat?”
29 Jesus lalu nyaut: “Pesan ti pemadu besai nya, ‘Pendingka tu, O kita orang Israel! Jehovah nya Petara kitai, lalu semina siku Iya aja ti Jehovah.
30 Kita patut rinduka Jehovah Petara kita, enggau pengabis ati kita, enggau pengabis pengidup* kita, enggau pengabis runding kita, sereta enggau pengabis pengering kita.’
31 Pesan ti kedua nya, ‘Kita patut rinduka orang bukai baka kita ke rinduka diri empu.’ Nadai pesan bukai ke besai agi ari dua iti pesan tu.”
32 Penulis Adat nya lalu bejaku ngagai iya: “Pengajar, manah utai ku nuan nya, lalu sejalai enggau utai ti betul. ‘Semina siku aja Petara, lalu nadai Petara bukai, kelimpah ari Iya.’
33 Mensia patut rinduka Iya enggau pengabis ati, enggau pengabis runding,* sereta enggau pengabis pengering. Mensia mega patut rinduka orang bukai baka sida ke rinduka diri empu. Tu beguna agi ari semua pemeri tunu enggau semua pemeri ke bukai.”
34 Lebuh Jesus meda iya udah nyaut enggau betul, Jesus lalu bejaku ngagai iya: “Nuan enda jauh ari Perintah Petara.” Pengudah nya, nadai orang agi berani nanyaka utai ngagai iya.
35 Lebuh Jesus benung ngajar ba Rumah Sembiang, ku iya nanya: “Baka ni ku bala penulis Adat tau ngumbai Kristus nya anak David?
36 Ari iring kuasa kudus, David empu madah, ‘Ku Jehovah bejaku enggau Tuan aku: “Duduk ba sepiak kanan Aku, datai ke Aku udah ngengkahka bala munsuh nuan ba baruh kaki nuan.”’
37 David empu ngumbai iya Tuan. Nya alai baka ni ku iya tau nyadi anak David?”
Lalu bala orang mayuh ba dia gaga amat mendingka iya.
38 Iya agi ngajar sida, lalu ku iya: “Bejimat kita ari bala penulis Adat, ke rindu bejalai ngena baju jubah, sereta rindu dipebasa orang ba sebelah pasar.
39 Sida rindu duduk ba endur ti pemadu mua* ba balai gempuru, enggau rinduka endur ti pemadu badas maya pengerami makai besai.
40 Sida ngerampas rumah* indu ke balu, lalu sida lama besampi ngambika dipeda orang. Sida deka diukum berat agi.”
41 Jesus duduk semak tabung duit Rumah Sembiang, lalu beratika orang nepuka duit ke dalam tabung duit nya. Mayuh orang ke kaya nepuka mayuh duit.
42 Siku indu ke balu sereta seranta datai, lalu nepuka dua singkap duit seling,* ke mimit amat rega.
43 Jesus ngangauka bala murid iya lalu bejaku: “Enggau bendar aku madah ngagai kita: Indu balu ke seranta tu udah nepuka mayuh agi ke dalam tabung duit nya ari semua sida ke bukai.
44 Laban sida ti bukai meri laluh pengaya sida, tang indu ke seranta tu udah meri semua utai ti dikemisi iya, semua utai ti dikena iya beridup.”
Nota Kaki
^ Jaku Gerika, “Kaisar?”
^ Sesingkap denari sama penyampau enggau gaji sehari.
^ Jaku Asal, “psykhe.” Peda Penerang Leka Jaku, “Psykhe.”
^ Iya nya, penau meretika utai.
^ Tauka “manah.”
^ Tauka “reta.”
^ Jaku Asal, “dua lepton.” Nya penyampau gaji ke diulih gawa kira-kira 10 minit.
