Nehemiah 4:1-23
4 Sanbalat balat amat ringat sereta pedis ati lebuh iya nemu pasal kami ke nirika baru dinding kuta. Iya majak ngemelika orang Judah.
2 Iya pan bejaku ngagai bala kaban iya enggau ngagai bala soldadu Samaria: “Nama digaga orang Judah tu? Udah ga sida lemi. Ulih sida nembuka tu kediri? Kati sida deka nyerahka pemeri, lalu nembuka pengawa nya dalam sehari? Engka sida deka ngena batu ari tugung batu ke udah angus nya kini?”
3 Maya nya, siku orang Amon ke benama Tobiah bediri ba sepiak Sanbalat. Ku Tobiah madahka: “Enti siku munsang* niki dinding sida nya, kada enda runtuh dinding nya!”
4 Aku lalu besampi: “O Petara kami, dingaka meh sampi kami laban sida udah ngeleseka kami. Awakka sida ditinggang penulah ketegal jaku kelese sida nya,* lalu awakka sida ditangkap lalu ditaban ngagai menua bukai.
5 Anang enda pedulika penyalah sida lalu anang madamka dosa sida, laban sida udah ngeleseka orang ke ngaga dinding tu.”
6 Kami pan neruska pengawa ngaga dinding kuta nya. Kami mujur nyambung semua begian dinding ngelingi kuta nya, lalu kami ulih nembuka setengah ari peninggi dinding nya. Semua kami gawa enggau pengabis ati.
7 Pengawa nirika baru dinding kuta Jerusalem majak mujur, lalu lubang ba dinding nya benung dialitka magang. Lebuh Sanbalat, Tobiah, orang Arab, orang Amon, enggau orang Asdod ninga pasal nya, sida pan nyadi balat amat ringat.
8 Sida bepakat deka nyerang Jerusalem lalu ngachau orang ba dia.
9 Tang, kami besampi ngagai Petara kami, lalu ngasuh orang bejaga siang enggau malam.
10 Taja pia, orang Judah madahka: “Bala pekereja* nyau nadai agi pengering. Tugung batu pan agi mayuh. Nadai ulih kitai nembuka dinding tu.”
11 Bala munsuh kami majak madahka: “Sebedau sida sedar, kitai deka nyerang lalu munuh sida ngambika pengawa sida teketu. Sida tentu enda meda penatai kitai.”
12 Tiap kali orang Judah ke diau semak enggau bala munsuh nya datai ngagai kuta, sida bekali-kali* madah ngagai kami: “Sida deka nyerang kitai ari semua endur.”
13 Nya alai, aku ngasuh orang bejaga semak enggau dinding ke ba kawasan ke senang kena serang.* Aku ngasuh sida bejaga nitihka ruang bilik sida, lalu sida mai pedang, sangkuh, enggau panah maya bejaga.
14 Lebuh aku meda semua orang berasai takut, aku lalu angkat betemu enggau sida ke tinggi pangkat, bala tuai, enggau bala rayat ke bukai. Ku aku bejaku: “Anang takutka sida. Ingat meh ke Jehovah ti amat bekuasa. Iya meh Petara ti patut dipebasa enggau dikenangi. Belaban meh kena nyaga bala menyadi kita, bala anak kita, bala bini kita, enggau rumah kita.”
15 Lebuh munsuh kami ninga kami udah nemu pelan sida, lalu Petara udah ngasuh pelan sida enda mujur, semua kami pan neruska pengawa nirika dinding kuta.
16 Kenyau ari maya nya, setengah ari bala aku deka gawa, lalu setengah da agi deka bejaga. Sida ke bejaga nya ngena baju perang, lalu megai sangkuh, terabai, enggau panah. Bala tuai nyukung* semua orang Judah
17 ke ngaduka dinding kuta. Sida ke ngangkat utai ti berat gawa ngena sepiak jari aja, lalu jari ke sepiak da agi megai senyata.
18 Semua orang ke gawa bela nangkin pedang magang, lalu orang ke nyepu terumpit* bediri ba sepiak aku.
19 Udah nya, aku madah ngagai sida ke tinggi pangkat, bala tuai, enggau bala rayat ke bukai: “Pengawa tu besai sereta mayuh, lalu kitai jauh ari pangan diri lebuh kitai gawa ngaduka dinding.
20 Nyadi, lebuh kita ninga bunyi terumpit, kita patut datai begelumu ngelingi aku. Petara kitai deka belaban ngarika kitai.”
21 Setengah ari bala kami neruska pengawa, lalu setengah da agi bepegaika sangkuh. Baka nya meh kami gawa, berengkah ari maya mata panas tumbuh nyentuk ngagai maya bintang ayan ba langit.
22 Ku aku bejaku ngagai bala rayat: “Sida ke lelaki enggau penulung sida patut bemalam ba dalam kuta Jerusalem. Sida deka gawa maya siang hari, lalu maya malam hari sida patut bejaga.”
23 Aku, bala menyadi aku, bala penulung aku, enggau bala jejaga ke nitihka aku nadai kala muka gari diri. Jari kanan tiap iku kami seruran megai senyata.
Nota Kaki
^ Sebengkah jelu ke baka ukui ba menua Israel enggau menua ke semak iya.
^ Jaku Asal, “Awakka jaku kelese sida nikal ngagai pala sida.”
^ Tauka “pekereja ke ngangkut utai berat.”
^ Jaku Asal, “10 kali.”
^ Tauka “bejaga ba kawasan paling baruh sereta lapang ba belakang dinding.”
^ Jaku Asal, “bisi ba belakang.”
^ Jaku Asal, “tanduk.”