Pemansut 25:1-40
25 Ku Jehovah madah ngagai Moses:
2 “Padah ngagai orang Israel ngambika meri pemeri ngagai Aku. Gumpul pemeri ari tiap iku orang ke bisi pengingin ati deka meri ngagai Aku.
3 Tu pemeri ke patut digumpul nuan ari sida: Emas, pirak, temaga,
4 ubung biru, ubung ungu ke digaga ari bulu bedus, ubung mirah, kain linin ke alus, bulu kambin,
5 kulit bedus ti lelaki ke udah digaga nyadi warna mirah, kulit anjing laut, kayu akasia,
6 minyak lampu, balsam* ke dikena ngaga minyak ti kudus* sereta dikena ngaga menyan ti bebau rengut,
7 enggau batu oniks sereta batu berega ti bukai ke dipasang ba epod enggau penutup dada.
8 Kita patut ngaga endur ti kudus ke Aku, lalu Aku deka diau enggau kita.
9 Kita mesti ngaga Langkau Sembiang enggau semua perengka ba dia, nitihka pelan ke ditunjukka Aku ngagai nuan.
10 “Kita mesti ngaga siti peti ngena kayu akasia. Pemanjai iya kira-kira 111 sentimeter, buka iya kira-kira 67 sentimeter, lalu peninggi iya kira-kira 67 sentimeter.*
11 Lapis begian dalam enggau begian luar peti nya ngena emas ti tulin. Gaga bingkai emas ba semua tisi peti nya.
12 Gaga empat iti gelang emas, lalu pasangka gelang nya ba empat iti kaki peti nya. Dua iti gelang ba sepiak, lalu dua iti gelang ba sepiak da agi.
13 Gaga kayu ngena kayu akasia, lalu lapis kayu nya ngena emas.
14 Rasukka kayu nya ke dalam gelang ba tisi peti nya, ngambika peti nya ulih disan.
15 Kayu nya enda tau dikeluarka ari gelang peti nya.
16 Simpan lampang batu ke ngembuan pesan Aku,* ke deka diberi Aku ngagai nuan, ke dalam peti nya.
17 “Gaga penutup peti nya ngena emas ti tulin. Pemanjai iya kira-kira 111 sentimeter, lalu buka iya kira-kira 67 sentimeter.
18 Gaga dua iti cherub emas ngena tukul, ba kedua-dua ujung penutup peti nya.
19 Gaga siti cherub ba ujung penutup peti nya, lalu siti agi cherub ba ujung siti da agi.
20 Dua iti cherub nya mesti betunga enggau pangan diri. Mua seduai iya mesti malik ke baruh ngagai penutup peti nya. Kedua-dua sayap seduai iya mesti ngerembai ke atas, lalu ngelindung peti nya.
21 Tutup peti nya ngena penutup nya. Simpan lampang batu ke ngembuan pesan Aku, ke deka diberi Aku ngagai nuan, ke dalam peti nya.
22 Aku deka ngayanka Diri lalu bejaku ngagai nuan ari atas penutup peti nya. Ba entara dua iti cherub ke ba atas peti lampang batu Adat nya, Aku deka madahka semua pesan ke patut dipadahka nuan ngagai orang Israel.
23 “Gaga siti mija ngena kayu akasia. Pemanjai iya 89 sentimeter, buka iya 44.5 sentimeter, lalu peninggi iya kira-kira 67 sentimeter.*
24 Lapis mija nya ngena emas ti tulin, lalu gaga lilit emas ngelingi tisi mija nya.
25 Gaga bingkai ngelingi mija nya, lalu buka iya 7.4 sentimeter,* lalu gaga lilit emas ngelingi bingkai nya.
26 Gaga empat iti gelang emas, lalu pasangka gelang nya ba empat iti kaki mija ke ba sukut mija nya.
27 Pasang gelang nya semak enggau bingkai mija, ngambika kayu ulih dirasuk ke dalam gelang nya kena ngesan mija nya.
28 Gaga kayu nya ngena kayu akasia, lalu lapis kayu nya ngena emas. Kayu nya deka dikena ngesan mija nya.
29 “Gaga pinggai, cawan, sereta jag enggau mangkuk kena nuang pemeri wain. Semua utai nya mesti digaga ari emas ti tulin.
30 Kita mesti seruran ngengkahka roti ti diberi ngagai Aku ba atas mija nya, ba depan Aku.
31 “Gaga penuduk lampu ngena emas ti tulin, lalu gaga iya ngena tukul. Penuduk lampu nya mesti bisi pelasar, batang, enggau cabang. Ba tiap iti cabang mesti bisi sepal bungai, kuntum bungai, enggau serindak bungai. Semua begian nya mesti digaga ngena siti tekang emas, ukai digaga siti-siti.
32 Batang penuduk lampu nya mesti bisi enam iti cabang. Tiga iti cabang ba sepiak kanan, lalu tiga iti cabang ba sepiak kiba.
33 Tiap iti cabang mesti bisi tiga iti sepal bungai ke baka bentuk bungai almond, lalu tiap iti sepal nya mesti ditusun beselang-seli enggau kuntum bungai sereta serindak bungai. Keenam-enam iti cabang ke pansut ari batang penuduk lampu nya mesti digaga baka nya.
34 Ba batang penuduk lampu nya mesti bisi empat iti sepal bungai ke baka bentuk bungai almond, lalu tiap iti sepal nya mesti ditusun beselang-seli enggau kuntum bungai sereta serindak bungai.
35 Siti kuntum bungai ba baruh dua iti cabang ti keterubah, siti kuntum bungai ba baruh dua iti cabang ti kedua, lalu siti kuntum bungai ba baruh dua iti cabang ti ketiga. Baka nya meh keenam-enam iti cabang nya pansut ari batang penuduk lampu nya.
36 Kuntum bungai, cabang, enggau semua begian penuduk lampu mesti digaga ari emas ti tulin, lalu digaga ngena tukul. Semua begian nya mesti digaga ngena siti tekang emas, ukai digaga siti-siti.
37 Gaga tujuh iti lampu kelita ba penuduk lampu nya. Lebuh lampu kelita ditungkun, api iya deka manchar ke depan.
38 Sepit enggau pekekas endur engkah bara api mesti digaga ngena emas ti tulin.
39 Penuduk lampu nya enggau semua pekekas iya mesti digaga ngena 34.2 kilogram* emas ti tulin.
40 Tentuka nuan ngaga semua utai nya nitihka pelan ti dipandangka ngagai nuan ba gunung tu.
Nota Kaki
^ Peda Penerang Leka Jaku.
^ Iya nya, minyak ke dikena lebuh milih sesiku orang secara rasmi kena ngereja sesiti pengawa.
^ Jaku Asal, “Pemanjai iya 2.5 kiubit, buka iya 1.5 kiubit, lalu peninggi iya 1.5 kiubit.” Peda Rujukan B14.
^ Tauka “lampang batu ke baka saksi.”
^ Jaku Asal, “Pemanjai iya 2 kiubit, buka iya 1 kiubit, lalu peninggi iya 1.5 kiubit.”
^ Jaku Asal, “1 tapa jari.”
^ Jaku Asal, “1 talenta.” Peda Rujukan B14.
