Pemansut 2:1-25
2 Maya nya, siku lelaki ari raban bansa Lewi kawin enggau siku indu ari raban bansa Lewi.
2 Indu nya ngandung lalu ngadaka siku anak lelaki. Lebuh iya meda pemanah gamal anak nya, iya ngelalaika anak nya pengelama tiga bulan.
3 Lebuh iya enda ulih agi ngelalaika anak nya, iya pan ngambi bakul* papirus lalu ngelapis bakul nya ngena tar.* Udah nya, iya nyimpan anak nya ba dalam bakul, lalu ngengkahka bakul nya ba entara rumput ti tinggi ba tebing Sungai Nil.
4 Menyadi indu anak mit nya meda ari jauh nama utai ke deka nyadi ngagai adik iya.
5 Anak indu Firaun nurun ngagai Sungai Nil laban deka mandi. Maya nya, bala indu ke gawa ke iya bejalai ba tebing sungai. Udah nya, iya tepedaka bakul nya ba entara rumput ti tinggi. Iya lalu terus ngasuh ulun indu iya ngambi bakul nya.
6 Lebuh iya muka bakul nya, iya meda siku anak mit lelaki benung nyabak. Iya lalu madahka: “Tu anak orang Hebrew.” Taja pia, iya berasai kasihka anak mit nya.
7 Udah nya, kakak anak mit nya madah ngagai anak indu Firaun: “Nuan ka aku ngangauka siku indu orang Hebrew ngambika nusuka anak nya ke nuan?”
8 Ku anak indu Firaun nyaut iya: “Alai meh.” Iya pan mupuk lalu ngangauka indai anak mit nya.
9 Anak indu Firaun lalu madah ngagai indai anak mit nya: “Bai anak mit tu, lalu tulung aku nusuka iya. Aku deka mayar nuan.” Nyadi, indai anak mit nya pan ngambi anak mit nya lalu nusuka iya.
10 Lebuh anak nya udah besai, indai iya mai iya ngagai anak indu Firaun. Iya pan nyadi anak angkat anak indu Firaun. Anak indu Firaun meri iya nama Moses,* laban ku iya madahka: “Aku udah ngambi iya pansut ari ai.”
11 Bisi sekali, maya Moses udah besai agi,* iya mansang betemu enggau bala menyadi iya ke sama orang Hebrew, lalu meda sida dipaksa ngereja pengawa berat. Udah nya, iya meda siku orang Ejip malu siku ari bala menyadi iya.
12 Nyadi, iya malik ke kiba enggau ke kanan, lalu nadai meda orang ba dia. Udah nya, iya munuh orang Ejip nya lalu ngelalaika bangkai iya ba dalam pasir.
13 Hari siti, iya mansang baru ngagai bala menyadi iya, lalu meda dua iku orang Hebrew benung belaya. Nya alai, iya nanya orang ke salah nya: “Nama kebuah nuan malu bala nuan empu?”
14 Orang nya pan nyaut iya: “Sapa ke milih nuan nyadi pemerintah enggau hakim kami? Nama deh? Nuan ka munuh aku baka nuan ke udah munuh orang Ejip nya?” Moses pan nyadi takut lalu bejaku dalam ati: “Tentu orang udah nemu pasal pekara nya.”
15 Lebuh Firaun ninga pasal nya, iya deka munuh Moses. Tang Moses ngerarika diri ari Firaun. Moses rari ngagai Midian lalu diau ba menua nya. Lebuh iya datai ba menua nya, iya duduk semak siti telaga.
16 Ba Midian, bisi siku imam ke bisi tujuh iku anak indu. Bala anak indu iya datai kia laban deka nyauk ai, lalu ngisi sarang ai endur jelu tupi apai sida ngirup.
17 Baka biasa, bala pengibun bedus datai, lalu muru sida. Moses pan angkat nulung sida, lalu meri jelu tupi sida ngirup.
18 Lebuh sida pulai ke rumah, apai sida, Reuel,* lalu bejaku: “Jampat amat kita pulai seharitu.”
19 Ku sida madahka: “Bisi siku orang Ejip datai nyelamatka kami ari bala pengibun bedus. Iya indah nyauk ai ke kami lalu meri jelu tupi kitai ngirup.”
20 Ku iya madah ngagai bala anak indu iya: “Ni iya deh? Nama meh kita ninggalka iya? Kangauka iya. Bai iya makai enggau kitai.”
21 Udah nya, Moses setuju deka diau enggau Reuel. Reuel pan meri anak indu iya, Sipora, nyadika bini Moses.
22 Udah nya, Sipora ngadaka siku anak lelaki. Moses madahka: “Aku deka meri iya nama Gersom,* laban aku udah nyadi orang asing ba menua tu.”
23 Betaun-taun udah nya, raja Ejip pan mati. Taja pia, orang Israel agi terus besebana ketegal gawa nyadi ulun. Sida terus bebendar minta tulung ari Petara ti bendar.
24 Petara ninga sebana sida, lalu Iya ingatka sempekat ke digaga Iya enggau Abraham, Isak, enggau Jakop.
25 Petara beratika orang Israel lalu meda pemerinsa sida.
Nota Kaki
^ Tauka “peti.”
^ Tauka “tar enggau asphalt.”
^ Reti nya “Ngambi Pansut,” iya nya, nyelamatka iya ari ai.
^ Tauka “dewasa.”
^ Iya nya, Jetro.
^ Reti nya “Orang Asing ba Dia.”
