Pemandang 5:1-14
5 Ba jari kanan Iya ke duduk ba kerusi diraja, aku bisi meda gulung surat ke bisi tulisan ba kedua-dua piak surat nya. Gulung surat nya ditambit rat ngena tujuh iti chop.
2 Udah nya aku meda siku melikat ti kering bejaku enggau nyawa ti inggar: “Sapa ke layak mechahka chop ba gulung surat nya lalu muka iya?”
3 Taja pia, nadai siku pan ke ba serega tauka ba dunya tauka ba baruh dunya, ke ulih muka gulung surat nya tauka meda utai ke ba dalam surat nya.
4 Aku pan lalu balat amat duie-duie nyabak, laban nadai siku pan ke layak muka gulung surat nya tauka meda utai ke ba dalam surat nya.
5 Tang siku ari bala tuai madah ngagai aku: “Badu agi nyabak. Peda! Singa ari raban bansa Judah, iya nya urat David, udah menang belaban lalu ulih muka tujuh iti chop enggau gulung surat nya.”
6 Semak enggau kerusi diraja sereta ba tengah-tengah empat iku melikat enggau ba tengah-tengah bala tuai, aku meda siku anak bedus ke baka ke udah kena sayat. Anak bedus nya bisi tujuh iti tanduk enggau tujuh iti mata. Mata iya ngambarka tujuh iti kuasa Petara ke udah dianjung ngagai serata dunya.
7 Tekala nya, iya mansang lalu ngambi gulung surat ari jari kanan Iya ke duduk ba kerusi diraja.
8 Lebuh Anak Bedus nya ngambi gulung surat, empat iku melikat enggau 24 iku bala tuai besugang ba mua iya. Tiap iku bala tuai nya bisi belikan* enggau mangkuk emas ke penuh enggau menyan. Menyan nya ngambarka sampi nembiak Petara ti kudus.
9 Sida belaguka siti lagu ti baru. Ku sida: “Nuan endang layak ngambi gulung surat nya lalu muka chop iya laban nuan udah disayat, lalu ngena darah nuan, nuan udah meli orang ari tiap iti raban bansa, jaku, bansa, enggau menua ke Petara.
10 Nuan mega ngaga sida nyadi raja enggau imam ke Petara kitai, lalu sida deka merintah nyadi raja atas dunya.”
11 Ngelingi kerusi diraja, empat iku melikat, enggau bala tuai nya, aku meda sereta ninga bunyi nyawa mayuh melikat. Penyampau sida bisi bepuluh-puluh ribu darab bepuluh-puluh ribu sereta beribu-ribu darab beribu-ribu.
12 Semua sida madah enggau nyawa ti inggar: “Anak Bedus ke udah disayat nya layak nerima kuasa, pengaya, penemu-dalam, pengering, basa, mulia, enggau berekat.”
13 Aku ninga semua utai ti idup ke bisi ba serega, ba dunya, ba baruh dunya, sereta ba tasik. Au, semua sida madahka: “Awakka Iya ke duduk ba kerusi diraja enggau Anak Bedus nerima berekat, basa, mulia, enggau kuasa nyentuk ke belama iya.”
14 Empat iku melikat nya pan madahka: “Amin!” Bala tuai nya lalu besugang nyembah Petara.
Nota Kaki
^ Tauka “harp.” Sebengkah perengka musik ke betali baka gitar, tang gamal iya enda sebaka enggau gitar.
