Nehemiah 3:1-32
-
Ngaduka baru dinding kuta (1-32)
3 Imam Besai Eliasip enggau bala imam ke bukai* ngaga Pintu Bedus. Sida nguduska nya* lalu masang pintu nya. Sida neruska pengawa sida sampai ngagai Menara Meah, nyentuk ngagai Menara Hananel. Sida mega nguduska semua nya.
2 Ba sepiak sida, orang Jeriko ngaga dinding, lalu dinding ke ba sepiak orang Jeriko digaga Zakur anak Imri.
3 Peturun Hasenah ngaga Pintu Ikan. Pengudah sida ngaga bingkai pintu, sida masang pintu, palang, enggau utai kena ngunchi pintu nya.
4 Begian dinding ke pengudah nya digaga Meremot anak Urijah, iya nya uchu Hakos. Begian ke pengudah nya digaga Mesulam anak Berekiah, iya nya uchu Mesesabel, lalu begian ke pengudah nya digaga Sadok anak Bana.
5 Begian sepiak sida diaduka orang Tekoa. Tang, orang Tekoa ke tinggi pangkat enggai gawa ba baruh iring tuan sida, laban sida enda baruh ati.
6 Joyada anak Paseah enggau Mesulam anak Besodeyah ngaduka Pintu Kuta Lama. Pengudah sida ngaga bingkai pintu, sida masang pintu, palang, enggau utai kena ngunchi pintu nya.
7 Ba sepiak sida, dinding kuta digaga orang Gibeon ke benama Melatiah enggau orang Meronot ke benama Jadon. Seduai iya datai ari Gibeon enggau Mispah, iya nya endur ke dipegai gabenor ke ba kawasan seberai Sungai Eupratis.*
8 Begian dinding ke pengudah nya diaduka Uziel anak Harhayah. Begian ke pengudah nya digaga Hananiah. Seduai iya enggau bala pekereja ngaga jalai ari* Jerusalem sampai ngagai Dinding ke Besai Buka. Uziel nya tukang emas, lalu Hananiah nya orang ke nemu ngaga minyak wangi.
9 Begian dinding sepiak sida diaduka Repayah anak Hur. Iya tuai ke megai setengah ari kawasan Jerusalem.
10 Begian dinding ke pengudah sida digaga Jedayah anak Harumap. Dinding kuta nya ba depan rumah iya empu. Begian dinding ke pengudah nya diaduka Hatus anak Hasapniah.
11 Malkijah anak Harim enggau Hasup anak Pahat-moap ngaduka begian dinding ke siti da agi, nyengkaum Menara Oven.
12 Begian dinding ke pengudah nya diaduka Salum anak Halohes. Bala anak indu iya mega bisi nulung iya. Salum nya tuai ke megai setengah ari kawasan Jerusalem.
13 Hanun enggau rayat Sanoah ngaduka Pintu Lebak. Sida masang pintu, palang, enggau utai kena ngunchi pintu nya. Sida mega ngaduka dinding kuta sampai ngagai Pintu Tugung Amau. Pemanjai dinding nya bisi kira-kira 445 meter.*
14 Malkijah anak Rekap ngaduka Pintu Tugung Amau. Iya masang pintu, palang, enggau utai kena ngunchi pintu nya. Malkijah nya tuai ba kawasan Bet-hakerem.
15 Shalun anak Kolhoseh ngaga Pintu Telaga. Iya ngaga perabung pintu nya sereta masang pintu, palang, enggau utai kena ngunchi pintu nya. Iya mega ngaduka dinding Kolam Saluran ke semak enggau Taman Raja. Iya ngaga dinding nya sampai ngagai Tangga ke nurun ari Kuta David. Shalun nya tuai ba kawasan Mispah.
16 Nehemiah anak Asbuk ngaga begian dinding ke ba depan Pendam David. Iya ngaga dinding nya sampai ngagai kolam ke digaga orang nyentuk ngagai Rumah Pahlawan. Nehemiah nya tuai ba setengah ari kawasan Bet-sur.
17 Begian dinding ke pengudah nya digaga orang Lewi ke gawa ba baruh Rehum anak Bani. Begian dinding ke pengudah nya digaga Hasabiah. Hasabiah nya tuai ba setengah ari kawasan Keilah. Iya meh pengari ari kawasan nya.
