Pemansut 10:1-29
10 Udah nya, Jehovah madah ngagai Moses: “Alai nuan betemu enggau Firaun. Aku udah nejuka ati iya enggau ati bala pegawai iya degil, ngambika Aku ulih ngereja utai ti luar biasa ba depan iya.
2 Aku mega ngereja nya ngambika nuan ulih madah ngagai bala anak nuan enggau bala uchu nuan pasal baka ni Aku udah balat ngukum Ejip, sereta madahka sida utai ti luar biasa ke udah digaga Aku ba dia. Kita tentu deka nemu Aku tu meh Jehovah.”
3 Moses enggau Aron pan betemu enggau Firaun, lalu madah ngagai iya: “Tu meh utai ke dipadahka Jehovah, Petara orang Hebrew: ‘Ni pengelama nuan enggai nunduk ngagai Aku? Awakka nembiak Aku mupuk, ngambika sida ulih nyembah Aku.
4 Enti nuan agi enggai ngasuh nembiak Aku mupuk, Aku deka ngasuh buntak datai ngagai menua nuan pagila.
5 Tanah deka penuh laban buntak nyentukka tanah langsung enda ulih dipeda. Sida deka makai semua utai tumbuh ke agi tinggal, ke enda anchur ketegal ujan batu. Lalu sida mega deka makai semua pun kayu ke ba ladang.
6 Buntak nya deka ngemenuhka semua rumah nuan, semua rumah bala pegawai nuan, sereta semua rumah ba serata Ejip. Seumur idup aki ini nuan nyentukka diatu, utai ke baka nya nadai kala nyadi ba menua tu.’” Udah nya, seduai iya mupuk ari Firaun.
7 Bala pegawai Firaun lalu bejaku ngagai Firaun: “Ni pengelama orang tu deka ngasuh kitai dalam bahaya? Asuh bala sida mupuk ngambika sida ulih nyembah Petara sida, Jehovah. Kati nuan enda sedar Ejip udah anchur?”
8 Nyadi, Moses enggau Aron pan dibai ngagai Firaun. Firaun bejaku ngagai seduai iya: “Alai, sembah meh Petara kita, Jehovah. Tang, sapa bala kita ke deka mupuk?”
9 Ku Moses nyaut: “Kami semua deka mupuk enggau bala kami, nyengkaum sida ke biak, sida ke tuai, bala anak lelaki kami, bala anak indu kami, raban bedus kami, enggau raban sapi kami, laban kami deka ngintu pengerami ke Jehovah.”
10 Ku Firaun madahka: “Kita ngumbai aku deka ngasuh kita enggau bala anak kita mupuk? Enti aku ngereja nya, tentu kita madah Jehovah bisi enggau kita. Kita tu tentu bisi tuju ati ti jai.
11 Enda ulih! Semina bala kita ke lelaki aja ulih mupuk nyembah Jehovah, laban nya meh utai ke dipinta kita.” Firaun pan ngasuh seduai iya diburu ke luar.
12 Udah nya, Jehovah madah ngagai Moses: “Unjurka jari nuan ngagai menua Ejip, ngambika buntak datai lalu makai semua utai tumbuh ba menua nya ke enda anchur ketegal ujan batu.”
13 Moses lalu ngunjurka tungkat iya ngagai menua Ejip, lalu Jehovah ngasuh ribut ari timur bepuput ba menua nya sehari-hari semalam-malam. Pagi siti, bisi mayuh buntak ba menua nya udah dibai ribut ari timur.
14 Buntak datai ngagai serata menua Ejip lalu ngemenuhka semua kawasan ba Ejip. Utai ke nyadi nya amat balat. Sebedau nya, nadai kala bisi buntak ngemayuh nya. Pengudah nya pan nadai.
15 Buntak nya ngemenuhka serata menua nya nyentukka menua nya nyadi petang. Sida makai semua utai tumbuh ba menua nya, sereta makai semua buah ba pun kayu ke enda anchur ditinggang ujan batu. Nadai siti pan daun ba pun kayu tauka utai tumbuh ba menua Ejip ke agi tinggal.
16 Firaun lalu jampat ngangauka Moses enggau Aron, lalu madahka: “Aku udah bedosa ngagai Petara kita, Jehovah. Aku mega udah bedosa ngagai kita.
17 Tulung meh. Ampunka dosa aku. Kali tu aja. Pinta ngagai Petara kita, Jehovah, ngambika Iya muai penulah ti balat tu ari aku.”
18 Moses pan mupuk ari Firaun, lalu besampi ngagai Jehovah.
19 Udah nya, Jehovah ngubah tuju ribut bepuput, lalu ribut bepuput enggau balat ari barat. Semua buntak nya dipuputka ribut ngagai Tasik Mirah. Nadai siku pan buntak ke agi tinggal ba serata menua Ejip.
20 Tang Jehovah nejuka ati Firaun degil, lalu Firaun enda ngasuh orang Israel mupuk.
21 Udah nya, Jehovah madah ngagai Moses: “Angkatka jari nuan ke langit, ngambika serata menua Ejip dibalut pemetang ti amat balat.”
22 Moses lalu terus ngangkatka jari iya ke langit, lalu serata menua Ejip dibalut pemetang ti balat pengelama tiga hari.
23 Orang Ejip enda ulih meda pangan diri, lalu sida mega nadai mindah kini-kini pengelama tiga hari. Tang, ba endur orang Israel diau bisi cahaya.
24 Udah nya, Firaun ngangauka Moses lalu madahka: “Alai meh, sembah Jehovah. Bala anak kita pan ulih dibai sama enggau kita. Tang anang mai jelu bedus enggau sapi kita.”
25 Tang ku Moses nyaut: “Enda. Nuan mesti nejuka kami mai jelu kami, ngambika ulih diserahka kami nyadika pemeri tunu ngagai Petara kami, Jehovah.
26 Kami mesti mai jelu kami magang. Nadai siku pan ke tau tinggal, laban sekeda ari jelu nya deka dikena kami nyembah Petara kami, Jehovah. Nambahka nya, sebedau kami datai din, kami enda nemu ni bagi jelu ke deka diserahka kami kena nyembah Jehovah.”
27 Tang Jehovah nejuka ati Firaun degil, lalu Firaun enggai ngasuh orang Israel mupuk.
28 Ku Firaun madah ngagai Moses: “Pansut nuan! Anang betemu enggau aku agi! Nuan aku bunuh enti nuan berani datai kitu baru.”
29 Ku Moses nyaut: “Au, enda aku betemu enggau nuan agi.”
