Nehemiah 2:1-20
2 Ba bulan Nisan,* ba taun ke-20 Raja Artaserses merintah, wain dienahka ba depan raja nya. Baka biasa, aku ngambi wain nya lalu meri nya ngagai raja. Maya nya, ati aku balat amat tusah, lalu raja nadai kala meda aku baka nya.
2 Ku raja nanya aku: “Nuan enda sakit. Tang nama kebuah gamal nuan tusah ati? Baka bisi utai ke ngasuh nuan irau.” Aku pan balat amat takut.
3 Udah nya, aku nyaut raja: “Idup raja! Kati ku aku enda tusah ati? Kuta alai aki ini aku dikuburka udah anchur, lalu pintu kuta udah angus.”
4 Udah nya, raja nanya aku: “Nyadi, nama utai ke deka digaga nuan?” Aku pan terus besampi ngagai Petara ke merintah serega.
5 Ku aku madah ngagai raja: “Tuan raja, enti ulih, aku deka mupuk ngagai Judah, lalu nirika baru kuta alai aki ini aku dikuburka. Enti nya manah ba tuan raja lalu aku udah ngelantangka ati tuan, awakka aku mupuk kin.”
6 Maya nya, raja duduk ba sepiak kuin iya. Ku raja nanya aku: “Berapa lama nuan kin? Lalu kemaya nuan pulai baru?” Aku pan madahka iya berapa lama aku ba din, lalu raja ngemendarka aku mupuk.
7 Udah nya, aku madah ngagai raja: “Enti tu ngelantangka ati tuan, beri meh aku surat diraja ngambika aku ulih nunjukka surat nya ngagai bala gabenor ba kawasan ba seberai Sungai Eupratis.* Enti aku bisi surat nya, aku ulih nengah kawasan sida, lalu selamat datai ba Judah.
8 Ulih aku mega minta surat ke deka diberi ngagai Asaf ke nyaga Taman Diraja,* ngambika iya ulih meri aku kayu? Kayu nya deka dikena aku ngaga pintu Kubu Rumah Sembiang, dinding kuta, enggau rumah endur aku diau.” Nyadi, raja pan meri semua surat nya ngagai aku, laban Petara aku nulung aku.
9 Raja mega ngasuh bala ketuai soldadu enggau bala orang ke nepan kuda mupuk enggau aku. Lebuh kami datai ba kawasan ke ba seberai Sungai Eupratis, aku lalu meri semua surat ari raja ngagai bala gabenor ba dia.
10 Orang Horon ke benama Sanbalat enggau siku pegawai orang Amon ke benama Tobiah pedis ati lebuh nemu pasal nya. Seduai iya enda rindu laban bisi orang datai deka nulung orang Israel.
11 Pengujung iya, aku pan datai ba Jerusalem. Aku diau ba dia pengelama tiga hari.
12 Maya malam hari, aku angkat lalu mai beberapa iku orang enggau aku. Maya nya, aku nepan siku keledai lalu kami nadai mai jelu bukai. Petara aku meransang* ati aku ngambika ngereja utai ke Jerusalem. Tang, aku nadai madahka sapa-sapa pasal nya.
13 Malam nya, aku keluar nengah Pintu Lebak. Udah nya, aku mansa Telaga Ular Besai, lalu nuju ngagai Pintu Tugung Amau. Aku meresa dinding kuta Jerusalem ke udah runtuh sereta meresa pintu kuta ke udah angus.
14 Udah nya, aku mansa Pintu Telaga lalu nuju ngagai Kolam Raja. Kawasan ke pengudah nya kelalu sempit lalu enda ulih ditengah keledai ke ditepan aku.
15 Taja pia, aku neruska pejalai ngagai lebak* lebuh hari agi malam, lalu aku majak meresa dinding kuta. Udah nya, aku nikal baru lalu tama nengah Pintu Lebak, lalu aku pan pulai ke rumah.
16 Bala tuai enda nemu kini ke penunga aku lalu sida enda nemu nama utai ke udah digaga aku, laban aku nadai madahka nama-nama utai ngagai sida. Aku mega nadai madahka nama-nama utai ngagai orang Judah, bala imam, bala orang ke tinggi pangkat, sereta bala pekereja ke bukai.
17 Tang udah nya, aku pan madah ngagai sida: “Teruk amat situasi kitai diatu. Kita pan nemu Jerusalem udah anchur, lalu pintu kuta udah angus. Nyadi, aram meh kitai nirika baru dinding kuta Jerusalem ngambika kitai enda ibuh agi natka diri malu.”
18 Udah nya, aku madah ngagai sida baka ni Petara aku udah nulung aku, pia mega enggau utai ke dipadahka raja ngagai aku. Sida lalu madahka: “Bah! Aram kitai berengkah gawa.” Nyadi, sida pan meransang pangan diri* ngambika sida ulih ngereja pengawa nya.
19 Lebuh orang Horon ke benama Sanbalat, pegawai orang Amon ke benama Tobiah, enggau orang Arab ke benama Gesem ninga pasal nya, sida lalu begedika kami. Sida ngeleseka kami lalu madah: “Nama utai gaga kita nya? Kita ka ngelaban raja, pia?”
20 Ku aku nyaut: “Petara ke merintah serega deka ngasuh kami mujur, lalu kami, bala nembiak Iya, deka berengkah ngereja pengawa tu. Tang kita nadai utai ba Jerusalem, lalu kita nadai hak ngambi nama-nama utai. Nadai utai ke udah digaga kita deka dikingatka ba Jerusalem.”
Nota Kaki
^ Peda Rujukan B15.
^ Merujuk ngagai kawasan ba sepiak barat Sungai Eupratis.
^ Tauka “utan raja.”
^ Jaku Asal, “nyimpan dalam.”
^ Tauka “wadi.”
^ Jaku Asal, “ngeringka jari sida.”
