Mark 9:1-50
-
Gamal Jesus berubah (1-13)
-
Nembiak lelaki ke dirasuk melikat ti jai digeraika (14-29)
-
“Semua utai ulih magang ke orang ti arap” (23)
-
-
Pemati Jesus dipadahka baru (30-32)
-
Bala murid bekelikuh pasal sapa ke pemadu besai (33-37)
-
Barang sapa ke enda ngelaban kitai, setanah enggau kitai (38-41)
-
Utai ke ngasuh labuh ba pengarap (42-48)
-
“Awakka kita baka garam” (49, 50)
9 Ku iya bejaku ngagai sida: “Enggau bendar aku madah ngagai kita, sekeda orang ke bediri ditu enda mati seagi-agi sida bedau meda Perintah Petara datai enggau kuasa ti besai.”
2 Enam hari udah nya, Jesus mai Peter, James, enggau John, niki ngagai bukit ti tinggi. Semina sida empat aja kin. Sida lalu meda gamal Jesus berubah,
3 lalu gari luar iya bebali beperenching burak. Nadai siku pan orang ba dunya tu ke ulih masu gari burak agi ari nya.
4 Sida mega meda Elijah seduai Moses ayan, lalu bejaku enggau Jesus.
5 Lalu ku Peter madah ngagai Jesus: “Rabbi,* kami gaga ati ulih ba ditu. Awakka kami nirika tiga iti langkau kain, siti ke nuan, siti ke Moses, lalu siti da agi ke Elijah.”
6 Kebendar iya, Peter enda nemu nama utai ke patut disebut, laban sida balat takut.
7 Udah nya, remang ayan lalu mungkur sida. Ku nyawa ari remang nya bejaku: “Tu Anak ti dikesayauka Aku. Pendingka iya.”
8 Taja pia, lebuh sida malik kiba kanan, sida nadai meda orang bukai. Semina Jesus aja ba dia.
9 Lebuh sida nurun ari bukit nya, Jesus bebendar enda ngasuh sida madah ngagai orang utai ti udah dipeda sida, nyentuk ngagai maya Anak Mensia udah diidupka baru ari mati.
10 Nya alai, sida tiga ngumbai nya pekara ti berat,* tang sida berandauka nama reti utai ku Jesus lebuh iya madahka iya deka diidupka baru ari mati.
11 Udah nya, sida nanya iya: “Nama kebuah bala penulis Adat madahka Elijah patut dulu datai?”
12 Ku iya nyaut: “Elijah endang amat dulu datai lalu ngemetulka semua utai. Tang nama kebuah Bup Kudus madahka Anak Mensia patut napi mayuh pemerinsa, sereta enda diterima orang?
13 Tang aku madah ngagai kita, kebendar iya Elijah udah datai. Baka ke udah ditulis pasal iya, sida merinsaka iya sepeneka ati sida.”
14 Lebuh sida datai ba endur bala murid ke bukai, sida meda bala murid nya dikelingi orang mayuh. Bala penulis Adat benung belaban jaku enggau bala murid ke bukai nya.
15 Tang lebuh orang mayuh meda Jesus, sida tekenyit. Sida belanda ngagai iya lalu nyambut penatai iya.
16 Nya alai iya nanya: “Nama utai ke dikelikuhka kita enggau sida?”
17 Siku orang ari bala mayuh lalu nyaut: “Pengajar, aku mai anak lelaki aku ngagai nuan. Iya bisu laban iya dirasuk melikat ti jai.
18 Tiap kali melikat ti jai nya nyerang iya, melikat ti jai nya ngempaska iya ke tanah, nyawa iya bepupu, ngeli iya kerik-kerik, lalu tubuh iya nyadi lemi. Aku minta bala murid nuan muru melikat ti jai nya, tang sida enda ulih ngereja nya.”
19 Ku Jesus bejaku ngagai sida: “Kita tu rebak ke enda arap! Ni pengelama aku patut begulai enggau kita? Ni pengelama aku patut sabar enggau kita? Bai iya ngagai aku.”
20 Nya alai, sida mai nembiak lelaki nya ngagai Jesus. Lebuh melikat ti jai nya meda Jesus, iya lalu tekala nya ngusak nembiak nya. Nembiak nya rebah ke tanah, maringka diri, lalu nyawa iya bepupu.
21 Jesus nanya apai nembiak nya: “Ni pengelama iya udah baka tu?” Ku apai nembiak nya nyaut: “Kenyau ari iya agi mit.
22 Melikat ti jai nya suah udah nikauka iya ngagai api, enggau ngagai ai, deka munuh iya. Tang enti nuan ulih ngeraika iya, kasihka kami, lalu tulung meh kami.”
23 Ku Jesus bejaku ngagai iya: “Nama kebuah nuan nyebut, ‘Enti nuan ulih?’ Semua utai ulih magang ke orang ti arap.”
24 Tekala nya, apai nembiak nya lalu bejaku enggau nyawa ti inggar: “Aku arap! Tulung aku ngambika pengarap aku besai agi!”
25 Jesus meda orang mayuh belanda mansang ngagai sida. Iya lalu ngerara melikat ti jai nya. Ku iya: “Nuan melikat ti bengal enggau bisu. Aku ngasuh nuan pansut ari nembiak tu, lalu anang agi tama ngagai iya!”
