Pemansut 24:1-18
24 Ku Jehovah madah ngagai Moses: “Nuan, Aron, Nadap, Abihu, enggau 70 iku bala tuai orang Israel mesti niki kitu ngagai Aku. Semua kita mesti besugang nyembah Aku ari jauh.
2 Moses, semina nuan aja ke tau datai semak ngagai Aku, Jehovah. Sida ke bukai enda tau kitu. Orang Israel enda tau niki enggau nuan kitu.”
3 Udah nya, Moses madah pasal semua utai ke dipadahka Jehovah enggau adat Iya ngagai orang Israel. Semua orang Israel setuju lalu nyaut: “Kami deka ngereja semua utai ke dipadahka Jehovah.”
4 Moses lalu nulis semua utai ke dipadahka Jehovah. Udah nya, iya dani tumu pagi lalu ngaga siti alta ba kaki gunung. Iya mega ngaga 12 iti tiang, sama penyampau enggau 12 iti raban bansa orang Israel.
5 Pengudah nya, Moses ngasuh beberapa iku lelaki orang Israel ke biak nyerahka pemeri tunu, sereta nyerahka sapi ke lelaki nyadika pemeri bebaik ngagai Jehovah.
6 Udah nya, Moses lalu ngambi setengah ari darah jelu nya lalu nuangka nya ke dalam mangkuk. Setengah da agi darah nya dipechikka iya ba alta.
7 Moses pan ngambi bup sempekat lalu macha bup nya enggau inggar ke orang Israel. Orang Israel lalu madahka: “Kami deka ngasika Jehovah lalu ngereja semua utai ke diasuh Iya.”
8 Nyadi, Moses ngambi darah lalu mechikka darah nya ba orang Israel. Ku iya madahka: “Tu meh darah ti nanggam sempekat Jehovah enggau kita. Sempekat tu bekaul enggau semua utai ke udah didinga kita tadi.”
9 Moses, Aron, Nadap, Abihu, enggau 70 iku bala tuai orang Israel pan niki gunung,
10 lalu sida meda Petara orang Israel. Ba baruh kaki Iya, bisi utai ke baka lantai ke digaga ari batu nilam. Lantai nya cerah baka langit biru ke nadai remang.*
11 Petara enda ngemediska bala tuai orang Israel. Sida meda Petara ti bendar dalam runding sida, lalu sida makai enggau ngirup.
12 Jehovah bejaku ngagai Moses: “Niki ke atas gunung tu ngagai Aku lalu diau ba ditu. Aku deka meri nuan lampang batu. Ba lampang batu nya, Aku deka nuliska adat enggau pesan Aku ke patut dititihka orang Israel.”
13 Moses enggau penulung iya, Josua, pan berengkah niki gunung nya. Udah nya, Moses terus niki gunung Petara ti bendar.
14 Tang, Moses madah ngagai bala tuai orang Israel: “Kita nganti kami ba ditu sampai kami pulai baru. Aron enggau Hur bisi enggau kita. Sapa-sapa ke bisi penanggul ke patut diakim, ulih betemu enggau seduai iya.”
15 Moses pan niki gunung ke dibalut remang nya.
16 Mulia Jehovah enda mindah ari Gunung Sinai, lalu remang malut gunung nya pengelama enam hari. Ba hari ti ketujuh, Iya ngangauka Moses ari dalam remang nya.
17 Orang Israel meda mulia Jehovah baka api ti mau ba atas tuchung gunung.
18 Moses tama ke dalam remang lalu terus niki ngagai tuchung gunung. Iya diau ba dia pengelama 40 hari 40 malam.
Nota Kaki
^ Tauka “awan.”
