Nehemiah 9:1-38
9 Kena hari ke-24, dalam bulan ketujuh, orang Israel begelumu. Sida bepuasa, ngerasukka kain guni, sereta ngengkahka tanah ba atas pala diri.
2 Udah nya, orang Israel nyeraraka diri ari semua orang asing. Sida bediri lalu ngaku dosa diri, nyengkaum dosa aki ini sida.
3 Lebuh sida bediri, sida ninga bup Adat Petara sida, Jehovah, dibacha enggau nyawa ti inggar pengelama tiga jam. Tiga jam ke pengudah nya, sida ngaku dosa sida lalu besugang ngagai Petara sida, Jehovah.
4 Jesua, Bani, Kadmiel, Sebaniah, Buni, Serebiah, Bani, enggau Chenani bediri ba atas pentas orang Lewi, lalu sida besampi enggau nyawa ti inggar ngagai Petara sida, Jehovah.
5 Udah nya, orang Lewi ke benama Jesua, Kadmiel, Bani, Hasapniah, Serebiah, Hodiah, Sebaniah, enggau Petahiah madahka: “Bediri meh lalu puji Petara kita, Jehovah, belama iya. O Petara, awakka sida muji nama Nuan ti mulia, iya nya nama ti mulia agi ari semua berekat enggau jaku puji.
6 “Semina Nuan aja meh Jehovah. Nuan udah ngaga langit. Indah, seluruh langit enggau semua utai* ke ba langit digaga Nuan magang. Nuan udah ngaga dunya enggau semua utai ke ba dunya sereta ngaga tasik enggau semua utai ke ba dalam tasik. Nuan ngemataka semua utai ngambika semua nya tetap idup. Semua utai* ke ba langit besugang ngagai Nuan.
7 Nuan meh Jehovah, Petara ti bendar. Nuan udah milih Abram lalu mai iya pansut ari Ur, iya nya kuta orang Kaldea, lalu Nuan nukar nama iya nyadi Abraham.
8 Nuan beratika ati iya setia ngagai Nuan. Nya alai, Nuan ngaga sempekat enggau iya. Nuan besemaya deka meri menua orang Kanaan, orang Het, orang Amor, orang Peris, orang Jebus, enggau orang Girgas ngagai iya enggau peturun iya. Nuan ngamatka semaya Nuan nya laban Nuan Petara ti lurus.
9 “Nuan meda bala aki ini kami merinsa ba Ejip, lalu Nuan ninga sebana sida ba Tasik Mirah.
10 Udah nya, Nuan ngayanka mayuh tanda sereta ngereja mayuh utai ti luar biasa kena ngukum Firaun,* semua pegawai iya, enggau semua rayat iya, laban Nuan nemu sida udah merinsaka bala nembiak Nuan. Nuan ngasuh nama Nuan ditemu orang nyentukka seharitu.
11 Nuan nyeraraka ai tasik ba depan bala nembiak Nuan ngambika sida ulih meraka ke seberai nengah tanah ti rangkai. Nuan nikauka orang ke begagaika sida ngagai tasik ti dalam, baka ke nikauka batu ngagai tasik ti begelumbang.
12 Nuan ngiring sida ngena tiang remang* maya siang hari, lalu maya malam hari Nuan ngiring sida ngena tiang api ngambika jalai sida terang.
13 Nuan nurun ngagai Gunung Sinai, lalu bejaku enggau sida ari serega. Nuan meri sida atur ti lurus, adat ti tau dikearapka,* sereta peraturan enggau pesan ti manah.
14 Nuan ngajar sida pasal Hari Sabat ti kudus. Lalu nengah nembiak Nuan, Moses, Nuan meri pesan, atur, enggau adat ngagai sida.
15 Nuan ngasuh roti labuh ari langit lebuh sida lapar, lalu Nuan ngasuh ai pansut ari bukit batu lebuh sida aus. Nuan ngasuh sida mansang lalu ngambi menua ke udah disemayaka Nuan ngagai sida.
16 “Tang, bala aki ini kami sumbung sereta degil. Sida enggai ngasika pesan Nuan.
17 Sida enggai mending, lalu sida enda ingatka utai ti luar biasa ke udah digaga Nuan ke sida. Sida nyadi degil lalu milih siku ketuai mai sida pulai baru nyadi ulun ba Ejip. Taja pia, Nuan Petara ke sedia deka ngampun. Nuan Petara ti pengasih sereta siru, lalu Nuan lubah ringat. Nuan mega belimpah enggau pengerindu ti setia, lalu Nuan enda ninggalka sida.
18 Taja pan sida ngaga patung anak sapi lalu madahka: ‘Tu meh Petara kitai ke udah mai kitai pansut ari Ejip,’ lalu sida balat enda bebasaka Nuan,
19 tang Nuan agi ngayanka pengasih ti besai ngagai sida, lalu enda ninggalka sida ba menua puang. Tiang remang enda ninggalka sida, tang agi ngiring pejalai sida maya siang hari. Tiang api mega enda ninggalka sida, tang agi ngasuh pejalai sida terang maya malam hari.
20 Nuan meri sida kuasa kudus* Nuan ngambika sida bepenemu-dalam. Nuan mega agi meri sida manna sereta meri sida ai irup lebuh sida aus.
21 Pengelama 40 taun, Nuan nyediaka pemakai ke sida ba menua puang. Sida nadai suntuk utai. Gari sida enda jai, lalu kaki sida enda kembai.
