Nehemiah 5:1-19
5 Mayuh orang Judah enggau bini sida balat besebana ketegal bala sida ke sama bansa Judah.
2 Sekeda sida madahka: “Kami bisi mayuh anak. Kami patut ngulihka bijirin ngambika kami bisi utai diempa lalu ulih idup.”
3 Sekeda ke bukai madahka: “Kami nyau begadaika ladang, kebun anggur, enggau rumah kami nyadika jamin kena ngulihka bijirin lebuh kami enda chukup pemakai.”
4 Bisi mega madahka: “Kami nyau nginjau duit kena mayar chukai ngagai raja, lalu kami begadaika ladang enggau kebun anggur kami nyadika jamin.
5 Kitai tu orang Judah magang. Sama darah getah.* Anak kami pan baka anak sida. Tang, nama kebuah anak kami patut nyadi ulun deh? Sekeda anak indu kami pan udah nyadi ulun. Kami nyau nadai daya agi. Kami nadai ulih ngereja utai agi, laban kebun anggur enggau ladang kami udah diempu orang magang.”
6 Pengudah aku ninga utai ku sida, aku balat amat ringat.
7 Aku berundingka pasal tu enggau manah. Aku madahka pasal tu ngagai bala orang ke tinggi pangkat sereta ngagai bala tuai. Ku aku madah ngagai sida: “Tiap iku kita udah minta bungai duit ari bala kita empu.”
Aku lalu ngatur siti gempuru kena mutarka penanggul nya.
8 Ku aku madah ngagai sida: “Kami udah bebendar nebus bala menyadi kitai empu ke bansa Judah ke dijual ngagai bansa bukai. Tang diatu, kita empu nyual bala menyadi kita. Kati kami patut nebus sida baru?” Sida lalu enda bemunyi sereta enda nyaut seleka jaku.
9 Udah nya, aku madahka: “Salah pengawa kita nya. Kita patut nangika Petara kitai, ngambika munsuh kitai ari bansa bukai enda agi ngeleseka kitai.
10 Aku, bala aku, enggau bala penulung aku pan nyali duit enggau bijirin ngagai sida, tang kami nadai minta bungai duit. Nyadi, badu agi meh kita minta bungai duit ari sida lebuh kita nyali utai ngagai sida.
11 Pulaika baru ladang sida, kebun anggur sida, ladang buah kana sida, enggau rumah sida. Pia mega, pulaika baru bungai duit* ke diulih kita ari duit, bijirin, wain ti baru, enggau minyak ke udah dijali kita ngagai sida.”
12 Ku sida nyaut: “Kami deka mulaika baru semua utai nya, lalu kami nadai minta utai agi ari sida. Kami deka ngereja utai ke dipadahka nuan.” Pengudah aku ngangauka bala imam, aku pan ngasuh sida besumpah ngambika sida ngamatka semaya sida.
13 Udah nya, aku nesaika gari aku lalu madah: “Baka tu meh gaya Petara ti bendar deka nesaika orang ke enda ngamatka semaya iya. Rumah iya enggau semua utai ke diempu iya deka diambi Petara nyentukka iya nadai agi utai.” Sida pan nyebut: “Amin!”* Lalu sida muji Jehovah. Semua orang ngamatka semaya sida.
14 Aku dilantik nyadi gabenor menua Judah kenyau ari taun ke-20 nyentuk ngagai taun ke-32 Raja Artaserses merintah. Pengelama 12 taun nya, aku enggau bala menyadi aku nadai kala makai pemakai ke diungkupka ngagai gabenor.
15 Taja pia, bala gabenor ke sebedau aku udah ngenusahka pengidup bala rayat. Sida minta 40 shekel* pirak ari bala rayat kena meli roti enggau wain tiap hari. Bala penulung sida mega merinsaka bala rayat. Tang, aku enda baka nya laban aku nangika Petara.
16 Kelimpah ari nya, aku mega bisi enggau ngaduka dinding kuta, lalu bala penulung aku mega sama enggau gawa. Taja pia, kami nadai ngambi tanah ari sida ke miskin. Siti pan nadai.
17 Nambahka nya, bisi 150 iku orang Judah enggau bala tuai ke makai enggau aku, nyengkaum bala temuai ke datai ari menua bukai.
18 Tiap hari, siku sapi lelaki, enam iku bedus ke pemadu manah, enggau mayuh burung disediaka orang ke aku.* Tiap 10 hari, orang nyediaka bemacham wain ke kami, lalu penyampau wain ke disediaka nya amat mayuh. Taja pia, aku nadai kala minta pemakai ke udah diungkupka ngagai gabenor, laban pengidup bala rayat udah chukup tusah ketegal pengawa ti berat.
19 O Petara aku, anang enda ingatka aku lalu berekatka meh aku, laban aku udah ngereja mayuh utai ke bala rayat.
Nota Kaki
^ Tauka “Bisi pertalian darah.”
^ Jaku Asal, “satu perseratus,” merujuk ngagai 1 peratus bungai duit ke dibayar tiap bulan.
^ Tauka “Awakka nya nyadi!”
^ Peda Rujukan B14.
^ Tauka “disedia ngena belanja aku empu.”