18 Begian dinding ke pengudah nya digaga orang Lewi ke bukai ke gawa ba baruh Bavai anak Henadat. Bavai nya tuai ba setengah ari kawasan Keilah.
19 Eser anak Jesua ngaga dinding ke ba siti da agi begian ba depan kawasan lereng. Lereng nya nuju ngagai Setor Senyata ke ba Tiang Penyukung. Eser nya tuai ke megai Mispah.
20 Begian ke pengudah nya digaga Baruk anak Sabai. Iya ransing amat gawa. Iya ngaga dinding berengkah ari Tiang Penyukung sampai ngagai pintu penama rumah Imam Besai Eliasip.
21 Meremot anak Urijah, iya nya uchu Hakos, ngaga begian dinding ke pengudah nya. Iya berengkah ari pintu penama rumah Eliasip sampai ngagai ujung rumah Eliasip.
22 Begian dinding ke pengudah nya diaduka bala imam ke datai ari kawasan Jordan.*
23 Benjamin enggau Hasup ngaduka begian dinding ke pengudah nya ke ba depan rumah seduai iya empu. Begian dinding ke pengudah nya diaduka Asariah anak Maseyah, iya nya uchu Ananiah. Dinding nya semak rumah iya empu.
24 Udah nya, Binui anak Henadat ngaduka begian dinding ke pengudah nya. Iya berengkah ari rumah Asariah sampai ngagai Tiang Penyukung, lalu iya ngaduka dinding nya nyentukka ngagai sukut dinding.
25 Palal anak Usai ngaduka begian dinding ke pengudah nya, iya nya ke ba depan Tiang Penyukung. Dinding nya mega bisi ba depan menara ke ba Istana Raja. Begian atas menara nya semak enggau Laman Jejaga. Begian dinding ke pengudah nya digaga Pedayah anak Paros.
26 Bala orang ke gawa ba Rumah Sembiang* ke diau ba Opel ngaga begian dinding ke pengudah nya. Sida ngaga dinding sampai ngagai begian ke ba depan Pintu Ai ke ba timur, lalu sampai ngagai menara ke ngelui pansut ari dinding kuta.
27 Orang Tekoa ngaga begian dinding ke pengudah nya. Sida berengkah ari depan menara ke ngelui pansut ari dinding kuta sampai ngagai dinding Opel.
28 Bala imam ngaduka begian dinding ke ba atas Pintu Kuda. Tiap iku sida gawa ba depan rumah sida empu.
29 Begian dinding ke pengudah nya digaga Sadok anak Imer, lalu begian dinding nya ba depan rumah iya empu.
Begian dinding ke pengudah nya digaga Semayah anak Sekaniah. Semayah nya penyaga Pintu Timur.
30 Begian dinding ke pengudah nya digaga Hananiah enggau Hanun. Hananiah nya anak Selemiah, lalu Hanun nya anak Salap ke lumur enam.
Begian dinding ke pengudah nya diaduka Mesulam anak Berekiah. Begian dinding nya ba depan rumah* iya empu.
31 Malkijah ngaga begian dinding ke pengudah nya sampai ngagai rumah orang ke bedagang enggau rumah bala orang ke gawa ba Rumah Sembiang.* Rumah sida semak enggau Pintu Peresa. Udah nya, iya neruska pengawa iya sampai ngagai bilik atas ke ba sukut dinding. Malkijah nya siku ari orang ke enggau raban tukang emas.
32 Begian dinding ke pengudah nya digaga bala tukang emas enggau bala orang ke bedagang. Sida berengkah ari sukut dinding sampai ngagai Pintu Bedus.
Nota Kaki
^ Tauka “bala menyadi iya.”
^ Tauka “nyerahka nya ngagai Petara.”
^ Tauka “nusun batu ba.”
^ Jaku Asal, “1,000 kiubit.” Peda Rujukan B14.
^ Tauka engka, “kawasan ke enda jauh ari nya.”
^ Tauka “Netinim.” Jaku Asal, “orang ke diberi.”
^ Tauka “bilik.”
^ Tauka “Netinim.” Jaku Asal, “orang ke diberi.”