26 Melikat ti jai nya nyerauh lalu balat amat ngusak nembiak nya. Pengudah melikat ti jai nya pansut, nembiak nya baka ke mati. Nya alai, mayuh orang ba dia madahka: “Iya udah mati!”
27 Tang Jesus megai jari nembiak nya, lalu nulung iya angkat. Nembiak nya pan bediri.
28 Pengudah Jesus tama ngagai siti rumah, lebuh sida kediri, bala murid iya nanya iya: “Nama kebuah kami enda ulih muru melikat ti jai nya?”
29 Disaut iya: “Melikat ti jai ke baka nya semina ulih diburu ngena sampi.”
30 Udah nya, sida mupuk ari endur nya, lalu bejalai nengah Galili. Tang iya enggai orang nemu dini alai iya,
31 laban iya benung ngajar bala murid iya. Ku iya bejaku ngagai sida: “Anak Mensia deka diserahka ngagai munsuh, lalu dibunuh. Taja pan sida munuh iya, iya deka diidupka baru pengudah tiga hari.”
32 Tang sida enda meretika utai ti ku iya, lalu sida takut nanya iya.
33 Sida pan datai ba Kapernaum. Lebuh iya ba rumah, iya nanya sida: “Nama utai ti dikelikuhka kita ba rantau jalai tadi?”
34 Sida enda bemunyi, laban lebuh sida ba rantau jalai, sida udah bekelikuh enggau pangan diri pasal sapa ke pemadu besai.
35 Nya alai Jesus duduk, ngangauka 12 iku rasul nya, lalu bejaku ngagai sida: “Barang sapa deka nyadi dulu, patut nyadi dudi ari semua, lalu nyadi ulun ke semua.”
36 Udah nya, Jesus ngangauka siku anak mit, lalu ngasuh iya bediri ba tengah-tengah sida. Jesus ngengkahka jari iya ba bau anak mit nya, lalu madah ngagai bala murid iya:
37 “Barang sapa nerima anak mit baka tu dalam nama aku, mega nerima aku. Lalu barang sapa nerima aku, ukai aja nerima aku, tang mega nerima Iya ke ngirumka aku.”
38 John bejaku ngagai iya: “Pengajar, kami bisi meda orang siku muru melikat ti jai ngena nama nuan, lalu kami nguji nagang iya, laban iya ukai siku ari kitai.”
39 Tang ku Jesus bejaku: “Anang nagang iya, laban nadai orang ke ngaga kereja ajih ngena nama aku deka beguai bejaku jai pasal aku.
40 Laban barang sapa ke enda ngelaban kitai, setanah enggau kitai.
41 Enggau bendar aku madah ngagai kita: Barang sapa meri kita ai irup ketegal kita enggi Kristus, iya tentu deka nerima upah iya.
42 Tang barang sapa ke ngasuh siku ari murid aku ke baka anak mit,* labuh ba pengarap, manah agi enti batu kisar ti besai ke ditarit keledai digantung ba rekung orang nya, lalu iya dibuai ngagai tasik.
43 “Enti jari kita mai kita bedosa,* tetak iya. Manah agi enti kita nadai jari sepiak tang bulih pengidup, ari ke bisi kedua piak jari tang dibuai ngagai Gehena,* ngagai api ke enda ulih dipadam.*
44 * ——
45 Enti kaki kita mai kita bedosa,* tetak iya. Manah agi enti kita nadai kaki sepiak tang bulih pengidup, ari ke bisi kedua piak kaki tang dibuai ngagai Gehena.*
46 * ——
47 Pia mega, enti mata kita mai kita bedosa,* buai iya. Manah agi enti kita nadai mata sepiak tang ulih tama ngagai Perintah Petara, ari ke bisi dua igi mata tang dibuai ngagai Gehena.*
48 Ulat ba dia enda nemu mati, lalu api ba dia enda nemu padam.
49 “Baka garam ke ditaburka atas pemakai, baka nya meh Petara deka nurunka api ngagai semua orang.*
50 Garam endang manah, tang enti iya nadai agi masin, baka ni ku kita deka ngasuh iya masin baru? Awakka kita baka garam, lalu mengkang bebaik enggau pangan diri.”
Nota Kaki
^ Tauka “Pengajar.”
^ Tauka engka, “sida tiga nadai madahka pekara nya ngagai orang.”
^ Tauka “siku ari sida ke mit ke arapka aku.”
^ Jaku Asal, “ngasuh kita labuh.”
^ Peda Penerang Leka Jaku.
^ Tu nunjukka pengerusak ti belama iya.
^ Ayat tu nadai ditemu ba sekeda manuskrip ke lama, lalu engka ukai sebagi ari ayat ba Bup Kudus.
^ Jaku Asal, “ngasuh kita labuh.”
^ Peda Penerang Leka Jaku.
^ Ayat tu nadai ditemu ba sekeda manuskrip ke lama, lalu engka ukai sebagi ari ayat ba Bup Kudus.
^ Jaku Asal, “ngasuh kita labuh.”
^ Peda Penerang Leka Jaku.
^ Iya nya, orang ke dibuai ngagai Gehena.
