Mark 2:1-28
2 Tang beberapa hari udah nya, Jesus pulai baru ngagai Kapernaum, lalu orang nemu iya bisi ba rumah.
2 Ketegal nya, mayuh orang begelumu ba dia, nyentukka rumah nya enda chukup endur sida. Indah ba semak pintu pan nadai agi endur. Lalu Jesus belabuh nusui pesan Petara ngagai sida.
3 Udah nya, empat iku lelaki mai siku lelaki ke sakit* ngagai Jesus.
4 Laban orang kelalu mayuh, sida enda ulih mai orang nya ngagai Jesus. Nya alai, sida ngerumbak lubang ba perabung rumah nya, lalu ngulurka orang ke sakit nya ngena peninduk* iya.
5 Lebuh Jesus meda pengarap sida, ku iya bejaku ngagai orang ke sakit nya: “Anak, dosa nuan udah diampun.”
6 Sekeda penulis Adat ke duduk ba dia berunding dalam ati diri:
7 “Nama kebuah orang tu bejaku munyi nya? Iya bejaku ngelaban Petara. Nadai orang ulih ngampunka dosa, kelimpah ari Petara.”
8 Tang tekala nya, Jesus nemu utai ke diperunding sida. Nya alai, iya bejaku ngagai sida: “Nama kebuah kita berundingka utai ke baka nya?
9 Ni nyamai agi disebut ngagai lelaki ke sakit tu: ‘Dosa nuan udah diampun,’ tauka ‘Angkat! Bai peninduk nuan lalu bejalai’?
10 Tang ngambika kita nemu, Anak Mensia bisi kuasa ngampunka dosa ba dunya tu—” ku iya bejaku ngagai orang ke sakit nya:
11 “Aku madah ngagai nuan: Angkat! Bai peninduk nuan, lalu pulai ke rumah.”
12 Lelaki nya pan angkat, mai peninduk iya, lalu bejalai pansut mansa semua orang ba dia. Semua sida balat alit ati, lalu ngemuliaka Petara. Ku sida: “Nadai kitai kala meda utai baka tu.”
13 Sekali agi, Jesus ngagai tebing danau. Mayuh orang majak datai ngagai iya, lalu iya ngajar sida.
14 Lebuh iya benung bejalai, iya tepedaka Lewi anak Alfius benung duduk ba opis endur ngumpul chukai. Ku Jesus bejaku ngagai iya: “Aram nyadi murid aku.” Lewi angkat, lalu nitihka iya.
15 Udah nya, Jesus makai ba rumah Lewi. Mayuh pengumpul chukai enggau orang ke bedosa* ke nitihka Jesus datai, lalu makai* enggau Jesus sereta bala murid iya.
16 Tang lebuh bala penulis Adat enggau orang Parisi meda Jesus begulai makai enggau orang ke bedosa sereta enggau pengumpul chukai, sida lalu bejaku ngagai bala murid iya: “Nama kebuah iya begulai makai enggau pengumpul chukai sereta enggau orang ke bedosa?”
17 Lebuh Jesus ninga nya, iya lalu bejaku ngagai sida: “Orang ke gerai enda begunaka lutur, tang semina orang ke sakit begunaka lutur. Aku datai ukai ketegal orang ke lurus,* tang ketegal orang ke bedosa.”
18 Bala murid John enggau orang Parisi selalu bepasa. Nya alai, sida datai lalu nanya Jesus: “Nama kebuah bala murid John enggau bala murid orang Parisi selalu bepasa, tang bala murid nuan enda bepasa?”
19 Ku Jesus nyaut: “Lebuh pengantin lelaki begulai enggau bala sida ke datai ngagai pengerami tikah* iya, sida ke datai nya nadai kebuah deka bepasa, enda pia? Seagi-agi pengantin lelaki agi begulai enggau sida, sida enda tau bepasa.
20 Tang maya deka datai alai pengantin lelaki nya deka diambi ari sida, maya nya baru sida deka bepasa.
21 Nadai orang nampal baju ti lama ngena chebik kain ti baru. Enti iya ngereja nya, chebik kain ti baru deka nyadi mit,* lalu ngasuh baju ti lama nya balat agi charik.
22 Pia mega, nadai orang nyimpan wain ti baru dalam kambut kulit wain ti lama. Enti iya ngereja nya, kambut wain nya deka pechah lalu wain nya deka naya. Kambut nya mega enda ulih dikena agi. Tang orang deka nyimpan wain ti baru dalam kambut kulit wain ti baru.”
23 Nyadi sekali, kena Hari Sabat, Jesus bejalai nengah ladang gandum. Bala murid iya belabuh matahka tangkai gandum lebuh sida bejalai nengah ladang nya.
24 Nya alai, orang Parisi bejaku ngagai Jesus: “Peda nuan! Nama kebuah sida ngereja utai ti enda diasuh Adat lebuh Hari Sabat?”
25 Ku Jesus nyaut: “Kati kita nadai kala macha pasal utai ti dikereja David, lebuh iya enggau bala iya lapar sereta nadai agi pemakai?
26 Dalam cherita pasal Imam Besai Abiatar, David tama ngagai Rumah Sembiang lalu makai roti ti udah diberi ngagai Petara. Nitihka Adat, nadai orang tau makai roti nya, tang semina bala imam aja ke tau. Iya mega meri roti nya ngagai bala iya.”
27 Ku Jesus bejaku ngagai sida: “Petara netapka Hari Sabat ke penguntung mensia. Tang Iya enda ngaga mensia ngambika sida ngasika Hari Sabat.
28 Nyadi Anak Mensia, Tuan ke bisi kuasa, indah atas Hari Sabat.”
Nota Kaki
^ Tauka “sakit bajung.”
^ Iya nya, peninduk mit kena ngangkat orang ke sakit.
^ Tauka “ke suah ngereja dosa.”
^ Kelia menya, lebuh orang makai, orang suah gali singit ba semak mija.
^ Iya nya, orang ke ngumbai diri lurus agi ari orang bukai.
^ Tauka “bala pangan.”
^ Tauka “deka kesat.”
