Nehemiah 12:1-47
12 Tu bala imam enggau orang Lewi ke mupuk enggau Serubabel anak Sheltil enggau Jesua: Serayah, Jeremiah, Esra,
2 Amariah, Maluk, Hatus,
3 Sekaniah, Rehum, Meremot,
4 Ido, Ginetoi, Abijah,
5 Mijamin, Madiah, Bilgah,
6 Semayah, Joyarip, Jedayah,
7 Salu, Amok, Hilkiah, enggau Jedayah. Semua sida nya tuai atas bala imam enggau bala orang ke sama enggau sida gawa maya jeman Jesua.
8 Tu orang Lewi ke enggau seduai iya, iya nya Jesua, Binui, Kadmiel, Serebiah, Judah, enggau Mataniah. Mataniah enggau bala iya ngiring orang belagu meri terima kasih.
9 Bakbukiah enggau Uni, ke mega bala sida, bediri ba depan sida sambil bejaga.*
10 Jesua nya apai Joyakim, Joyakim nya apai Eliasip, lalu Eliasip nya apai Joyada.
11 Joyada nya apai Jonatan, lalu Jonatan nya apai Jadua.
12 Maya jeman Joyakim, tu meh bala imam ke mega nyadi tuai suku: Merayah ari ruang bilik Serayah; Hananiah ari ruang bilik Jeremiah;
13 Mesulam ari ruang bilik Esra; Jehohanan ari ruang bilik Amariah;
14 Jonatan ari ruang bilik Maluki; Josep ari ruang bilik Sebaniah;
15 Adna ari ruang bilik Harim; Helkai ari ruang bilik Merayot;
16 Sekariah ari ruang bilik Ido; Mesulam ari ruang bilik Gineton;
17 Sikri ari ruang bilik Abijah; . . .* ari ruang bilik Miniamin; Piltai ari ruang bilik Moadiah;
18 Shamua ari ruang bilik Bilgah; Jehonatan ari ruang bilik Semayah;
19 Matenai ari ruang bilik Joyarip; Usi ari ruang bilik Jedayah;
20 Kallai ari ruang bilik Sallai; Eber ari ruang bilik Amok;
21 Hasabiah ari ruang bilik Hilkiah; enggau Netanel ari ruang bilik Jedayah.
22 Lis nama orang Lewi enggau bala imam ke mega nyadi tuai suku maya jeman Eliasip, Joyada, Johanan, enggau Jadua direkod nyentuk ngagai maya Raja Darius ari Persia merintah.
23 Lis nama orang Lewi ke mega nyadi tuai suku direkod ba bup sejarah pasal jeman nya nyentuk ngagai jeman Johanan anak Eliasip.
24 Bala tuai orang Lewi nya Hasabiah, Serebiah, enggau Jesua anak Kadmiel. Bala sida ke nyadi jejaga bediri ba depan sida nitihka raban. Sida ke nyadi jejaga nya meri puji sereta meri terima kasih nitihka iring David, iya nya nembiak Petara ti bendar.
25 Mataniah, Bakbukiah, Obadiah, Mesulam, Talmon, enggau Akup nyaga pintu penama enggau setor ke semak enggau pintu penama.
26 Sida bejalaika pengawa sida maya jeman Joyakim anak Jesua, jeman Gabenor Nehemiah, enggau jeman Imam Esra ke mega siku penyalin.* Joyakim nya uchu Josadak.
27 Lebuh pengawa ngerasmika dinding Jerusalem, bala orang begigaka orang Lewi ba serata endur alai orang Lewi diau, lalu mai sida ngagai Jerusalem ngambika sida ulih enggau ngerami pengawa nya. Sida belagu meri terima kasih sereta nebah simbal, perengka musik ti betali, enggau belikan.*
28 Bala penyanyi ke udah dilatih* begempuru begulai. Sida datai ari kawasan ke enda jauh ari endur nya.* Sida mega datai ari semua kawasan ngelingi Jerusalem, ari kampung orang Netopah,
29 ari Bet-gilgal, sereta ari kawasan Geba enggau Asmabet, laban sida udah ngaga endur diau ba kawasan ke ngelingi Jerusalem.
30 Bala imam enggau orang Lewi ngasuh diri nyadi tuchi, lalu sida mega ngaga bala rayat, pintu kuta, enggau dinding kuta nyadi tuchi.
31 Udah nya, aku mai bala tuai orang Judah niki ngagai atas dinding kuta. Aku magi bala penyanyi ngagai dua iti raban. Bala penyanyi tu meh ke deka belagu meri terima kasih. Seraban orang deka nitihka tiap iti raban penyanyi nya ari belakang. Siti ari raban penyanyi nya pan bejalai ngagai sepiak kanan dinding kuta nya, lalu nuju ngagai Pintu Tugung Amau.
