Nehemiah 8:1-18
8 Semua orang begempuru ba dataran awam ke ba depan Pintu Ai. Sida bisi tuju ti sama. Sida ngasuh siku penyalin* ke benama Esra ngambi bup Adat Moses. Nya meh Adat ke diberi Jehovah ngagai orang Israel.
2 Nyadi, kena hari ti keterubah, ba bulan ti ketujuh, Imam Esra mai bup Adat ngagai bala orang ke begempuru nya. Iya macha bup nya ba depan sida ke lelaki, indu, enggau semua orang ke ulih ninga sereta faham utai ke didinga sida.
3 Ari tumu pagi nyentuk ngagai tengah hari, Esra macha bup nya enggau inggar ba dataran awam ke ba depan Pintu Ai. Sida ke lelaki, indu, enggau semua orang ke ulih faham ninga enggau manah lebuh bup Adat dibacha.
4 Penyalin* ke benama Esra nya bediri ba atas pentas kayu ke endang digaga ke pengawa nya. Matitiah, Shema, Anayah, Uriah, Hilkiah, enggau Maseyah bediri ba sepiak kanan iya, lalu Pedayah, Misael, Malkijah, Hasum, Has-badanah, Sekariah, enggau Mesulam bediri ba sepiak kiba iya.
5 Lebuh Esra muka bup nya, semua orang pan bediri magang. Maya nya, semua orang ulih meda Esra laban iya bediri tinggi agi ari sida.
6 Udah nya, Esra muji Jehovah, Petara ti bendar sereta bemulia, lalu semua orang ngangkatka jari sereta nyebut: “Amin!* Amin!” Sida pan besugang lalu nyungkurka diri ke tanah ba depan Jehovah.
7 Orang Lewi ke benama Jesua, Bani, Serebiah, Jamin, Akup, Sabetai, Hodiah, Maseyah, Kelita, Asariah, Josabat, Hanan, enggau Pelayah nerangka Adat ngagai semua orang ke benung bediri ba dia.
8 Sida terus macha enggau inggar bup Adat ari Petara ti bendar. Sida nerangka enggau silik ngambika orang ulih faham reti utai ke dibacha nya.
9 Semua orang ke ba dia nyabak magang pengudah sida ninga utai ke dipadah ba Adat. Nya alai, Nehemiah ke nyadi gabenor* maya nya, Esra ke nyadi imam enggau penyalin,* sereta orang Lewi ke ngajar orang ba dia, bejaku munyi tu: “Seharitu hari ti kudus ke Petara kita, Jehovah. Nyadi, anang meh tusah ati tauka nyabak.”
10 Ku Nehemiah madah ngagai sida: “Empa meh pemakai ti pemadu manah, lalu irup meh ai ti manis. Kunsi meh pemakai kita enggau orang ke nadai pemakai. Anang meh tusah ati, laban seharitu hari ti kudus ke Tuan kitai, lalu pengaga ari Jehovah deka ngasuh kita kering.”*
11 Ku orang Lewi ngelantangka ati semua orang ke ba dia: “Udah meh nya. Anang nyabak agi, laban seharitu hari ti kudus. Nyadi, anang meh tusah ati.”
12 Semua orang pan mupuk lalu makai sereta ngirup. Sida mega bekunsika pemakai enggau orang bukai. Sida amat gaga ati, laban sida faham utai ke dipadahka ngagai sida.
13 Ba hari ti kedua, bala tuai suku Israel, bala imam, enggau orang Lewi begempuru. Sida datai ngelingi penyalin nya, iya nya Esra, ngambika sida ulih faham enggau dalam agi utai ke dipadah ba Adat.
14 Nya baru sida nemu, nitihka Adat ke diberi Jehovah nengah Moses, orang Israel patut diau dalam langkau* lebuh ngintu pengerami ba bulan ti ketujuh.
15 Sida mega patut madahka jaku gerah tu ngagai semua kuta sida enggau ba serata Jerusalem: “Alai ngagai kawasan ke begunung, lalu ambi dan kayu ke bedaun ari pun kayu kana, pun kayu pain, pun kayu mirtel, pun kayu engkerema, enggau pun kayu ke bukai. Udah nya, gaga langkau nitihka utai ke udah ditulis.”
16 Nya alai, semua orang pan mupuk ngambi dan kayu nya. Udah nya, tiap iku sida ngaga langkau ba atas perabung rumah sida, ba laman rumah sida, ba laman Rumah Petara ti bendar, ba dataran awam ke ba Pintu Ai, enggau ba dataran awam ke ba Pintu Efraim.
17 Semua orang, iya nya sida ke udah pulai pengudah ditaban ngagai menua bukai, ngaga langkau sida empu lalu diau ba langkau nya. Sida amat gaga ati laban kenyau ari jeman Josua anak Nun, sida nadai kala ngintu pengerami nya nitihka chara nya.
18 Tiap hari, bup Adat ari Petara ti bendar dibacha, kenyau ari hari ti keterubah nyentuk ngagai hari ti kepenudi. Sida ngintu pengerami nya pengelama tujuh hari. Ba hari ti kelapan, sida ngatur gempuru ti kudus, baka ke patut digaga sida.
Nota Kaki
^ Tauka “orang ke ngupi Adat.”
^ Tauka “Orang ke ngupi Adat.”
^ Tauka “Awakka nya nyadi!”
^ Tauka “Tirshata,” iya nya gelar gabenor ba perintah Persia.
^ Tauka “orang ke ngupi Adat.”
^ Tauka “deka nyadi kubu kita.”
^ Tauka “endur alai diau enda lama.”