22 “Nuan nyerahka perintah enggau orang bansa bukai ngagai sida, lalu menua orang nya diberi Nuan siti-siti ngagai sida. Nyadi, sida pan nguasa menua Sihon, iya nya menua raja Hesbon, sereta menua Raja Og ari Basan.
23 Nuan ngasuh penyampau bala peturun sida ngemayuh bintang ba langit. Udah nya, Nuan mai sida ngagai menua ke udah disemayaka Nuan ngagai aki ini sida. Nya meh menua ke patut diempu sida.
24 Nyadi, bala peturun sida pan tama ngagai menua nya, lalu nguasa menua nya. Nuan nulung sida ngalahka orang Kanaan ke diau ba dia. Nuan nyerahka orang nya ngagai sida, ngambika sida ulih ngereja sepeneka ati sida ngagai bala raja enggau rayat menua nya.
25 Sida nguasa kuta ke bisi dinding ti teguh sereta tanah ti subur. Sida bulih rumah ke penuh enggau semua macham utai ti manah, telaga ke udah digaga, kebun anggur, ladang buah kana, enggau mayuh amat pun buah. Sida makai sampai puas lalu nyadi gemu. Sida lantang ati ngasaika pemanah Nuan ti belimpah.
26 “Taja pia, sida enda ngasi lalu angkat ngelaban Nuan. Sida ninggalka Adat Nuan.* Bala nabi Nuan datai meri sida amaran lalu meransang sida pulai baru ngagai Nuan, tang sida munuh bala nabi Nuan. Sida mega ngereja utai ti nunjukka sida balat amat enda bebasaka Nuan.
27 Nya alai, Nuan nyerahka sida ngagai bala munsuh sida ke majak ngasuh sida merinsa. Lebuh sida merinsa, sida besebana ngagai Nuan, lalu Nuan ningaka sida ari serega. Ketegal pengasih Nuan ti besai, Nuan ngasuh bala penyelamat datai ngelepaska sida ari bala munsuh.
28 “Tang pengudah sida idup lantang, sida terus ngereja utai ti jai baru ba mata Nuan. Nyadi, Nuan ninggalka sida, lalu nyerahka sida ngagai bala munsuh sida ke deka bekuasa atas sida.* Udah nya, sida pulai baru ngagai Nuan lalu minta tulung ari Nuan. Nuan deka mendingka sida ari serega lalu nyelamatka sida bekali-kali, laban pengasih Nuan amat besai.
29 Taja pan Nuan udah meri amaran ngagai sida, lalu ngasuh sida ngasika Adat Nuan baru, sida agi tetap sumbung lalu enggai ningaka pesan Nuan. Sida bedosa laban sida ngelanggar atur Nuan ke ulih meri pengidup ngagai orang ke nitihka atur nya. Tang sida degil lalu ninggalka Nuan, lalu sida enggai mending.
30 Pengelama betaun-taun Nuan sabar enggau sida. Ngena kuasa kudus, Nuan majak meri amaran ngagai sida nengah bala nabi Nuan. Tang sida enggai mending. Pengujung iya, Nuan nyerahka sida ngagai orang ba menua nya.
31 Tang ketegal pengasih Nuan ti besai, Nuan enda ngemunaska sida tauka ninggalka sida. Nuan meh Petara ti pengasih sereta siru.
32 “O Petara kami, Petara ti kering sereta bekuasa, Petara ti patut dipebasa sereta dikenangi, ke seruran ngamatka sempekat sereta ngayanka pengerindu ti setia, anang enda ibuhka semua penusah ke ninggang kami, bala raja kami, bala tuai kami, bala imam kami, bala nabi kami, bala aki ini kami, sereta semua nembiak Nuan, kenyau ari jeman bala raja Asiria nyentukka seharitu.
33 Taja pan semua utai nya ninggang kami, Nuan seruran lurus enggau setia ngagai kami. Kami meh ke udah ngereja utai ti jai.
34 Bala raja kami, bala tuai kami, bala imam kami, enggau bala aki ini kami enda nitihka Adat Nuan, lalu sida enda pedulika pesan tauka amaran ari Nuan.
35 Ketegal pemanah Nuan ti belimpah, sida idup lantang ba perintah sida sereta ba tanah ti luas enggau subur ke diberi Nuan ngagai sida. Taja pia, agi meh sida enda nyembah Nuan, lalu enda ninggalka pengawa sida ti jai.
36 Nya meh kebuah kami nyadi ulun diatu. Kami nyadi ulun ba menua ke udah diberi Nuan ngagai aki ini kami. Aki ini kami patut iya makai asil ari menua tu sereta ngasaika semua utai ti manah ke bisi ba menua tu.
37 Taja pia, asil ti belimpah ari menua tu diempu bala raja ke bekuasa atas kami laban kami bedosa. Sida bekuasa atas kami sereta atas jelu tupi kami. Sida ngelayan kami sepeneka ati sida. Pengidup kami balat amat merinsa.
38 “Nya alai, kami ngaga siti sempekat. Sempekat nya deka ditulis lalu disahka ngena chop bala tuai kami, orang Lewi, enggau bala imam kami.”
Nota Kaki
^ Jaku Asal, “soldadu.”
^ Jaku Asal, “soldadu.”
^ Gelar ke diberi ngagai raja Ejip.
^ Tauka “awan.”
^ Tauka “adat pemendar.”
^ Peda Penerang Leka Jaku.
^ Jaku Asal, “nikauka Adat nuan ke belakang sida.”
^ Tauka “nganchurka sida.”
