Pemansut 17:1-16
17 Orang Israel mupuk ari menua puang Sin, lalu sida mindah ari siti endur ngagai siti endur, baka ke diasuh Jehovah. Sida pan nirika kem ba Repidim. Tang, sida nadai tetemuka ai irup ba dia.
2 Orang Israel lalu belaya enggau Moses. Ku sida madahka: “Beri kami ai irup.” Tang Moses madah ngagai sida: “Nama kebuah kita ngelaya aku? Nama kebuah kita majak nguji Jehovah?”
3 Tang orang Israel amat aus, lalu sida majak mutap ngagai Moses. Ku sida madahka: “Nama kebuah nuan mai kami pansut ari menua Ejip? Nuan ka kami mati aus, pia? Kami, bala anak kami, enggau jelu tupi kami tentu deka mati.”
4 Moses lalu bebendar ngangauka Jehovah minta tulung: “Nama utai ke patut digaga aku ngagai sida tu? Enda lama agi, sida deka nikau aku ngena batu!”
5 Ku Jehovah madah ngagai Moses: “Bai beberapa iku bala tuai orang Israel mupuk enggau nuan, lalu mansa orang Israel. Bai mega tungkat ke udah dikena nuan malu Sungai Nil.
6 Ba Horeb, Aku deka bediri ba depan nuan, ba atas batu ti besai. Palu batu nya, lalu ai deka pansut ari batu nya. Orang Israel ulih ngirup ai nya.” Moses pan ngereja nya ba depan bala tuai orang Israel.
7 Nya alai, Moses meri endur nya nama Masah* enggau Meribah,* laban orang Israel belaya enggau iya sereta laban sida nguji Jehovah. Ku sida madahka: “Jehovah bisi enggau kitai tauka enda?”
8 Udah nya, orang Amalek datai lalu nyerang orang Israel ba Repidim.
9 Moses lalu madah ngagai Josua: “Pilih bala sida ke lelaki ngambika ulih belaban enggau orang Amalek. Pagila, aku deka bediri ba tuchung bukit sambil megai tungkat Petara ti bendar.”
10 Josua pan ngereja utai ke diasuh Moses. Josua belaban enggau orang Amalek, lalu Moses, Aron, enggau Hur niki ngagai tuchung bukit.
11 Seagi-agi Moses ngangkatka jari iya, orang Israel menang. Tang lebuh iya nurunka jari iya, orang Amalek menang.
12 Lebuh jari Moses nyau lelak, Aron enggau Hur ngambi siti batu ngambika Moses ulih duduk ba dia. Seduai iya megai kedua-dua jari Moses, siku ba sepiak kiba lalu siku da agi ba sepiak kanan, ngambika jari Moses terus angkat sampai mata panas padam.
13 Josua pan ngalahka orang Amalek enggau bala soldadu sida ngena pedang.
14 Ku Jehovah bejaku ngagai Moses: “Tuliska jaku tu ba dalam siti bup ngambika jaku tu terus dikingatka: ‘Aku deka ngemunaska orang Amalek ari dunya tu lalu sida enda agi dikingatka.’ Padahka jaku tu mega ngagai Josua.”
15 Udah nya, Moses ngaga siti alta,* lalu meri alta nya nama Jehovah-nissi.*
16 Moses madahka: “Ketegal Amalek ngelaban perintah Jah, Jehovah deka beperang ngelaban iya enggau semua bala peturun iya.”
Nota Kaki
^ Reti nya “Nguji; Penguji.”
^ Reti nya “Belaya.”
^ Peda Penerang Leka Jaku.
^ Reti nya “Jehovah meh Tanda Aku.”
