Nehemiah 6:1-19
6 Semua dinding kuta Jerusalem udah abis digaga, lalu semua lubang ba dinding nya udah dialitka magang. Lebuh Sanbalat, Tobiah, siku orang Arab ke benama Gesem, sereta bala munsuh kami nemu pasal nya (Maya nya, aku bedau masang pintu ba bingkai pintu.),
2 Sanbalat enggau Gesem terus ngirumka pesan tu ngagai aku: “Aram kitai betemu ba kampung ke ba Lebak Ono, kitai nentuka ni maya kitai ulih betemu.” Tang kebendar iya, sida bisi pelan deka ngemediska aku.
3 Nyadi, aku ngasuh orang ngirumka pesan tu ngagai sida: “Aku benung ngereja pengawa ti besai. Nyadi, aku nadai ulih mansang kin. Nama kebuah aku patut ngetu ngereja pengawa tu lalu betemu enggau kita?”
4 Empat kali sida ngirumka pesan ti sama, tang aku mega meri sida saut ti sama.
5 Udah nya, Sanbalat ngasuh penulung iya betemu enggau aku. Tu kali kelima iya mai pesan ti sama. Tang kali tu, iya mega mai surat ke enda ditutup.
6 Tu utai ke dipadahka ba surat nya: “Bansa bukai bisi ninga pasal nuan enggau orang Judah bisi pelan deka angkat ngelaban. Gesem mega bisi nyebut utai ti sama. Nya meh kebuah nuan deka nirika dinding kuta. Aku mega bisi ninga nuan deka nyadi raja sida.
7 Ukai nya aja, nuan mega udah ngelantik bala nabi ngambika sida ulih bejaku munyi tu pasal nuan ngagai serata Jerusalem: ‘Judah udah bisi raja!’ Semua tu tentu deka dipadahka ngagai raja. Nyadi, aram kitai berandau pasal utai tu.”
8 Ku aku nyaut surat iya: “Semua utai ke dipadahka nuan nya enda amat. Nya cherita ke digaga nuan ngapa!”*
9 Semua sida nguji ngenakutka kami. Ku sida madahka: “Jari sida tentu lembau deka ngereja pengawa nya. Nadai jalai pengawa nya deka tembu.” Nya alai, aku besampi: “O Petara, keringka meh jari aku.”
10 Udah nya, aku datai ngagai rumah Semayah anak Delayah, iya nya uchu Mehetabel. Maya nya, iya enda pansut ari rumah. Ku Semayah madahka: “Aram kitai betemu ba Rumah Petara ti bendar, ba dalam Rumah Sembiang. Kitai nentuka ni maya kitai deka betemu ba dia. Udah nya, kitai nutup pintu Rumah Sembiang laban sida deka datai munuh nuan. Malam tu sida deka datai munuh nuan.”
11 Ku aku nyaut iya: “Patut aku ke nyadi gabenor ngerarika diri? Tau orang ke baka aku tu tama ngagai Rumah Sembiang, lalu udah nya mengkang idup? Nadai aku ka kin!”
12 Udah nya, aku sedar ukai Petara ke nganjung nabi tu, tang Tobiah enggau Sanbalat ke udah ngupah iya ngambika nipu aku.
13 Sida ngupah iya kena ngenakutka aku lalu ngasuh aku bedosa. Sida ngereja nya laban deka ngenyaika nama aku lalu ngemaluka aku.
14 Nya alai, aku besampi: “O Petara aku, kingatka meh utai ke udah digaga Tobiah enggau Sanbalat. Pia mega, utai ke udah digaga nabi indu ke benama Noadiah enggau bala nabi ke bukai ke udah mayuh kali nguji deka ngenakutka aku.”
15 Dinding kuta nya mujur digaga kami dalam timpuh 52 hari. Dinding nya tembu digaga kena hari ke-25 dalam bulan Elul.*
16 Lebuh semua munsuh kami ninga pasal nya, lalu semua bansa ke ngelingi kami meda utai ke nyadi nya, sida pan berasai amat malu. Sida mega sedar, Petara meh ke udah nulung kami nembuka pengawa nya.
17 Maya nya, bala orang Judah ke tinggi pangkat suah nulis surat ngagai Tobiah, lalu Tobiah deka malas surat sida.
18 Mayuh orang Judah besumpah deka nyukung Tobiah, laban iya menantu Sekaniah anak Arah. Nambahka nya, anak lelaki iya ke benama Jehohanan udah kawin enggau anak indu Mesulam anak Berekiah.
19 Orang Judah suah nyebut utai ti manah pasal Tobiah ngagai aku. Sida mega deka ngeriput ngagai Tobiah utai ke dipadahka aku. Udah nya, Tobiah deka ngirumka mayuh surat kena ngenakutka aku.
