Pemandang 9:1-21
9 Melikat ti kelima nyepu terumpit iya, lalu aku meda sigi bintang ke udah labuh ari langit ke dunya. Bintang nya diberi kunchi lubang ti amat dalam.*
2 Bintang nya muka lubang ti amat dalam,* lalu asap pansut ari lubang nya baka asap ke pansut ari serumbung api ti besai. Ketegal asap nya, mata panas enggau langit nyadi petang.
3 Udah nya, seraban buntak pansut ari asap nya ngagai dunya. Sida diberi kuasa baka kuasa bala kala ba dunya.
4 Raban buntak nya enda diasuh ngemunaska rumput, pun kayu, tauka utai tumbuh ti ijau ba dunya. Sida semina diasuh ngemediska orang ke nadai chop Petara ba kening sida.
5 Seraban buntak nya enda dikemendarka munuh bala orang nya, tang sida tau merinsaka bala orang nya pengelama lima bulan. Pemerinsa nya asai iya baka pemedis orang ke udah disengat kala.
6 Maya nya, orang deka ngiga pemati, tang sida enda ulih tetemuka iya. Sida ingin amat deka mati, tang pemati deka ngerarika diri ari sida.
7 Raban buntak nya baka kuda ke besedia deka beperang. Ba atas pala sida bisi utai ke baka makota emas, lalu mua sida baka mua mensia.
8 Buk sida baka buk orang indu, lalu ngeli sida baka ngeli singa.
9 Terabai dada sida baka terabai dada besi. Bunyi sayap sida baka bunyi mayuh kerita kuda ke laju mansang beperang.
10 Pia mega, iku sida bisi sengat baka sengat kala, lalu ba iku sida bisi kuasa kena ngemediska orang pengelama lima bulan.
11 Sida bisi siku raja, iya nya melikat ke bekuasa atas lubang ti amat dalam.* Ba jaku Hebrew, nama iya Abadon,* lalu ba jaku Gerika, nama iya Apolion.*
12 Tulah ti keterubah udah nyadi. Peda! Pengudah utai tu, dua iti da agi tulah deka datai.
13 Melikat ti keenam nyepu terumpit iya, lalu aku ninga nyawa pansut ari semua tanduk alta emas ke bisi ba mua Petara.
14 Nyawa nya bejaku ngagai melikat ti keenam ke megai terumpit: “Buka tali empat iku melikat ke ditanchang ba Sungai Eupratis ti besai nya.”
15 Empat iku melikat nya pan dilepaska. Sida udah disediaka ngambika munuh satu pertiga ari semua mensia ba jam, hari, bulan, enggau taun ke udah ditetapka.
16 Aku ninga bisi 200 juta iku soldadu ke bekuda.
17 Ba genera ke dipeda aku, tu meh gamal kuda sereta orang ke nepan kuda nya: Terabai dada sida bewarna mirah baka api, biru tuai, sereta kuning baka merirang. Pala kuda nya baka pala singa, lalu api, asap, enggau merirang pansut ari mulut kuda nya.
18 Satu pertiga ari penyampau mensia dibunuh tiga iti bencana nya, iya nya api, asap, enggau merirang ke pansut ari mulut kuda nya.
19 Kuasa bala kuda nya bisi ba mulut enggau iku sida. Iku bala kuda nya baka ular sereta bisi pala ke ulih ngemediska orang.
20 Tang orang ke enda dibunuh bencana nya, enda nesal ati ari pengawa ke digaga jari sida. Sida enda ngetu nyembah bala melikat ti jai sereta nyembah engkeramba ke enda ulih meda, ninga, tauka bejalai, ke digaga ari emas, pirak, temaga, batu, enggau kayu.
21 Sida enda nesal ati ari dosa sida. Sida enda ngetu munuh orang, ngereja pengawa ti bekaul enggau melikat ti jai,* ngereja ulah seks ti kamah,* sereta ngenchuri.
Nota Kaki
^ Peda Penerang Leka Jaku.
^ Peda Penerang Leka Jaku.
^ Peda Penerang Leka Jaku.
^ Reti nya “Pengerusak; Kemusnahan.”
^ Reti nya “Iya ti Ngemunaska.”
^ Peda Penerang Leka Jaku, “Ilmu sihir.”
^ Jaku Gerika, “por·nei′a.” Peda Penerang Leka Jaku.