32 Hosayah enggau setengah ari bala tuai orang Judah bejalai nitihka sida nya ari belakang,
33 sama enggau Asariah, Esra, Mesulam,
34 Judah, Benjamin, Semayah, enggau Jeremiah.
35 Sekeda ari bala peturun imam ke mai terumpit mega nitihka sida. Tu bala peturun imam nya: Sekariah (Sekariah nya anak Jonatan, Jonatan nya anak Semayah, Semayah nya anak Mataniah, Mataniah nya anak Mikaiah, Mikaiah nya anak Zakur, lalu Zakur nya anak Asaf)
36 enggau bala iya, iya nya Semayah, Azarel, Milalai, Gilalai, Mai, Netanel, Judah, enggau Hanani. Sida nebah perengka musik ke baka perengka musik ke digaga nembiak Petara ti bendar, iya nya David. Esra, iya nya siku penyalin,* bejalai ba depan sida.
37 Ba Pintu Telaga, sida niki dinding kuta lalu mansa Tangga Kuta David. Udah nya, sida mansa Rumah David, lalu datai ba Pintu Ai ke ba timur.
38 Siti da agi raban penyanyi bejalai ngagai sepiak kiba. Aku enggau bala orang ke bukai nitihka sida ari belakang. Kami bejalai mansa Menara Oven sampai ngagai Dinding ke Besai Buka.
39 Udah nya, kami mansa Pintu Efraim, Pintu Kuta Lama, Pintu Ikan, Menara Hananel, Menara Meah, Pintu Bedus, lalu ngetu ba Pintu Gerbang Jejaga.
40 Pengujung iya, dua iti raban penyanyi nya bediri ba depan Rumah Petara ti bendar. Aku enggau setengah ari bala tuai mega bediri ba dia.
41 Bala imam ke mai terumpit mega bisi ba dia, iya nya Eliakim, Maseyah, Miniamin, Mikaiah, Elionai, Sekariah, enggau Hananiah.
42 Kelimpah ari nya, bisi mega Maseyah, Semayah, Eleasar, Usi, Jehohanan, Malkijah, Elam, enggau Eser. Bala penyanyi belagu enggau inggar, lalu Israhiah ngiring sida belagu.
43 Ba hari nya, sida nyerahka mayuh pemeri lalu sida amat gaga ati, laban Petara ti bendar ngasuh sida balat amat gaga ati. Bala sida ke indu enggau anak mit amat gaga ati, nyentukka munyi sida ke rami ba Jerusalem ulih didinga ari jauh.
44 Ba hari nya, bisi orang diasuh nyaga bilik setor endur alai nyimpan pemeri asil ti keterubah enggau asil 10 peratus ke udah diberi. Sida mega mesti ngagai ladang ba tiap iti kuta, lalu ngumpul begian ke patut diberi ngagai bala imam enggau orang Lewi nitihka Adat, lalu nyimpan nya ba bilik setor. Orang Judah amat gaga ati, laban bala imam enggau orang Lewi bejalaika pengawa sida.
45 Sida ngereja pengawa ke diasuh Petara sereta ngaga semua utai nyadi tuchi. Bala penyanyi enggau orang ke nyaga pintu penama mega ngereja utai ti sama, sejalai enggau iring David enggau anak iya, Solomon.
46 Kenyau ari jeman David enggau Asaf, udah bisi bala tuai ke ngiring bala penyanyi ke belagu meri puji enggau meri terima kasih ngagai Petara.
47 Maya jeman Serubabel enggau Nehemiah, semua orang Israel meri pemakai ke udah diungkupka ngagai bala penyanyi enggau orang ke nyaga pintu penama, nitihka utai ke diguna sida ninting hari. Sida mega meri pemakai ke diungkupka ngagai orang Lewi, lalu orang Lewi meri pemakai ke diungkupka ngagai bala peturun Aron.
Nota Kaki
^ Tauka engka, “lebuh bejalaika pengawa.”
^ Dalam teks Hebrew, nama ba begian tu udah dibuai.
^ Tauka “orang ke ngupi Adat.”
^ Tauka “harp.” Sebengkah perengka musik ke betali baka gitar, tang gamal iya enda sebaka enggau gitar.
^ Jaku Asal, “Anak lelaki bala penyanyi.”
^ Iya nya, kawasan Jordan.
^ Tauka “orang ke ngupi Adat.”
