Pemansut 19:1-25
19 Ba bulan ti ketiga pengudah orang Israel pansut ari menua Ejip, sida datai ba menua puang Sinai.
2 Sida mupuk ari Repidim, lalu datai ba menua puang Sinai ba hari ti sama. Sida pan nirika kem ba dia, enda jauh ari Gunung Sinai.
3 Udah nya, Moses niki gunung nya lalu mansang ngagai Petara ti bendar. Jehovah ngangauka iya ari gunung nya lalu madahka: “Tu meh utai ke patut dipadahka nuan ngagai peturun Jakop, orang Israel:
4 ‘Kita empu udah meda utai ke digaga Aku ngagai orang Ejip, ngambika Aku ulih mai kita ngagai Aku, baka burung menaul ke mai anak iya ba atas sayap iya.
5 Serata dunya tu enggi Aku magang. Enti kita ngasika semua pesan Aku lalu nitihka sempekat Aku, kita deka nyadi bansa Aku ti istimewa,* ke dipilih Aku ari semua bansa.
6 Kita deka nyadi perintah ke dipegai bala imam sereta bansa ti kudus ke Aku.’ Tu meh utai ke patut dipadahka nuan ngagai orang Israel.”
7 Moses nurun lalu ngangauka bala tuai orang Israel. Iya madah ngagai sida pasal semua utai ke udah dipadahka Jehovah ngagai iya.
8 Udah nya, semua orang setuju lalu nyaut: “Kami deka ngereja semua utai ke dipadahka Jehovah.” Moses lalu terus madahka saut sida ngagai Jehovah.
9 Ku Jehovah bejaku ngagai Moses: “Aku deka datai ngagai nuan dalam mua hari ti chelum, ngambika orang Israel ulih ninga Aku bejaku enggau nuan, lalu sida mega deka seruran arapka nuan.” Udah nya, Moses madahka saut orang Israel ngagai Jehovah.
10 Jehovah lalu bejaku ngagai Moses: “Alai nuan mansang ngagai orang Israel, lalu kuduska sida seharitu enggau pagila. Sida mesti masu gari sida.
11 Ba hari ti ketiga sida mesti udah sedia, laban ba hari nya Aku, Jehovah, deka nurun ngagai Gunung Sinai ba depan semua orang Israel.
12 Nuan mesti ngengkahka tanda ngelingi gunung tu, lalu padahka ngagai orang Israel: ‘Anang niki gunung tu tauka ngindik kaki gunung tu. Sapa-sapa ke negu gunung tu, mesti dibunuh.
13 Sekalika nya mensia tauka jelu, iya enda tau ditejuka idup. Iya deka ditikau ngena batu tauka ditimbak ngena anak panah.* Nadai orang tau negu iya.’ Tang lebuh terumpit* disepu, sida ulih datai semak ngagai gunung tu.”
14 Udah nya, Moses nurun ari gunung nya lalu mansang ngagai orang Israel. Iya nguduska sida, lalu sida masu gari sida.
15 Ku Moses madah ngagai orang Israel: “Ba hari ti ketiga, kita mesti udah sedia. Anang ngereja pengawa seks enggau bini kita.”
16 Ba pagi hari ti ketiga, bisi guntur, kilat, enggau remang* ti tebal ba atas gunung. Bisi mega bunyi terumpit ti amat inggar. Semua orang Israel ba kem pan getar-getar takut.
17 Moses mai orang Israel pansut ari kem, ngambika betemu enggau Petara ti bendar. Sida pan bediri ba kaki gunung nya.
18 Serata Gunung Sinai abis dibalut asap, laban Jehovah udah nurun ngagai gunung nya dalam api. Asap niki ke atas baka asap ke pansut ari serumbung api, lalu gunung nya balat amat begegar.
19 Bunyi terumpit majak inggar-seinggar. Moses pan bejaku, lalu nyawa Petara ti bendar nyaut iya.
20 Nyadi, Jehovah nurun ngagai tuchung Gunung Sinai. Jehovah ngangauka Moses, lalu Moses pan niki ngagai tuchung gunung nya.
21 Jehovah lalu madah ngagai Moses: “Alai nuan nurun, lalu padah ngagai orang Israel, sida enda tau ngelimpas tanda ke udah diengkahka nuan. Enti sida ngelimpas tanda nya ketegal sida deka meda Aku, Jehovah, mayuh ari sida deka mati.
22 Bala imam ke selalu datai semak ngagai Aku, Jehovah, mesti nguduska diri empu, ngambika Aku, Jehovah, enda ngukum sida.”
23 Moses lalu madah ngagai Jehovah: “Orang Israel enda ulih niki Gunung Sinai, laban Nuan udah dulu madah ngagai kami: ‘Engkahka tanda ngelingi gunung tu, ngambika orang nemu gunung tu kudus.’”
24 Ku Jehovah madah ngagai Moses: “Alai nurun nuan, lalu niki kitu baru enggau Aron. Tang, anang ngasuh bala imam enggau orang Israel ngelimpas tanda ke udah diengkahka nuan, ketegal sida deka datai ngagai Aku, Jehovah, ngambika Aku enda ngukum sida.”
25 Nya alai, Moses pan nurun lalu madahka utai nya ngagai orang Israel.
Nota Kaki
^ Tauka “bansa ti berega ba Aku.”
^ Tauka engka, “tauka sangkuh.”
^ Jaku Asal, “tanduk bedus lelaki.”
^ Tauka “awan.”
